2 bumbero, sugatan, P5 M napinsala sa sunog sa Kyusi

ni Mary Gutierrez Almirañez | February 25, 2021

Dalawang bumbero ang sugatan sa pagresponde sa nasunog na warehouse sa Tandang Sora, Ave. Barangay Sangandaan, Quezon City pasado alas-11 nang gabi nu'ng Miyerkules, Pebrero 24.

Ayon sa Bureau of Fire Protection (BFP), umabot sa ika-limang alarma ang sunog at sa sobrang laki ng apoy ay tinatayang dalawampung fire trucks ang kinailangang rumesponde dahil sa kakulangan ng suplay ng tubig at maging ang isang trak ng bumbero ay inabot pa ng apoy ang bahagi ng windshield at side mirror.

Idineklarang fire under control ang sunog matapos ang anim na oras, kung saan mahigit P5 million ang halaga ng mga napinsala.

Maliban sa minor injury na tinamo ng dalawang bumbero ay wala namang residenteng naiulat na nasugatan. Sa paghupa ng apoy ay iba’t ibang grocery items ang na-recover sa warehouse na umano’y dahilan kung bakit mabilis kumalat ang apoy.

Sa ngayon ay inaalam pa ng pulisya ang totoong dahilan ng insidente. Samantala, pansamantala namang tumuloy sa evacuation center ang mga residenteng nakatira malapit sa bodega bitbit ang mga mahahalagang gamit at dokumento.

P5 milyong halaga ng pinsala... 10 establisimyento, 1 bahay natupok; 1 nasugatan

ni Lolet Abania | February 21, 2021

Umabot sa 10 establisimyento at isang bahay ang natupok ng apoy sa bayan ng Antique madaling-araw ngayong Linggo.

Batay sa ulat ng Patnongon Fire Station (PFS), alas-2:00 ng madaling-araw nang sumiklab ang sunog sa mga commercial establishment at isang bahay sa Patnongon, Antique.

Ayon kay SFO2 Jose Talidong, officer-in-charge ng PFS, mabilis na kumalat ang apoy dahil dikit-dikit ang mga istruktura ng mga gusali at nadamay pa ang isang tirahan.

May isa namang nagtamo ng 1st degree burn dahil tumulong ito sa pag-apula ng apoy.

Gayunman, agad siyang ginamot ng mga emergency responder kaya maayos na ang kanyang kondisyon. Hindi naman binanggit ang pagkakakilanlan nito.

Tinatayang nasa P5 milyon ang halaga ng pinsala matapos ang sunog. Inaalam na rin ng mga awtoridad ang naging sanhi at pinagmulan ng nasabing sunog.

Tatay at 4 pa na edad 3, 8, 10 at 12, patay sa sunog

ni Ronalyn Seminiano Reonico | February 21, 2021

Patay ang limang katao kabilang ang 4 na menor-de-edad sa naganap na sunog sa Parola Compound, Tondo, Manila kagabi. Kinilala ng awtoridad ang mga nasawing sina Jake Loyola, 37, at kanyang mga anak na edad 3 at 8.

Binawian din ng buhay ang dalawang iba pa na nasa edad 10 at 12 sa insidente. Umabot sa first alarm ang sunog bandang alas-11:53 PM at itinaas sa second alarm nang hatinggabi.

Pitong minuto ang nakalipas nang umabot ito sa 3rd alarm. Bandang 1:49 AM ng Linggo nang umabot na ito sa 4th alarm at idineklarang under control kaninang 5:04 AM lang.

Nahirapan umano ang mga bumbero sa pag-apula ng apoy dahil sa masikip na eskinita patungo sa compound at sinabayan pa ng malakas na hangin na nagpalakas sa sunog.

Ayon din kay Manila Police District Police Station 12 Chief Police Lieutenant Cenon Vargas, may mga residenteng nang-agaw ng hose sa mga bumbero upang masigurong ang bahay nila ang unang maisasalba sa apoy.

Aniya, "May napaulat na may ilang residente na nang-aagaw ng hose para ipang-apula sa apoy." Tinatayang aabot sa 300 kabahayan at 600 pamilya ang naapektuhan ng naganap na sunog.

Aabot din umano sa P3 million ang pinsalang naidulot nito. Kasalukuyan pa ring nagsasagawa ng imbestigasyon ang awtoridad upang malaman ang sanhi ng sunog.