Pahirap nang pahirap ang laban ng Nat'l Booters Team

ni Anthony E. Servinio @Sports | June 6, 2024

Laro ngayong Huwebes – My Dinh Stadium, Hanoi

8 p.m. Pilipinas vs. Vietnam

Daraan sa lalong kumikitid na kalye ng Philippine Men’s Football National Team sa pangarap na mapabilang sa 2026 FIFA World Cup sa Hilagang Amerika. Hindi bababa sa panalo ang kailangan nila sa napakahalagang tapatan nila ngayong gabi kontra host Vietnam sa My Dinh Stadium sa Hanoi simula 8 p.m. 

Kasalukuyang may isang puntos lang ang mga Pinoy mula sa isang tabla at tatlong talo sa Grupo F. Kung magwawagi, maagaw nila ang pangatlong puwesto sa mga Vietnamese na may 3 puntos buhat sa isang panalo laban sa Pilipinas at tatlong talo. 

Binigo ng Vietnam ang Pilipinas, 2-0, noong Nob. 16 sa Rizal Memorial Stadium. Sina Nguyen Van Toan at Nguyen Dinh Bac ang naghatid ng mga goal. Pagkakataon din ito para kay Coach Tom Saintfiet na maitala ang  unang panalo matapos dumapa ng dalawang beses sa Iraq noong Marso, 1-0 sa Basra at 5-0 sa RMSC. Kailangan ding makisama ang numero uno at walang talong Iraq at talunin din nila ang pumapangalawang Indonesia sa kasabay na laro sa Jakarta. 

Samantala, nagwagi ang Italy Selection laban sa Philippine Under-19 Men’s Team sa penalty shootout, 5-3, para makuha ang Philippines-Italy Friendship Cup sa Rizal Memorial.  Nagtapos ang takdang 90 minuto sa 2-2 at imbes na maglaro ng karagdagang 30 minuto ay ginanap agad ang shootout. 

Naipilit ng Italy ang shootout nang ipasok ni Joaquin Antonio Collo ang bola sa ika-95 minuto matapos magkumpulan ang mga manlalaro sa harap ng goal. Nagpalitan ng maagang goal sina Ryen Co Lim ng U19 (4’) at Ramil Bation III ng Italy (18’) hanggang maagaw muli ng mga Pinoy ang 2-1 bentahe bago mag-halftime sa sipa ni Mark Christian Ricario (45’+1’). 

Kaya FC Iloilo numero uno vs. Digger sa PFL

ni Anthony E. Servinio @Sports | June 4, 2024

Numero uno sa ikalawang sunod na linggo ang defending champion Kaya FC Iloilo matapos daigin ang Manila Digger FC, 3-1, sa ika-9 na linggo ng 2024 Philippines Football League (PFL) sa Rizal Memorial Stadium. Sa Borromeo Sports Complex, nagtala ng mga bagong marka ang Dynamic Herb Cebu FC at dinurog ang bisitang Don Bosco Garelli United, 16-2, at ipakita na seryoso sila na maagaw ang korona. 

Pantay sa 1-1 ang Kaya at Digger sa first at binura ni Salifu Jatta (26’) ang naunang goal ni Jarvey Gayoso (18’). Kumilos ang Kaya sa second half at sumandal sa mga nagpapanalong goal nina Robert Lopez Mendy (55’) at Shuto Komaki (79’). 

Ibang klaseng opensa ang ibinuhos ng Gentle Giants at parehong may hat trick o tatlong goal sina Zamoranho Ho-A-Tham (35’, 78’ 80’) at Abou Sy (51’, 82’, 88’) habang brace o tig-dalawa sina Guytho Mijland (14’, 91’), Chima Uzoka (54’, 68’) at Rintaro Hama (66’, 73’).  Ito ang pinakamaraming goal sa isang laro at pinakamalaking inilamang ngayong taon. 

Humabol ang Davao Aguilas at nagwagi sa Loyola FC, 3-0, at kasabay nito ay tumabla sa Kaya na parehong may 22 puntos sa standing. Pangatlo ang Cebu na may 21 habang may 20 ang Stallion Laguna FC at 18 sa United City FC. Sinayang ng Stallion at United City ang pagkakataon na lumapit sa liderato at nakuntento sila sa 1-1 tabla.  

Samantala, magkakaroon ng exhibition match ang Philippine Men’s Under-19 laban sa mga kinatawan ng Italya – ang Philippines-Italy Friendship Cup 2024 – ngayong Martes simula 7:30 p.m. sa Rizal Memorial. Hatid ito ng Embahada ng Italya bilang bahagi ng pagdiriwang ng National Day at bukas sa publiko. 

Yokohama F Marinos sa 2-1 panalo ng AFC Cup Rnd 2

ni Anthony E. Servinio @Sports | November 9, 2023

Tatlong minuto na lang bago maitala ng Kaya FC Iloilo ang tabla ay naagaw ng bisitang Yokohama F Marinos ang 2-1 panalo sa simula ng Round 2 ng 2023-2024 AFC Champions League Martes. Ipinasok ni reserba Yan Matheus Souza ang bola sa ika-87 minuto at biglang tumahimik ang Rizal Memorial Stadium.

Kinuha ng Marinos ang pagkakataon na kulang ng isang tao ang Kaya matapos palabasin si Robert Lopez Mendy sa ika-85 matapos niyang patirin galing likod ang kanyang binabantayan. Pinanood muli ng reperi ang video bago patawan ng red card ang Kaya forward.

Nagawang pantayin sa 1-1 ng Kaya ang laban sa goal ng tubong Kanagawa, Japan Daizo Horikoshi sa ika-39. Nahanap ni Ricardo Sendra ang tumatakbong si Horikoshi na harapang isinipa ang bola kay goalkeeper Hiroki Iikura.

Nakaunang goal si Yuhi Murakami sa ika-26. Wagi din ang Marinos sa una nilang tapatan, 3-0, noong Oktubre 25 sa Nissan Stadium. Sa gitna ng pagkabigo, ipinagmamalaki pa rin ni Kaya coach Colum Curtis ang ipinakita ng koponan. Nakakahinayang lang at hindi inasahan ang red card kay Mendy.

Sa isa pang laro sa Grupo G, tinalo ng Shandong Taishan ang bisita Incheon United, 3-1. Bunga ng resulta, tabla ang Marinos at Shandong sa liderato na may 9 na puntos galing tatlong panalo at isang talo, pangatlo ang Incheon na may anim at walang puntos pa rin ang Kaya.

Susunod para sa Kaya ang pagdalaw sa Shandong sa Nobyembre 28. Tatapusin nila ang kampanya sa pagbisita ng Incheon sa Disyembre 13.