Aasenso ang OFWs kung magiging wais sa pagnenegosyo

ni Fely Ng - @Bulgarific | October 20, 2022

Hello, Bulgarians! Habang lubhang naaapektuhan ng piso ang paggastos ng mga mamimili, naniniwala si Go Negosyo founder Joey Concepcion na may kaakibat itong positibong epekto na magtataguyod sa paglago ng ekonomiya at paglikha ng trabaho sa Pilipinas.

“Nakikita ng OFWs ang 12 hanggang 13 porsyentong dagdag sa bawat dolyar na kanilang naiipon,” wika niya sa Laging Handa Public Briefing, kamakailan. Bukod sa pagpapagaan ng remittance sa hagupit ng malakas na dolyar, maaaring mapakinabangan ang mas mataas na kita para maabot ang pangmatagalang kaunlaran kung mamumuhunan ang Overseas Filipino Workers (OFWs) sa bansa at maging entrepreneurs.

“Malaki ang kontribusyon dahil marami tayong OFWs,” wika niya. “Tumataas ang kanilang kita pagdating sa piso, subalit dapat maging wais sila sa paggastos at pamumunuhunan,” dagdag pa niya. “Umaasa ako na mayroong sapat na ipon ang ating OFWs para sila’y makabalik at magsimula ng maliit na negosyo upang hindi na sila habambuhay na magtrabaho nang malayo sa kanilang tahanan,” aniya.

Sinabi pa ni Concepcion, na siya ring nangunguna sa Jobs group ng Private Sector Advisory Council, na dapat hikayatin ang mga OFW na maging entrepreneurs dahil magreresulta ito sa mas maraming trabaho para sa mga Pilipino, lalo na sa mga lalawigan. Pinadali rin ng gobyerno at pribadong sektor para sa OFWs na maging entrepreneurs sa pamamagitan ng pagtuturo sa kanila. Ibinahagi ni Concepcion na ngayong ika-3 ng Disyembre, magsasagawa ang non-profit na Go Negosyo ng OFW Summit na nakatuon sa pagtuturo sa mga OFW ukol sa entrepreneurship.

Nakatuon naman ang isa pang event sa ika-24 ng Oktubre, ang Digital SignUp Now, sa digitalization bilang isa pang paraan para maging mas madali para sa MSMEs na makipagsabayan kahit sa malalaking brand. “Nakakapasok ang malalaking kompanya sa mga supermarkets at malls, ngunit may katumbas na halaga ang pagpasok,” wika ni Concepcion. “Sa tulong ng digitalization, ito’y libre lahat, ngunit dapat alam mo kung paano ilalagay ang inyong produkto sa mga platform na ito at maibenta sila nang tama,” dugtong pa niya.

Aniya, ginagawa ng pribadong sektor na maging pabor sa MSMEs ang mga kondisyon, tulad ng pakikipagtrabaho sa pamahalaan para makakuha ng bivalent vaccines upang mapigil ang anumang pagkaaantala ng ekonomiya. Nag-iimbak naman ng mga produkto ang mga manufacturing company para matiyak na sapat ang supply ng mahahalagang bilihin tulad ng asukal at harina sa kabuuan ng panahon ng Kapaskuhan hanggang sa unang bahagi ng 2023. Ipinaliwanag ni Concepcion na mahalaga na maging aktibo ang ekonomiya sa ikaapat na bahagi ng taon para sa mga negosyo dahil kinakatawan nito ang rurok ng paggastos ng mga mamimili.

“Umaasa tayong maganda ang magiging benta ng MSMEs at magkakaroon sila ng sapat na kapital para makatawid sa 2023,” wika pa niya.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

PHLPost at UBX, joint forces para sa modernisasyon ng postal service

ni Fely Ng - @Bulgarific | September 20, 2022

Hello, Bulgarians! Bilang pangunahing ahensya ng koreo sa bansa, ang Philippine Postal Corporation (PHLPost) ay nakipagtulungan sa UBX Philippines, ang nangungunang open finance platform sa bansa, sa pamamagitan ng digital transformation at modernization program nito, upang tulungan ang postal service na makamit ang layunin nito, hindi lamang sa postal na pangangailangan ng mga Pilipino, ngunit upang i-maximize rin ang kakayahan nito para matiyak na walang maiiwan sa kanilang paglipat sa digital age.

Ang PHLPost ay digital na magbabago sa 13 post office nito sa Tuguegarao City; Lalawigan ng Sorsogon; Iloilo City; Zamboanga City; Lungsod ng Maynila; Taguig City; Makati City; Quezon City; San Francisco, Cebu; Davao City; Ilocos Norte; Tacloban, Leyte; at Marawi City, sa ilalim ng Project Kasama Lahat, isasaayos ang mga opisina upang maging modern hub na nag-aalok ng mga pinansyal at data services sa kanilang lokalidad na inaasahang matatapos sa loob ng tatlong buwan.

"The Post Office has introduced the "Kasama Lahat" project that aims to digitally transform post offices into financial hubs to promote financial and social inclusion. "PHLPost will transform their post office branches in the country into financial services hubs to promote financial and social inclusion, especially in far-flung areas. UBX and PHLPost are now identifying each office's specific needs and will tailor the solutions to be deployed based on their requirements", sabi ni Postmaster General Norman Fulgencio.

Sa ilalim ng partnership, ibibigay ng UBX ang mga kinakailangang teknolohiya sa digital at open finance para mapabilis ang digital transformation journey ng PHLPost sa 4,000 outlet at 3,500 kartero sa buong bansa, upang magbigay sa mga customer ng mga kinakailangang serbisyong pinansyal, tulad ng mga disbursement, fund transfers, cash withdrawals, loan applications, payments, insurance, at collections at iba pa. Layunin ding i-convert ang bawat outpost sa buong bansa sa isang one stop shop para sa malalayong lugar.

"As firm believers of inclusivity, it is highly important for us to identify which areas have the strongest demand for the services which Kasama Lahat has to offer. We responded to the particular needs of each of these high impact areas to ensure that the project achieves its goal of fostering financial and social inclusion for all," pahayag ni UBX President and CEO John Januszczak.

Babaguhin ng proyekto ang PHLPost sa pamamagitan ng paglikha at pagbabago ng mga produkto at serbisyo upang matugunan ang kanilang mga kailangan, paglipat ng ahensya sa isang napapanatiling kultura ng negosyo, pagrepaso at pagmumungkahi ng mga pagbabago sa charter ng ahensya o Republic Act No. 7354.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Satisfaction rating ng PhilHealth, pumalo sa 90.19%

ni Fely Ng - @Bulgarific | June 11, 2022

Hello, Bulgarians! Nakakuha ng 90.19 net satisfaction rating ang PhilHealth sa isinagawang survey ng NovoTrends PH, Inc., noong Disyembre 2021. Ang nasabing survey ay nilahukan ng 5,000 kliyente na binubuo ng mga miyembro, employer, health care institutions (HCI) representatives at professionals na bumisita sa mga Local Health Insurance Office ng PhilHealth sa buong bansa.

Pinakamataas na rating ang ibinigay ng mga employers na 90.26%. Sinundan ito ng 90.19% mula sa individual members, 77.14% mula sa mga ospital at 83.63% mula sa health care professionals.

Ang kabuuang resulta ng survey, na katumbas ay “excellent” ay nagpakita ng malaking pag-angat sa satisfaction rating ng PhilHealth mula sa 87.7% noong taong 2020. Kinumpirma ng report ang kahusayan sa serbisyo kung saan tatlo sa apat na individual members ang nagbigay ng “very satisfied” na marka. Isa sa kadahilanang nabanggit ay ang agarang pagbabawas ng kanilang benepisyo sa kabuuang bill bago sila lumabas ng ospital. Ipinahayag din nila ang kasiyahan sa pakikipag-transaksyon sa mga tanggapan ng PhilHealth.

Nabanggit din sa nasabing survey na 7 sa 10 employer ang “very satisfied” sa benepisyo at serbisyo ng PhilHealth. Ayon sa kanila, “organisado at maganda at may respeto ang pakikitungo sa kanila” ng mga empleyado ng PhilHealth. Kasama rin sa mataas na marka ang benepisyo at serbisyo ng PhilHealth. Anang employer representatives, pinanatili ng PhilHealth ang magandang relasyon sa pamamagitan ng pagtawag sa telepono at pagbisita sa kanilang mga tanggapan para sa maayos na pagsusumite ng mga dokumento at pagre-remit ng kontribusyon.

Nagbigay din ng “satisfied” ratings ang mga representative ng mga ospital at pasilidad para sa mga empleyado ng PhilHealth na “may kaalaman sa kanilang trabaho at madaling lapitan”. Binanggit din na sa mga nakalipas na taon, ang PhilHealth ay agresibo sa pagbibigay ng impormasyon tungkol sa mga ipinatutupad na polisiya. Nauunawaan din nila ang pagbagal sa pagbabayad ng claims noong 2021 dahil sa sitwasyong kinahaharap ng PhilHealth. Idinagdag pa ng mga respondent na kapansin-pansin ang kagalingan at positibong ugali ng mga empleyado ng PhilHealth.

Ayon naman sa mga healthcare professional, “secured” ang pagkuha nila ng professional fees at palaging nagbibigay ang PhilHealth ng detalyadong impormasyon tungkol sa benepisyo. Matulungin din ang mga empleyado ayon sa kanila.

Samantala, ang pangunahing pinagmumulan ng impormasyon sa PhilHealth ng indibidwal na miyembro ay ang information desk sa mga Local Health Insurance Office, samantalang PhilHealth website naman ang binibisita ng mga representatives ng mga pasilidad. Ang PhilHealth Facebook page na @PhilHealthOfficial naman ang pinaka-popular na social media application na kanilang source ng impormasyon.

“Kami ay natutuwas sa resulta ng survey na ito. Layunin naming mapanatili mas mapataas ito sa mga susunod na taon upang mas maging karapat-dapat kami sa tiwalang ipinagkakaoob ng mga Filipino tungo sa pagtupad ng Universal Health Care,” pahayag ni Atty. Dante A. Gierran, Pangulo at Punong Tagapagpatupad ng PhilHealth.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.