Isang turok lang Sputnik Light COVID-19 vaccine, binigyan ng EUA ng FDA

ni Lolet Abania | August 23, 2021

Ipinahayag ni Vaccine Czar Carlito Galvez ngayong Lunes na ang Food and Drug Administration (FDA) ay nag-isyu ng emergency use authorization (EUA) para sa single-dose Sputnik Light COVID-19 vaccine.

“The FDA has approved EUA for Sputnik V na one dose na siya. We have 10 million doses, so 10 million na tao ang makikinabang,” ani Galvez.

“Full protection na itong Sputnik Light, like Johnson and Johnson na single dose,” dagdag ni Galvez.

Ayon sa Russian Direct Investment Fund (RDIF), lumabas na ang Sputnik Light ay may 79.4 percent efficacy rate kumpara sa 91.6 percent para sa two-shot ng Sputnik V. Samantala, tinatayang nasa 13 milyong Pilipino na ang fully vaccinated laban sa COVID-19 sa ngayon, habang target ng gobyerno na makapagbakuna ng 76.3 milyon sa katapusan ng taon upang makamit ang herd immunity ng bansa.

Pagbabakuna sa menor de edad, aprub kay Duque

ni Ronalyn Seminiano Reonico | August 10, 2021

Suportado ni Department of Health (DOH) Secretary Francisco Duque III ang pagbabakuna sa mga menor de edad laban sa COVID-19 kung mayroon umanong sapat na suplay ang bansa.

Aniya, pinag-aaralan na ng Vaccine Expert Panel at All Experts Group ng DOH ang naturang hakbang sa pagbabakuna sa mga kabataan.

Ani Duque sa isang panayam, “Supply permitting, I wouldn’t mind that we should already start vaccinating children for as long as, first, we prioritize which among the children, those with comorbidities, of course let’s vaccinate them.”

Samantala, kamakailan ay sinabi ng vaccine czar na si Secretary Carlito Galvez, Jr. na ang pagbabakuna sa mga edad 12 hanggang 17 ay posibleng masimulan na sa Setyembre o Oktubre, depende sa suplay ng bakuna.

Ayon naman sa Food and Drug Administration (FDA), kung isasama sa vaccination program ng pamahalaan ang mga menor de edad, madaragdagan ng 12 million hanggang 14 million ang mga kakailanganing mabakunahan kontra COVID-19.

Samantala, noong Lunes, ayon sa DOH, umabot na sa 13,087,781 ang mga nakatanggap na ng unang dose ng bakuna habang 11,391,969 naman ang fully vaccinated na laban sa COVID-19.

14 M doses ang kailangan… Pfizer, aprub na bakuna para sa mga edad na 12-17

ni Lolet Abania | August 9, 2021

Kakailanganin pa ng karagdagang 12 hanggang 14 milyon COVID-19 vaccines kapag pinayagan na ng gobyerno ang pagbabakuna sa mga kabataan na nasa edad 17 at pababa, ayon sa Food and Drug Administration (FDA).

Ito ang naging tugon ni FDA Director General Eric Domingo matapos ang limang buwan nang simulan ng pamahalaan ang COVID-19 vaccination program at ang pag-apruba ng FDA sa Pfizer-BioNtech lamang na i-administer sa mga batang nasa edad 12 hanggang 17.

“If we are going to include those 12 to 17 years old [in our vaccination program], that would mean additional 12 to 14 million [people to be vaccinated],” ani Domingo sa Laging Handa briefing ngayong Lunes.

“Rest assured that like the vaccine approved for adults, we will not be giving these to children unless it is safe and effective,” dagdag ni Domingo.

Ayon sa opisyal, ang Sinovac vaccine na gawa ng China ay nag-apply na ng emergency use authorization (EUA) sa FDA para sa paggamit ng kanilang bakuna kontra-COVID-19 sa mga kabataang nasa edad 3 hanggang 17, subalit nasa proseso pa ng evaluation ng Vaccine Expert Panel (VEP) ng bansa.

Gayundin, sinabi ni Domingo na ang EUA application naman ng Novavax para sa kanilang COVID-19 vaccine ay pagdedesisyunan pa ng ahensiya sa loob ng 21 araw.

“As long as they already submitted all the requirements, it (approval) should not be a problem,” saad ni Domingo.

Target ng gobyerno na mabakunahan ang 76.3 milyong indibidwal sa katapusan ng taon upang makamit ang herd immunity laban sa COVID-19, subalit sa nasabing bilang ay hindi nakasama ang mga kabataang nasa edad 17 at pababa.

Binanggit din ni vaccine czar Carlito Galvez, Jr. na ang kasalukuyang supply ng COVID-19 vaccine sa bansa ay kulang pa ng tinatayang 42 milyong doses.