Filipinas booters, 46th place sa FIFA Women's World Ranking

ni Anthony E. Servinio @Sports | June 11, 2023

Lumikha muli ng bagong kabanata sa kanilang kasaysayan ang Philippine Women’s Football National Team at inabot nila ang pinakamataas ng puwesto na ika-46 sa pinakahuling FIFA Women’s World Ranking na inilabas noong Biyernes ng gabi. Ito ay mas mataas ng tatlong baytang kumpara sa ika-49 sa huling ulat noong Marso.

Kasama sa kalkulasyon ang pagwalis ng Filipinas ng tatlong laro sa 2024 Paris Olympics Qualifier noong Abril at dalawang panalo at isang talo noong 32nd Southeast Asian Games sa Cambodia noong Mayo. Dahil dito, umakyat din ang mga Pinay sa ika-walo sa buong Asya at pangatlo sa Timog Silangang Asya at nilampasan ang Myanmar, ang nagdulot ng kanilang nag-iisang talo sa SEAG.

Sa 32 bansa na sasabak sa 2023 FIFA Women’s World, ang Pilipinas ay ika-27. Tanging ang Panama (52), Haiti (53), Timog Aprika (54), Morocco (72) at Zambia (77) ang mas mababa.

Walang pagbabago sa taas at ang defending Women’s World Cup champion Estados Unidos pa rin ang numero uno at sinusundan ng Alemanya, Sweden, Inglatera at Pransiya. Nangunguna sa Asya ang Australia (10), Japan (11) at Tsina (14) habang Vietnam (32) at Thailand (44) ang nakakataas sa Pilipinas sa ASEAN.

Samantala, inihahanda na ang lahat para sa mas malaking 2023 Copa Paulino Alcantara ngayong Hulyo. Ayon kay Philippines Football League (PFL) Commissioner Mikhail Torre, tinitingnan nila ang paglahok ng 16 hanggang 20 koponan kabilang ang ilang mga kolehiyo at mga kinatawan ng Sandatahang Lakas ng Pilipinas.

Itinakda ang Hunyo 10 bilang huling araw ng pagsumite ng mga papeles ng mga nais lumahok. Karamihan ng mga laro ay gaganapin sa Rizal Memorial Stadium at University of Makati. Inaasahang matatapos ang Copa sa Setyembre at ang kampeon ay kakatawanin ang Pilipinas sa 2024 AFC Cup.

Filipinas Booters, pa-Auckland para paghandaan ang FIFA WWC

ni Anthony E. Servinio @Sports | June 10, 2023

Lalakbay na patungong New Zealand ang Philippine Women’s Football National Team upang simulan ang kanilang huling mga ensayo para sa 2023 FIFA Women’ s World Cup na magbubukas sa Hulyo 20. Napili ng Filipinas ang Auckland na magsisilbing lugar ng kanilang kampo para sa pinakamalaki at prestihiyosong torneo ng kababaihan.

Magkikita na sa Auckland ang mga manlalaro na manggagaling sa iba’t-ibang sulok ng daigdig at Coach Alen Stajcic na nasa Australia. Ihahayag ng Philippine Football Federation (PFF) ang huling listahan ng mga kandidata sa mga susunod na araw.

Bahagi ng kampo ang pagdaos ng ilang FIFA Friendly subalit hindi ito magiging bukas sa publiko. Ang unang opisyal na laro ay kontra Switzerland sa Hulyo 21 at susundan ng host New Zealand sa Hulyo 25 at Norway sa Hulyo 30.

Bago sila umalis, binigyan ang pambansang koponan ng isang despedida ng Embassy of New Zealand sa tahanan ni Ambassador Peter Kell sa Makati City. Kinatawanan ang Filipinas nina bise-kapitana Hali Long at goalkeeper Inna Palacios kasama sina PFF President Mariano Araneta at General-Secretary Atty. Edwin Gastanes.

Hindi pa nagsisimula ang kompetisyon ay nagtamasa ng malaking tagumpay ang Women’s Football sa paglabas ng FIFA ng tulong pinansiyal sa mga manlalaro, isang usapin na matagal nang ipinaglalaban na malaking agwat na tinatanggap ng mga lalake kumpara sa mga babae. Mapabahagi lang sa Women’s World Cup, bawat atleta ay bibigyan ng $30,000 (P1.68M) at tataas ito hanggang $270,000 (P15.1M) para sa mga kampeon.

Ibinalita din ni FIFA President Gianni Infantino na lumampas na sa isang milyong tiket ang naibenta para sa Women’s World Cup, ang unang beses na nangyari ito para sa kahit anong palaro na para sa kababaihan.

Azkals, masisilayan uli sa FIFA friendly sa RMSC

ni Anthony E. Servinio @Sports | June 1, 2023

Mapapanood muli ang Philippine Men’s Football National Team sa harap ng kanilang mga kababayan matapos itakda ng Philippine Football Federation (PFF) ang dalawang FIFA Friendly ngayong Hunyo sa Rizal Memorial Stadium. Haharapin ng Azkals ang hamon ng mga bisita Nepal sa Hunyo 15 at Chinese-Taipei sa Hunyo 19.

Paborito ang Azkals sa bisa ng kanilang mas mataas na FIFA Ranking na ika-136 kumpara sa Chinese-Taipei na ika-156 at Nepal na ika-174. Subalit nanatiling bilog ang bola.

Sa pitong tapatan buhat noong 2010, pantay ang Pilipinas at Chinese-Taipei na parehong may tig-dalawang panalo at tatlong tabla. Ang huli nilang pagkikita ay nagresulta sa 3-0 tagumpay ng Chinese-Taipei noong Disyembre 3, 2017 sa CTFA International Tournament.

Mula 2011 ay nagtala ng apat na magkasunod na tagumpay ang Azkals sa Nepal. Naputol lang ito ng isang 0-0 tabla sa huli nilang pagkikita noong Nobyembre 14, 2017 sa qualifier para sa 2019 AFC Asian Cup.

Mahalaga ang mga larong ito sa paghahanda ng Azkals para sa pinagsabay na qualifier para sa 2026 FIFA World Cup at 2027 AFC Asian Cup sa Nobyembre. Maaaring magkaroon ng iba pang mga Friendly sa Setyembre at Oktubre.

Samantala, sasabak ang Under-23 Azkals sa ASEAN Football Federation Under-23 Championship ngayong Agosto 17 hanggang 26 sa Thailand. Nabunot ang mga Pinoy sa Grupo C kasama ang Vietnam at Laos.

Puno ang kalendaryo at maglalaro din sila sa 2024 AFC Under-23 Asian Cup qualifier sa Setyembre 6 hanggang 12 sa Thailand muli. Lalabanan nila sa Grupo H ang Bangladesh, Malaysia at host Thailand na unang hakbang din patungo sa Paris 2024 Olympics.