Japan at Vietnam, hahalo sa PVL Invitational Semis

ni Gerard Arce @Sports | July 9, 2023

Mga laro sa Martes (Hulyo 11)

(Philsports Arena)

9:30 am – Petro Gazz vs Farm Fresh

12:00 nn – Cignal vs Foton

4:00 n.h. – Akari vs Chery Tiggo

6:30 n.g. – Choco Mucho vs F2 Logistics

Nakahanda nang makipagsabayan ang dalawang foreign clubs mula Japan at Vietnam bilang opisyal na koponang sasabak sa semifinal round ng 2023 Premier Volleyball League (PVL) Invitational Conference simula Hulyo 20 sa Philsports Arena sa Pasig City.

Sasabak ang Kurashiki Ablaze mula sa Yokohama sa Japan at Kinh Bac Bac Ninh galing Vietnam ang kumpirmadong makikipaghatawan sa local clubs na papasok sa semifinal round sa mid-conference na inaasahang magbabalik ang aksyon sa darating na Martes matapos ang bakbakan sa men’s Volleyball Nations League na isinasagawa sa kasalukuyan sa bansa.

Magpapatuloy ang aksyon sa eliminasyon ng 11 koponan na hinati sa dalawang grupo, kung saan ang dalawa sa pinakamataas na puwesto ang aabante sa susunod na yugto para samahan ang dalawang guest teams.

Matatandaang umatras ang koponan mula Japan na Kobe Shinwa sa huling minuto ng desisyon noong isang taon sa 2022 PVL Invitationals matapos magpositibo ang isang miyembro nito sa COVID-19, upang maiwan ang KingWhale Taipei na nag-iisang guest team. Nakatapat ng Taiwanese club sa finals ang reigning at defending champions na Creamline Cool Smashers sa winner-take-all laro, kung saan itinanghal na finals MVP si Ced Domingo.

Ipaparada ng Kurashiki Ablaze ang matitinding manlalaro na sina hitters Saya Taniguchi, Sayaka Tanida, Yukino Yano at Saki Tanabe kasama sina opposite strikers Asaka Tamaru, Reina Fujiwara at Honoka Okuda, na siyang kumakampanya sa Japan V.League Division 3 at pangunahan ang 13th National Six-Man Volleyball League, Western tournament, habang sumegunda sa 12th National Volleyball League, gayundin ang pagtapos sa ikatlong pwesto sa 13th National Volleyball League Grand Champion Match.

Obiena, tiwalang may Pinoy pa na pa-Olympics

ni Gerard Arce @Sports | July 7, 2023

Umaasa si Olympian pole vaulter Ernest John Obiena na madaragdagan pa ang mga Filipinong atleta na makakapasok sa 2024 Paris Olympic Games matapos maging kauna-unahang Pinoy na makapagkuwalipika sa quadrennial meet.

Matagumpay na nasungkit ni Obiena ang ikalawang sunod na pagpasok sa Summer Olympic Games nang maka-silver sa Bauhaus-Galan meet sa Sweden. “Paris is a good achievement, it wasn’t something that I was worried about per se, but of course, it was something that wasn’t just given,” wika ni Obiena sa panayam ng CNN Philippines Sports Desk na naniniwalang hindi imposibleng makapag-uwi ng medalya sa Olympics na tiyak matinding makakaharap sina World No.1 at Olympic champion Armand Duplantis ng Sweden, American Christopher Nilsen at kaibigang si Thiago Braz ng Brazil. “I don't think it's impossible. And hopefully, by the end of 2024, we'll have some hardware to bring back home,” dagdag ni Obiena na nagawang mapabilang sa 6-meter jump club sa Norway.

Nagawang magpadala ng Pilipinas ng 19 na Filipino na atleta na lumikha ng malaking karangalan matapos mag-uwi ng kauna-unahang gintong medalya mula kay Hidilyn Diaz-Naranjo ng weightlifting, habang tig-dalawang silver mula kina Nesthy Petecio at Carlo Paalam, at isa pang bronze medal kay Eumir Felix Marcial, na galing lahat sa boxing. “When you qualify, it’s the sweetest thing. You’ll never forget your first, and it’s such an amazing experience. It’s something to take pride in, and if you’re gunning for it, go for it all the way,” paliwanag ng 6-foot-2 pole vaulter.

Inaasahan ng 3-time SEA Games gold medalist na makakasama niyang muli ang mga atletang nakapasok sa Tokyo Games tulad nina Carlos Yulo na sasabak sa World Artistic Gymnastics sa Antwerp para sa qualifying, gayundin sina Diaz, at Elreen Ando at Vanessa Sarno.

Ancajas target si Naoya Uunahin muna si Takuma

ni Gerard Arce @Sports | July 5, 2023

Puntiryang matupad ni dating super-flyweight World champion Jerwin “Pretty Boy” Ancajas na matuloy ang naunsyaming laban kay dating undisputed bantamweight at undefeated Japanese Slugger Naoya “Monster” Inoue sa hinaharap, ngunit uunahin muna niyang pabagsakin ang nakababatang kapatid na si WBA 118-pound titlist Takuma Inoue sa title bout ngayong taon.

Posibleng makaharap ng 31-anyos mula Panabo, Davao del Norte sa hinaharap si Naoya na malaki ang panghihinayang nang hindi matuloy na unification bout noong 2017 matapos ang unang title defense laban kay Jose Alfredo Rodriguez para sa International Boxing Federation (IBF) junior bantamweight na nauwi sa 7th round stoppage sa Macau.

Kasabayan ni Ancajas si Naoya sa paghawak ng isang kampeonato na pinaghaharian ni Naoya ang World Boxing Organization (WBO) title na limang beses na nitong nadedepensahan, kung saan nakipag-ugnayan ang kampo ng Japanese boxer sa panig nina Ancajas upang itulak ang unification bout. Subalit kinalauna’y nakahanap ng ibang makakalaban si Inoue sa katauhan ni Ricardo Rodriguez noong Mayo 21, 2017 sa Japan na nagtapos sa 3rd round knockout.

“Noong unang depensa ni Jerwin sa Macau, nag-contact agad iyong kampo ni Naoya sa amin, nagka-offer kami, hinihintay 'yung kontrata namin. Eh biglang kumuha ng ibang kalaban, kaya nanghinayang kami kase gusto rin namin makalaban si Naoya nun,” kwento ni chief trainer at manager na si Joven Jimenez sa programang Bulgar Sports TV: Sports Beat nitong Biyernes ng umaga. “Talagang gusto naming habulin yan, kase andun yung pangalan at andun din yung malaking pera. Eh kapag tinalo namin 'yan talagang sisikat ka sa buong mundo. Kase pound-for-pound siya ngayon,” dagdag ni Jimenez.

Ito rin umano ang madalas na binabanggit ni Ancajas (34-3-2, 23KOs), na matagumpay sa katatapos na laban sa kanyang 118-lb debut kontra kay Wilner Soto na pinasuko sa fifth round TKO, kay MP Promotions President Sean Gibbons kung magkakalinaw pa bang matuloy ang laban sa nakatatandang Inoue, na isa sa mga inaabangan ng mga Filipinong boksingero dahil sa dami ng tinalong Pinoy nito. “Talagang lagi namin yang binabanggit si Naoya, kase 'yung unang depensa ko nag-contact na sila. Kumbaga, kahit walang titulo, makalaban ko lang siya at makaharap si Naoya, 'yun na yung isa sa goal ko na bilang boksingero (achievement) sa career, gusto ko rin talaga makaharap siya,” bulalas ni Ancajas.