Buwan na super-suwerte sa mga isinilang sa Year of the Tiger, alamin!

ni Maestro Honorio Ong - @Forecast | February 23, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Tigre o Tiger ngayong Year of the Metal Ox.

Kung ikaw ay isinilang noong 1926, 1938, 1950, 1962, 1974, 1986, 1998 at 2010, ikaw ay naiimpluwensiyahan ng animal sign na Tigre o Tiger.

Higit na magiging makulay, dramatiko, aktibo at iba’t ibang uri ng pagsubok ang mararansan sa buong taong ito ng 2021, higit lalo sa first quarter ng taon o mula Enero hanggang Abril.

Maraming pangyayari na hindi pinlano ang magaganap na makadaragdag sa iyong pagka-iritable at stress. Sa simula, aakalain mong hindi maganda ang dulot nito, pero sa bandang huli, matutuklasan mo na ang mga hindi pinaghandaan at biglaang gawain ay magdudulot din pala sa iyo ng malaking pag-unlad at suwerte ngayong Year of the Metal Ox.

Sinasabi ring kung anumang hindi kagandahang mararanasan sa buwan ng Enero hanggang Marso, sa pagpasok ng buwan ng Abril, magbabago na ang lahat. Sa pag-ibig, bago at mas masarap na suyuan ang magaganap. Madaragdagan ang mga oportunidad ng pagkakaperahan na dapat mong sunggaban agad.

Sa mga mag-asawa, ang buwan ng Abril ay magiging mainit at masaya. Habang sa mga estudyante at intelektuwal, ang buwan ng Abril ay magbibigay din ng dagdag na recognition at pagsikat, at sa mga negosyante at mangangalakal, sa panahong ito, unti-unti na muling aangat ang graph ng pag-unlad hanggang sa tuluyang kumita ng malaking halaga.

Sa lahat ng anggulo ng buhay, sa lipunan, personal at maging sa pamumulitika, ang buwan ng Abril ay sadyang magbibigay ng paborableng karanasan at paglago ng kabuhayan.

Samantala, sa taong ito ay may babala rin na bagama’t aangat ang takbo ng kabuhayan, maaari namang masobrahan sa gastusin at walang kabuluhang paglalabas ng pera hanggang sa tuluyang kapusin ng budget, na maaari ring magbunsod sa iyo upang mangutang. Upang maiwasan ang ganitong senaryo, ang pinakamagandang magagawa ng Tigre ngayong Year of the Metal Ox ay higpitan ang hawak ng pera at gumastos ng minimal lamang. Ibig sabihin, kaunting tipid at dagdag na savings ang dapat dahil sa ganyang paraan, ‘pag naging aware at maingat ka sa paggasta, hindi masasayang ang malalaking halaga ng salapi na nakatakda mong mahawakan at matamasa sa buong 2021.

Sa pangkalahatan, sa larangan ng career at hanapbuhay, siguradong aangat ang graph ng pag-unlad at kasaganaan kung saan makatatanggap ka ng mga karangalan at dagdag na kita sa anumang uri ng negosyo o investment na pinagkakaabalahan sa kasalukuyan.

Samantala, sa mga single, sa kalagitnaan ng taon, maaari mo nang matagpuan ang dalaga o binatang magtatanim sa puso mo ng binhi ng pag-ibig, na lalago at mamumulaklak ng pagkalinga at pagmamahal hanggang sa mabuo at lumago ang wagas at panghabambuhay na relasyon. Ngunit tulad ng dati nang pagkakamali, hindi dapat pairalin ang bilis ng pagpapasya sa halip magdesisyon na hindi base sa iyong pakiramdam kundi base sa praktikalidad upang umiral ang tapat, wagas at panghabambuhay na pagpapamilya.

Itutuloy

Alamin: Animal signs na super-compatible sa Tigre at dapat gawin upang umunlad ang kanilang samahan

ni Maestro Honorio Ong - @Forecast | February 18, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Tigre o Tiger ngayong Year of the Metal Ox.

Kung ikaw ay isinilang noong 1926, 1938, 1950, 1962, 1974, 1986, 1998 at 2010, ikaw ay naiimpluwensiyahan ng animal sign na Tigre o Tiger.

Sa pag-ibig, ganito naman umibig at magmahal ang isang Tigre, sinasabing dahil kakaiba ang kanyang ugali na medyo makasarili, kakaiba at medyo makasarili rin siya kung magmahal. Kaya kapag umibig ang isang Tigre, asahan mo nang ito ay tapat at pangmatagalan. Gayunman, kapag nagalit ang Tigre, tulad ng pag-ibig na ipinadama niya, matagal itong huhupa, kaya ang yamot at inis niya sa iyo ay maaari ring maging pangmatagalan.

Ngunit dahil may likas din namang awa at taglay na kabaitan ang mga Tigre, kapag nagmakaawa ka sa kanya at nakita niyang sincere ang paghingi mo ng kapatawaran, lumalambot din agad ang kanyang puso at habang awang-awa siya sa iyo, may tendency na bigyan ka pa niya ng donasyon at regalo upang mawala ang iyong kalungkutan.

Sa katotohanan, akala mo lang na matapang at astig ang isang Tigre, pero sa totoo lang, tulad ng nasabi na, may pusong-mamon din sila, lalo na kung ang simpatya nila ay ipupukol sa mga taong labis nangangailangan ng tulong, ‘yung tipong sobrang salat sa yaman at kapag nakakakita ng ganu’ng tao ang isang Tigre, madaling nababagbag ang kanyang loob, kaya ito ay palihim niyang tinutulungan.

Samantala, ka-compatible naman ng Tigre ang Kabayo dahil kapwa sila busy o sobrang dami ng iniisip at ginagawa, gayundin, pareho silang mahilig isabuhay ang karanasan, na kadalasang naa-attain o nakakamit naman nila. Dagdag pa rito, dahil mas umiiral ang rason at pag-aanalisa sa Kabayo, ang pagsasama ng Tigre at Kabayo ay magiging ligtas sa biglaang mali-maling desisyon o pagpapasya, na kadalasang nagagawa ng Tigre. Habang kapag nagdadalawang-isip naman ang Kabayo, tiyak na itutulak siya ng Tigre sa isang mabilis at epektibong pagdedesisyon, kaya ang kanilang pagsasama ay tiyak na magiging maunlad at mabunga.

Bukod sa Kabayo, ka-compatible rin ng Tigre ang Baboy na magbibigay ng seguridad at kapanatagan sa Tigre. Kung kilos nang kilos at kung saan-saan ang gumagala o pumupunta ang Tigre, yayayain siya ng Baboy upang manahimik at magpahinga. Habang kung sobra naman sa tulog ang isang Baboy at puro pahinga, tutulungan siya ng Tigre na bumangon at magtrabaho. Kaya naman ang pagsasama ng isang Tigre at Baboy, bukod sa balanse ay sadyang magiging maunlad talaga.

Habang ang Aso ay uunawain naman ang hindi maunawaang pagkatao ng Tigre na ubod ng lalim. Ngunit tulad ng nasabi na, kahit gaano pa kalalim ang personalidad ng Tigre, ito ay kayang-kayang unawain at maarok ng isang Aso. Dahil dito, ang pagsasama ng Aso at Tigre ay talagang magiging panghabambuhay at tunay na magiging maligaya.

Kung sadyang hinihingi ng pagkataon at hindi maiiwasan, puwede na ring pagtiyagaan ang pagsasama ng Tigre at Daga, gayundin ang Tigre at Tandang at Tigre at Kambing o Tupa. Ang mga samahang ito ay magiging maunlad at maligaya rin, higit lalo kung paiiralin ng bawat animal sign ang pag-ibig at pagmamahalan nila sa kapareha nilang Tigre, na sadyang napakahirap unawain, ngunit sa pag-ibig ay nananatili namang tapat at mapagparaya habambuhay.

Itutuloy

Tiger, pinakamahirap intindihin sa lahat ng animal signs

ni Maestro Honorio Ong - @Forecast | February 16, 2021

Ipagpatuloy natin ang pag-aanalisa sa pangunahing ugali at magiging kapalaran ng animal sign na Tigre o Tiger ngayong Year of the Metal Ox.

Kung ikaw ay isinilang noong 1926, 1938, 1950, 1962, 1974, 1986, 1998 at 2010, ikaw ay naiimpluwensiyahan ng animal sign na Tigre o Tiger.

Sinasabing bagama’t maraming magagandang pangyayari at suwerteng karanasan ang darating sa isang Tigre ngayong 2021, hindi naman mawawala na kasabay ng magagandang karanasang ito ay may manaka-nakang pagsubok at problemang darating. Ngunit ang mga pagsubok na ito ay madali namang malulunasan at masosolusyunan agad ng isang Tigre, basta ang mahalaga ay manalig siya sa taglay niyang galing at kakayahan.

Kapag dumarating ang mga biglaang pagsubok, dapat ding manalig siya na kasabay ng mga pagsubok na ito ay ang mga biglaang suwerte, kaya kailangang ang isang Tigre, anuman ang mangyari ay manatiling matatag, positibo ang isipan at buo ang loob.

Ang Tigre ay sinasabi ring kilala sa pagiging matulungin at may mababang loob, kumbaga, dahil sila ay madaling maawa, nagiging palabigay sila at matulungin, lalo na sa mga inaapi, mahihirap at biktima ng kalamidad, kung saan bagama’t hindi nila isinasapubliko ang pagtulong na kanilang ginagawa, bukal naman sa loob nila ang nasabing mga pagtulong nang lihim sa mga taong kinaawaan nila. Dahil sa pagiging matulungin na ito at may mababang loob, ang Tigre ay tunay namang palaging pinagpapala ng nasa itaas, kaya malimit siyang padalhan ng langit ng iba’t ibang uri ng surpresa sa kanyang buhay, lalo na ang mga bagay na may kaugnayan sa materyal na bagay at pagpapalago ng kabuhayan.

Sa pakikipagrelasyon at pakikipag-ugnayan sa kapwa, kailangang-kailangan ng Tigre ng simpatya at mga taong maniniwala, uunawa at daramay sa kanya. Sapagkat sa totoo lang, sa 12 animal signs, Tigre ang isa sa pinakamahirap maunawaan, kaya naman madalas, ang hinahanap niya sa isang babae o lalaki ay ang makakasapol ng malalim niyang kalungkutan at pagkatao. Tunay ngang malalim ang kalungkutan at pagkatao ng isang Tigre dahil ipinanganak siyang tila palagi niyang nadaramang kakaiba siya at nag-iisa. Kaya sa pakikipagkaibigan, matagal magtiwala ang Tigre dahil ang iniisip agad niya ay hindi naman tapat at totoo ang mga taong nakakatagpo at nakakaharap niya.

Gustung-gusto ng Tigre na pinapayuhan o binibigyan siya ng advice, kahit ang totoo ay hindi naman siya naniniwala sa mga ipinapayo at kahit ano pa ang ipayo mo sa kanya, malabo naman niya itong gawin dahil may unique at kakaibang pagkatao ang Tigre, na sadya namang mahirap mong mahuli ang kanyang kiliti.

Bukod sa mahirap mahuli ang kiliti ng Tigre, kadalasan ay siya rin ang may matigas na paninindigan, kaya anuman ang kanyang tinayuan na paniniwala, maaaring napakahirap mo na itong ipabago pa sa kanya, kahit alam na alam niyang mali ang isang posisyon o paniniwala na tinayuan niya.

Ganundin sa pag-ibig at pakikipagrelasyon, basta ito ay ginusto niya— mali man o tama at kumontra man ang lahat — walang makapipigil sa Tigre sa panahong siya ay in love na in love dahil para sa kanya, isa lang ang tama at mahalaga at ito ay ang magmahal nang lubusan.

Itutuloy