Stallion Laguna pakay ang first win sa AFC Cup Round 2

ni Anthony E. Servinio @Sports | November 8, 2023

Laro ngayong Miyerkules – Binan Stadium

4 p.m. Stallion Laguna vs. Terennganu

Umaasa ang Stallion Laguna na ang paglalaro sa sariling tahanan na Binan Stadium ang magtutulak sa kanila sa unang panalo sa simula ng Round 2 ng 2023-2024 AFC Cup Group Stage. Haharapin nila muli ang Terengganu, ang parehong koponan na umukit ng 2-2 tabla noong kanilang unang pagkikita noong Oktubre 26 sa Malaysia, simula 4 p.m.

Umarangkada agad ang Stallion, 2-0, sa mga goal nina Griffin McDaniel (6’) at Junior Sam (41’). Biglang nakalusot ng isa si Sonny Norde upang lumapit bago magwakas ang first half at kinumpleto ng Adisak Kraisom ang pagbangon ng Terengganu sa panablang goal sa ika-91 at bago wakasan ng reperi ang laro.

Kahit mapait ang kinalabasan, nakita ng Stallion na kaya nilang sabayan ang beteranong kalaro. Ito ang unang sabak ng mga Pinoy sa prestihiyosong torneo habang ito na ang pangatlong beses na kasali ang Terengganu.

Kasalukuyang nasa ilalim ng Grupo G ang Stallion na may isang puntos mula isang tabla at dalawang talo. Numero uno ang Central Coast Mariners ng Australia na may 6 puntos at sinusundan ng Terengganu na may lima at Bali United ng Indonesia na may 4 na puntos.

Samantala, hahanapin ng Dynamic Herb Cebu ang ikalawang panalo sa Grupo F sa pagdalaw sa Shan United ngayong Huwebes. Nanalo ang Gentle Giants sa kampeon ng Myanmar National League, 1-0, noong Oktubre 26 din sa Rizal Memorial Stadium salamat sa goal ni Ken Murayama.

Hawak ng Phnom Penh Crown ng Cambodia ang liderato ng grupo na may malinis na 9 na puntos mula tatlong tagumpay. Pangalawa ang MacArthur FC ng Australia na may anim at Cebu na may tatlo habang 8 puntos ang Shan.

Nat'l Women's Booters binigo ang Iran, pero bitin sa Olympics

ni Anthony E. Servinio @Sports | November 3, 2023

Winakasan ng Philippine Women’s Football National Team ang kanilang kampanya patungong Paris 2024 Olympics sa 1-0 panalo kontra Iran Miyerkules sa Perth Rectangular Stadium ng Kanlurang Australia. Bitin ang tagumpay at hindi nakisama ang tadhana sa Filipinas matapos dumating ang resulta ng mga nalalabing laban.

Itinapik palayo ni Iran goalkeeper Zahra Khajavi ang bola patungo sa naghihintay na kapitana Tahnai Annis na hindi nag-aksaya ng panahon na malakas sipain ito pabalik para sa nag-iisang goal sa ika-19 minuto. Hindi nagawan ng solusyon ng Pilipinas ang mahigpit na depensa sa kanilang layunin na tambakan ang mga Iranian upang mabura ang epekto ng 0-8 talo sa host Australia noong Linggo.

Nakamit ng Australia ang isang tiket sa Round 3 matapos manaig sa Chinese-Taipei, 3-0, at maging numero uno sa Grupo A na may 9 na puntos at pangalawa ang mga Pinay na may anim. Lumaki ang pag-asa ng Filipinas nang magtabla ng 1-1 ang Timog Korea at Tsina at nagtapos na may 5 puntos lang ang mga Koreana sa Grupo B.

Dahil dito, nakasalalay ang tiket ng Filipinas sa huling laro ng torneo sa pagitan ng Uzbekistan at India sa Grupo C. Subalit madaling iniligpit ng mga Uzbek ang kalaban, 3-0, upang tumbasan ang anim na puntos ng mga Pinay at maagaw ang tiket dahil mas mataas ang kanilang kabuuang inilamang sa tatlong laro na +2 kumpara sa -4.

Ang Round 3 ay kabibilangan ng Australia, Japan, Hilagang Korea at Uzbekistan sa Pebrero, 2024. Magkakaroon ng dalawang hiwalay na serye na paramihan ng goal sa dalawang laro at ang dalawang magwawagi ay tutuloy sa Olympics.

Phl Football Women's balik training sa Cavite

ni Anthony E. Servinio @Sports | June 23, 2023

Magbabalik ang Philippine Football Federation (PFF) Women’s League ngayong Hunyo 24 sa PFF National Training Center sa Carmona, Cavite. Sampung koponan ang kalahok sa pangunguna ng defending champion De La Salle University.

Kinoronahan ang Lady Archers noong Pebrero, 2020 o ilang linggo bago ipinatupad ang lockdown bunga ng COVID-19 pandemya. Ito ang ikatlong tropeo ng koponan at sila ang nakakatikim ng kampeonato sa maikling kasaysayan ng liga.

Hahamunin ang DLSU ng UAAP Season 85 champion Far Eastern University, University of Santo Tomas at University of the Philippines at mga Women’s Team ng mga kasapi sa Philippines Football League na Kaya FC Iloilo at Stallion Laguna FC. Kinukumpleto ang listahan ng Azzurri SC, Manila Digger, Manila Nomads at Tuloy FC.

Para kay DLSU coach Alvin Ocampo, maagang paborito ang FEU, isang bagay na sinang-ayunan ng karamihan ng mga coach. Bilang paghahanda para sa pagbabalik, nagdaos ng PFF Women’s Cup noong nakaraang Nobyembre at Disyembre kung saan nag-kampeon ang Lady Tamaraws.

Naniniwala ang mga coach na sina Anto Gonzales ng UP at Ernie Nierras ng Stallion na mahalaga ang pagkakaroon ng liga para tuloy-tuloy ang tagumpay na natatamasa ng Philippine Women’s Football National Team na maglalaro sa 2023 FIFA Women’s World Cup sa susunod na buwan. Mas maraming kabataan ang naaakit na sumubok maging bahagi ng Filipinas at ang liga ang isang paraan patungo dito.

Nasa plano din ang PFF Women’s League na umangat patungo sa pagiging semi-professional at kung mararapatin ay isang ligang propesyunal gaya ng PFL. Dahil dito, may pagkakataon ipagpatuloy ng mga varsity ang kanilang karera matapos ang pag-aaral.

Samantala, lalahok ang bansa sa 2023 ASEAN Football Federation Under-19 Women’s Championship sa Palembang, Indonesia mula Hulyo 5 hanggang 15. Nabunot ang mga Pinay sa Grupo C kasama ang Thailand at Myanmar.