Belen at Solomon ng NU Lady Bulldogs sa SEA VLeague

ni Gerard Arce @Sports | August 2, 2023

Papalo para sa bayan ang karamihan sa manlalaro ng collegiate champions National University Lady Bulldogs sa pangunguna ng power-hitters na sina Mhicaela “Bella” Belan at Alyssa Solomon para sa national squad na sasabak sa paparating na Southeast Asia Volleyball League (V.League) women’s tournament ngayong darating na weekend sa Vietnam.

Tiyak na mas mahahasa ang kakayanan at kapasidad ng laro ng Lady Bulldogs na pagbibidahan ng UAAP season 84 Rookie-MVP kaantabay ang dating best opposite spiker na kasamang kakagat sina ace playmaker Camille Lamina, Shaira Jardio, Minierva Maaya, Evangeline Alinsug, Erin Pangilinan at Myrtle Escanlar sa torneong katulad ng nilahukan ng men’s squad na SEA V.League na ginanap nitong weekend sa Santa Rosa Sport Complex.

Makakatulong rin ng 2022 UAAP champions ang iba pang high school sensations at incoming rookies na sina Arah Panique at Abegail Pono, gayundin sina Roma Doromal at AC Miner ng Ateneo Blue Eagles, at Niña Ytang at Kamille Cal ng University of the Philippines Lady Maroons.

“This is a young team and we are investing for the future of the federation’s national team program,” saad ni Philippine National Volleyball Federation president Ramon “Tats” Suzara nitong Lunes

Nakatakdang simulan ng women’s team ang kanilang kampanya sa darating na Biyernes ang first leg sa Vihn Phuc, Vietnam at second leg simula Agosto 11 hanggang 13 sa Chiangmai, Thailand, na makakatapat ang Vietnam, Thailand at Indonesia sa regional tournament. “We’re confident in the capability of these young stars seen as the future of Philippine volleyball,” wika ni Suzara. “We have no doubts that they can carry our flag against the best in the region.”

Makunat at matibay na Santiago, binigo si Donaire

ni Gerard Arce @Sports | July 31, 2023

Dismayado at bigong masungkit ni dating four division World champion Nonito “The Filipino Flash” Donaire ang dating titulo at bakanteng World Boxing Council (WBC) bantamweight title laban sa mas determinadong Mexican fighter na si Alejandro “Peque” Santiago para sa unanimous decision kahapon sa 12-round title match sa T-Mobile Arena sa Las Vegas, Nevada.

Nabigong pahangain ng 40-anyos na Fil-Am ang tatlong hurado na sina Max De Luca (113-115), Chris Migliore (112-116) at Steve Weisfeld (112-116) na pinaboran lahat ang mas batang Mexican boxer na nagpamalas ng agresibong atake sa rami ng pinaulang suntok upang makuha ang ikaapat na sunod na panalo at ang kauna-unahang titulo matapos mabigong maagaw ang IBF super-flyweight title kay Jerwin “Pretty Boy” Ancajas noong Setyembre 2019 na nagtapos sa tabla.

“Disappointed,” bulalas ni Donaire (42-8, 28KOs) matapos ang laban. “But first and foremost, thank you everybody out there to all the people who supported me and came out here, this is a blessing for me to do this for a very long time, so I feel good still. Congrats to Alejandro, he deserves it, he’s a tough guy,” dagdag ni Donaire na 13 buwang nabakante matapos malasap ang malagim na second round TKO laban sa Pound-for-Pound titlist at unified WBC at WBO junior featherweight kingpin Naoya “The Monster” Inoue noong Hunyo 2022.

Mariing sinabi ng tubong Talibon, Bohol na hindi pa siya magreretiro dahil marami pa itong natitirang lakas para sumabak, subalit aminado itong hindi niya nagawang masunod ang game plan, gayundin ang pamatay na knockout punch kontra sa makunat at matibay na si Santiago (28-3-5, 14KOs).

Crawford, welterweight king pa rin, Spence Jr, dinurog

ni Gerard Arce @Sports | July 31, 2023

Muling sinuntok ni welterweight king Terrence “Bud” Crawford ang ikalawang undisputed championship matapos dominahin at tapusin sa 9th round si dating unified titlist Errol “The Truth” Spence Jr. upang isama sa kanyang World Boxing Organization (WBO) ang International Boxing Federation (IBF), World Boxing Council (WBC) at World Boxing Association (WBA) para maging kauna-unahang hari ng 147-pound weight category, kahapon sa T-Mobile Arena sa Las Vegas, Nevada.

Nanatiling undefeated ang 35-anyos mula Omaha, Nebraska upang patahimikin ang lahat ng mga nagdududa sa kanyang kakayanan matapos tuldukan ni Crawford (40-0, 31KOs) sa 2:32 sa 9th round ang dating walang talo na si Spence Jr. (28-1, 22KOs) na gulpi-sarado at duguan dulot ng mabibigat na suntok na tatlong beses na humandusay sa canvas bago tuluyang tapusin sa laban.

Hinirang na unang undisputed champ ng 147-lbs si Crawford sa four-belt era, kung saan minsang naghari sa super-lightweight division noong Agosto 2017 kontra Julius “Blue Machine” Indongo ng Namibia na nagtapos sa 3rd round knockout.

“It means everything because of who I took the belts from,” wika ni Crawford kay Showtime host Jim Gray matapos ang laban. “They tried to blackball me. They kept me out. They talked bad about me. They said I wasn’t good enough and I couldn’t beat these welterweights. I just kept my head to the sky and kept praying to God that I would get the opportunity to show the world how great Terence Crawford is. Tonight, I believe I showed how great I am.”

Tiniyak na magkakaroon ng rematch sa pagitan ng dalawang boksingero, ngunit si Crawford ang masusunod sa kung anong weight division sila magtatapat, kung saan nauna ng sinabi nito na hirap na siyang bumaba ng 147lbs limit at nais ng umakyat ng junior middleweight.