3.5 M doses ng Sinovac COVID-19 vaccines, nasa ‘Pinas na

ni Mary Gutierrez Almirañez | April 29, 2021

Dumating na sa ‘Pinas ang karagdagang 500,000 doses ng Sinovac COVID-19 vaccines na inihatid ng isang chartered flight ng Cebu Pacific galing Beijing, China ngayong umaga, Abril 29.

Sa kabuuang bilang ay 3,500,000 doses ng Sinovac na ang nakarating sa bansa, kabilang ang 1 milyong donasyon ng Chinese government.

Ito ang ika-6 na batch na dumating mula sa China at katulad ng ibang bakuna ay iiimbak ito sa cold storage facility ng Marikina City.

Batay pa sa evaluation ng Food and Drug Administration (FDA), ang naturang bakuna ay nagtataglay ng 65% hanggang 91% na efficacy rate sa mga healthy individual na edad 18 hanggang 59-anyos, habang 50.4% naman ang bisa nito sa health workers, at mahigit 52% sa mga senior citizen na edad 60 pataas.

Kaugnay nito, inaasahan namang darating din ngayong araw ang 480,000 doses ng Sputnik V galing Russia, kung saan dalawang araw nang naudlot ang initial 15,000 doses nito dahil sa ‘logistic concerns”.

Sa ngayon ay 4,025,600 doses ng COVID-19 vaccines na ang nakarating sa bansa, kabilang ang 525,600 doses ng AstraZeneca mula sa COVAX facility.

Samantala, tinatayang 1,809,801 indibidwal na ang mga nabakunahan kontra-COVID-19, kung saan 246,986 ang mga nakakumpleto sa dalawang dose at 1,562,815 naman para sa unang dose.

Ivermectin, pinayagan nang gamitin ng 5 ospital

ni Mary Gutierrez Almirañez | April 27, 2021

Limang ospital na ang inaprubahan para sa compassionate special permit (CSP) ng Ivermectin, ayon kay Food and Drug Administration (FDA) Director General Eric Domingo ngayong umaga, Abril 27.

Aniya, “On those grounds, we grant it because we do accept that it is an investigational drug for COVID-19.”

Nilinaw pa ni Domingo na kasama sa mga hinihinging requirements sa CSP ay ang pangalan ng licensed importer at ang proof of registration ng Ivermectin mula sa pinanggalingan nitong bansa.

Nauna na ring sinabi ng FDA at Department of Health (DOH) na huhulihin nila ang mga illegal distributors ng Ivermectin at ang mga magtatangkang gumamit nito na walang CSP sa kasong paglabag sa Republic Act 9711 o The FDA Act of 2009.

Kaugnay nito, nakatakdang magsimula ang clinical trial test ng Ivermectin sa katapusan ng Mayo upang mapag-aralan ang efficacy nito laban sa COVID-19. Gayunman, tiniyak ni Domingo ang kaligtasan ng mga indibidwal na sasalang sa test at sinigurado niyang magiging epetikbo ang pagsasagawa nito sa tao, sa kabila ng pagiging isang veterinary product.

“I hardly sleep looking to make this product available safely. Meron talagang minimum requirements for safety and quality na hindi puwedeng i-let go. Once these are met, we will make sure the proper, good quality drugs are available to people. We are one in wanting to have medicines available to everybody," sabi pa niya.

Moderna, oks na sa 'Pinas

ni Ronalyn Seminiano Reonico | April 26, 2021

Nagsumite na ng aplikasyon para sa emergency use authorization (EUA) ng COVID-19 vaccine sa Pilipinas ang Moderna Inc., ayon kay Food and Drug Administration (FDA) Chief Rolando Enrique Domingo.

Aabot sa 13 million doses ng Moderna COVID-19 vaccines ang bibilhin ng pamahalaan habang 7 million doses naman ang nakatakdang bilhin ng pampribadong sector ng bansa.

Sa Mayo inaasahang darating sa Pilipinas ang 194,000 doses ng Moderna at 1 million naman sa July.

Ang mga COVID-19 vaccines na nabigyan na ng EUA ng FDA ay ang Pfizer, AstraZeneca, Sinovac, Gamaleya, at Johnson and Johnson.

Samantala, umabot na sa 1.7 million doses ng Sinovac at AstraZeneca COVID-19 vaccines ang naipamahagi ng pamahalaan sa mga vaccination sites simula noong Marso 1.