Korona, pilak at tanso agawan sa finals Game 2

ni GA @Sports | August 12, 2023

Mga laro ngayong Sabado

(Filoil EcoOil Centre, San Juan)

2 p.m. – UST vs UPHSD (battle-for-bronze)

4 p.m. – DLSU vs ADU (Finals)

Tatangkang tapusin ng Adamson University Lady Falcons ang misyong makamit ang matamis na tagumpay kontra sa reigning UAAP champions De La Salle University Lady Spikers sa kanilang best-of-three Finals Game 2, habang sasakmalin ng University of Santo Tomas Golden Tigresses ang third place podium finish sa Game 2 ng sariling serye kontra University of Perpetual Help System Dalta Lady Altas double-header na aksyon sa 2023 Shakey’s Super League (SSL) National Invitationals ngayong araw sa Filoil EcoOil Centre sa San Juan City.

Nais tuldukan ng Lady Falcons ang serye matapos ang dikdikang 22-25, 25-17, 17-25, 27-25, 16-14 comeback victory upang maging kauna-unahang national champion ng SSL.

Magsasalpukan sa ikalawang pagkakataon ang top-two teams sa 12-team tourney sa pinakatampok na laro ng 4 p.m., habang nakahanda ang mga pangil ng Golden Tigresses na lapangin ang Lady Altas matapos ang kumbinsidong pangwawalis sa Game 1 para sa unang salpukan ng 2 p.m.

Patutunayan ni team captain at beteranang si Lucille Almonte na kaya nilang tumapos ng serye, kasunod ng third place finish sa nagdaang 85th season ng UAAP, na kukuha ng suporta kina Lorene Toring Ayesha Juegos at Sharya Ancheta, gayundin si super-rookie Red Bascon, na bumuhos ng mga panapos na hambalos sa malupit na come-from-behind na panalo.

“Kailangang gustuhin natin na laging manalo. When it comes na tatapak kami sa loob ng court at maglalaro lang kami na La Salle ang kalaban natin, kakainin tayo ng buhay ng La Salle,” wika ni Adamson coach JP Yude patungkol sa kakayanan ng La Salle na makabalik sa laban na sasandal kina Shaveena Laput, Thea Gagate, Baby Jyne Soreno at Leiah Malaluan.

PVL pokus muna sa format ng All-Filipino Conference

ni GA @Sports | August 11, 2023

Pahinga muna sa pagdepensa ang Petro Gazz Angels sa Reinforced Conference matapos pigilan ng International Volleyball Federation (FIVB) ang kahilingan ng Premier Volleyball League na makakuha ng International Transfer Certificates upang makapaglaro ang foreign guest players, bagkus ay itutulak muna ang pagbabalik ng All-Filipino format.

Nagawang masungkit ng Petro Gazz ang kanilang ikalawang Reinforced Conference at pangalawa sa liga matapos ang magkasunod na panalo sa best-of-three Finals laban sa Cignal HD Spikers sa pangunguna ni import Lindsey Vander-Weide na hinirang na Finals MVP at Best Foreign Guest Player, sa malaking tulong ni three-time collegiate Most Valuable Player Gretchel Soltones.

Napurnada ang pananatili sa podium ng Petro Gazz nang tumapos lang ito sa pinakamasamang puwesto sa liga sa 9th place para higitan ang 6th place finish noong 2022 edisyon, habang bumagsak mula sa runner-up sa 2023 All-Filipino nitong unang komperensiya matapos maramdaman ang malaking kawalan ni Filipino-American Mar Jana Phillips na kinuhang import ng Gwangju Al Peppers sa Korean V-League.

Nauna nang inihayag ni Sports Vision President Ricky Palou na magbabalik sa All-Filipino format ang liga na ipaparada ng 12-koponan kasunod ng matagumpay na pagtatapos ng Invitational Conference na nagbigay sa Japanese foreign guest team na Kurashiki Ablaze ng kampeonato kontra sa six-time conference champs na Creamline Cool Smashers noong Hulyo.

Sa kabilang banda, tiwala si head coach Oliver Almadro, na katatapik lang bilang bagong chief tactician ng Colegio de San Juan de Letran Knights volleyball program na makakabawi sila sa pagkakamintis sa semifinals matapos maging finalists noong nagdaang komperensiya.

Nakahanda umanong pagsumikapan at pagtrabahuhan ng Angels ang pagbabalik ng All-Filipino format lalo pa’t lumalakas lalo ang bawat koponan. “We really have to work hard in the next and expect pa na mas tataas pa 'yung level,” wika ni Almadro.

Suarez, dikdikan na ang paghahanda vs. Vasquez

ni GA @Sports | August 10, 2023

Puspusan ang pagsasanay na isinasagawa ni 2016 Rio Olympian at undefeated Filipino boxer Charly “The King’s Warrior” Suarez para sa nalalapit na laban kontra Yohan “La Fiera” Vasquez ng Dominican Republic sa Agosto 26 sa Hard Rock Hotel and Casino sa Tulsa, Oklahoma, U.S.A. upang mas lumapit sa pangarap na World title bout.

Hindi papaawat sa preparasyon ang 34-anyos na beteranong boxer na nakikipagsabayan sa ensayo sa Top Rank Boxing Gym sa Las Vegas, Nevada ka-spar ang boxing rising stars at mga anak ni dating middleweight kingpin “Ferocious” Fernando Vargas na sina Emiliano at Amado Vargas, na pareho ring naghahanda sa kani-kanilang susunod na laban. “Bale kasabay ko sa training 'yung dalawang magkapatid na Vargas, lalo na sa sparring. Mas mabuti rin yung preparation namin. Medyo pababa na 'yung sparring sessions. Tulad ngayong araw wala muna sparring,” kwento ni Suarez.

Kasunod ng pagpirma ng tubong San Isidro, Davao del Norte ng kontrata sa Top Rank Promotions ni Bob Arum, katulong ang LCS Group ni sports patron Luis “Chavit” Singson, tuloy-tuloy ang paghahandang isinagawa ng kasalukuyang IBF at IBO Inter-Continental at WBC Asian super-featherweight titlist upang mapanatiling undefeated sa dibisyon na pinaghaharian ng apat na magkaka-ibang kampeon.

Kasalukuyang nakalista bilang No.7 ranked sa International Boxing Federation (IBF) si Suarez (15-0, 9KOs) na hinahawakan ni Joe Cordina ng United Kingdom, habang pasok rin itong No.10 sa World Boxing Association (WBA) ni Emannuel Navarrete at No.15 sa World Boxing Council (WBC) ni American O’Shaquie Foster.