Mga estudyante edad 7 at 16… 18 patay, 16 sugatan sa sunog sa iskul sa China

ni Lolet Abania | June 25, 2021

Nasa 18 katao ang nasawi habang 16 ang nasugatan matapos ang sunog sa isang martial arts school sa central China ngayong Biyernes nang umaga.

Batay sa report ng local media, karamihan sa mga biktima ay mga boarding students na nasa edad 7 at 16.

Agad namang naapula ang apoy habang iniimbestigahan na ng mga awtoridad ang sanhi ng sunog, ayon sa pahayag ng Zhecheng county government.

Sa ulat ng Beijing Toutiao News base sa lokal na gobyerno, mayroong 34 estudyanteng naka-board sa loob ng nasabing eskuwelahan nang sumiklab ang apoy.

Bukod sa 18 nasawi, may 16 pa na nasugatan, kung saan apat sa kanila ang nagtamo ng matinding pinsala sa katawan ngunit agad namang naisugod sa ospital. Ayon sa doktor sa local media, “We’re doing everything we could to save them.”

20 bahay, nasunog dahil sa away-pamilya

ni Lolet Abania | June 7, 2021

Tinatayang 15 hanggang 20 pamilya ang nawalan ng bahay matapos ang sunog sa isang residential area na malapit sa Ninoy Aquino International Airport (NAIA) Terminal 1 sa Pasay City ngayong Lunes.

Sumiklab ang apoy bandang ala-una ng madaling-araw nitong Lunes, kung saan nasa 5 hanggang 7 kabahayan sa Barangay 194, Pasay City ang natupok.

Ayon kay Kagawad Ricardo Kano Perez, inaalam pa nila ang sanhi at pinagmulan ng sunog subalit may hinala silang ito ay dahil sa away-pamilya sa isang tirahan.

Patuloy na iniimbestigahan ng mga awtoridad ang sanhi ng sunog na umabot sa ikalawang alarma.

Nasa P300,000 ang halaga ng natupok na ari-arian, habang wala namang nasaktan sa nasabing sunog.

Bus sinilaban ng pasahero, 3 patay, 4 sugatan

ni Ronalyn Seminiano Reonico | June 3, 2021

Tatlo ang patay at apat ang sugatan matapos silaban ng isang pasahero ang bus habang binabaybay ang Mlang sa Cotabato ngayong Huwebes, bandang alas-4 nang hapon.

Ayon kay Mlang Disaster Risk Reduction and Management Officer Bernardo Tayong, hindi pa nakikilala ang tatlong pasaherong nasawi sa insidente.

Aniya pa sa isang radio interview, “They were trapped.”

Ayon sa awtoridad, pagmamay-ari ng Yellow Bus Lines (YBL) ang naturang bus at habang nasa biyahe patungong Tacurong City, Sultan Kudarat, nagbuhos umano ng gasolina ang isang pasahero sa sahig at sinilaban ito gamit ang disposable lighter at kaagad tumalon sa pinto.

Nagtamo naman ng serious burns ang apat pang pasahero na isinugod sa ospital ng mga rumesponde.

Samantala, nagsasagawa na ng imbestigasyon ang awtoridad sa insidente.

Hindi pa rin malinaw sa ngayon kung nahuli na ang suspek.