Ganado na ang U-23 Azkals, naisahan ang T. Leste sa SEAG

ni Anthony E. Servinio - @Sports | May 8, 2022

Tinambakan ng Pilipinas ang Timor Leste sa Men’s Football, 4-0, sa pagsisimula ng aksiyon sa 31st Southeast Asian Games Biyernes nang gabi mula sa Viet Tri Stadium sa Phu Tho, Vietnam. Dahil sa malaking panalo, todo-ganado na ang Azkals papasok sa mahalagang laban ngayong araw ng Lunes kontra sa host at defending champion Vietnam sa parehong palaruan, simula 8:00 ng gabi, oras sa Pilipinas.

Bitbit ang sariwang alaala ng mga hindi magandang resulta sa kanilang mga nakalipas na tapatan sa Timorese, naglaro nang agresibo ang Azkals at nagbunga ito ng maagang goal ni Christian Rontini sa ika-11 minuto. Tumanggap ng bola si Rontini mula sa free kick ni kapitan Stephan Schrock at inulo ito papasok sa goal.

Patuloy na pumukpok ang mga Filipino sa second half at dumating ang pangalawang goal, salamat kay Dennis Chung sa ika-56 minuto. Isa pang beterano na si Jovin Bedic ang nagparamdam at lalong pinalayo ang Azkals sa ika-78 minuto galing sa assist ni reserba Lance Ocampo.

Hindi pa kuntento ang Pilipinas at humirit ng pang-apat na goal si Oskari Kekkonen sa ika-81. Kahit lumalapit sa goal ay ipinasa pabalik ni Oliver Bias ang bola sa humahabol na si Kekkonen para sa malakas na sipa na hindi naharang ni goalkeeper Junildo Perreira.

Sa isa pang laro, nagwagi ang Vietnam sa 2019 silver medalist Indonesia, 3-0, sa likod ng mga goal sa second half nina Nguyen Tien Linh (55’), kapitan Do Hung Dung (74’) at Le Van Do (88’).

Pansamantalang hawak ng Pilipinas ang liderato sa Grupo A dahil mas marami silang goal kumpara sa Vietnam. Bago ang laro sa Timor Leste, mataas ang paniniwala ni Coach Norman Fegidero na may pag-asa na pumasok ang Azkals sa semifinals kung gagamiting batayan ang nakita niya sa kanilang ensayo at paano nabubuo ang samahan ng mga manlalaro.

Huling nakapasok sa semis ang Pilipinas sa semis noong 1991 SEA Games sa Rizal Memorial Stadium kung saan naglaro ang ngayon ay 52-anyos na si Fegidero.

PHL Football, sasalang na vs. Timor Leste sa SEAG

ni Anthony E. Servinio - @Sports | May 6, 2022

Unang sasalang sa aksiyon ang Pilipinas sa simula ng 31st Southeast Asian Games Men’s Football Tournament sa Viet Tri Stadium sa Phu Tho sa Vietnam. Haharapin ng Azkals ang hamon ng Timor Leste, isang koponan na nagbigay ng maraming magagandang laban sa mga nakalipas na taon, simula 4:00 p.m.

Pangungunahan ang atake ng Azkals ng beteranong si Stephan Schrock na magbabalik para sa ikalawang sunod na SEAG. Kasama niya sina Jovin Bedic ng Kaya FC Iloilo at Enrique Linares bilang pinapayagang tatlong manlalaro na lampas sa itinakdang edad na 23.

Karamihan sa mga kasapi ng pambansang koponan ay naglalaro para sa Azkals Development Team sa Philippines Football League (PFL) sa gabay ni Coach Norman Fegidero. Mula sa ADT ay nariyan sina Oliver Bias, Scott Woods, Dennis Chung, Jayve Kallukaran, Jaime Rosquillo, Francis Tacardon, Martini Rey, Jermi Darapang, Lance Ocampo at mga goalkeeper Quincy Kammeraad at Enrico Mangaoang.

Kinuha mula sa iba pang koponan sa PFL sina Oskari Kekkonen at Sandro Reyes ng Kaya at Jacob Pena ng Stallion Laguna FC. Magbabalik din sa Azkals sina Yrick Gallantes, Christian Rontini at Miguel Mendoza matapos lumiban sa mga nakalipas na ilang torneo.

Sa huli nilang pagtatagpo sa 2022 AFF Under-23 Championships sa Cambodia noong Pebrero, nagtapos ang Azkals at East Timor sa 2-2 tabla. Asahan na magbabago ang timpla ng laro ngayon at nandiyan na sina Schrock, Linares at Bedic upang palakasin ang opensa.

Samantala, inilabas din ang opisyal na listahan ng Women’s Team na isa sa mga maagang paborito para sa gintong medalya. Kabilang dito ang mga beterana ng 2022 AFC Women’s Asian Cup India na sina kapitana Tahnai Annis, bise-kapitana Hali Long, Sarina Bolden, Quinley Quezada, Camille Rodriguez, Dominique Randle, Inna Palacios, Jessica Miclat, Olivia McDaniel, Eva Madarang, Sofia Harrison, Carleigh Frilles, Isabella Flanigan, Malea Cesar, Anicka Castaneda, Ryley Bugay at mga idinagdag na sina Alisha del Campo, Kaya Hawkinson, Jaclyn Sawicki at Chantelle Maniti.

Herb Cebu FC, sakalam vs. FC 1991 sa Copa Cup

ni Anthony E. Servinio - @Sports | May 4, 2022

Dumurugo at balot ng benda ang ulo, nagtala ng dalawang goal sa second half si forward Arda Cinkir upang itulak ang Dynamic Herb Cebu FC sa 3-1 panalo laban sa Mendiola FC 1991 sa pagpapatuloy ng 2022 Copa Paulino Alcantara, Lunes nang gabi sa PFF National Training Center sa Carmona, Cavite. Sa unang laro, literal na naging bakbakan ang 3-2 tagumpay ng defending champion Kaya FC Iloilo sa Stallion Laguna FC.

Nag-umpugan ang mga ulo nina Cinkir at Alassane Wade ng Mendiola sa ika-49 minuto kaya napilitan silang umupo upang lapatan ng lunas. Bumalik agad si Cinkir at ipinasok ang nagpatablang goal gamit ang ulo sa ika-58 at ang nagpalamang ng goal sa ika-73 minuto.

Nagdagdag ng isa pang goal sa ika-93 minuto si midfielder Mert Altinoz upang mabuo ang tagumpay. Nakaunang goal ang Mendiola matapos ang penalty kick ni Hamed Hajimedhi sa ika-42 minuto subalit hindi ito tumagal at mas mabagsik na Dynamic Herb ang lumabas para sa second half.

Namayani ang beteranong si Jhan Melliza sa first half kung saan pinasahan niya sina Carlyle Mitchell at Shirmar Felongco para sa mga goal sa ika-10 at ika-19 na minuto. Matapos tulungan ang iba, tinulungan ni Melliza ang sarili at sumipa ng isa pang goal sa ika-28 minuto para sa 3-0 lamang.

Dahil sa panalo ng Dynamic Herb, tumalon sila sa ikalawang puwesto na may perpektong siyam na puntos buhat sa tatlong tagumpay. Haharapin nila ang mga Cebuano sa kanilang nalalabing laro sa Mayo 12, ang huling araw ng elimination bago ang semis sa Mayo 16 at finals sa Mayo 22.