Mga Pinoy hindi pa handa sa pederalismo — P-Duterte

ni Jasmin Joy Evangelista | February 26, 2022

Sinabi ni Pangulong Rodrigo Duterte na hindi pa handa ang mga Pilipino sa federal form ng gobyerno at ito umano ang dahilan kung bakit hindi ito naipatupad sa kanyang termino.

Sa one-on-one interview kay Presidential Communications Operations Office Secretary Martin Andanar na inere nitong Biyernes, ipinaliwanag ni Duterte na siya ay nakipag-ugnayan sa local executives hinggil sa pagpapatupad ng pederalismo.

Gayunman, hindi ito tinanggap ng mga tao.

“Akala siguro nila yung nag-aadvocate ng federalism na wala akong ginawa. Alam niyo nagkamali kayo. Every now and then I called the mayors, noon pa nung umpisa, magpunta ako kinakausap ko yung mga tao,” ani Duterte.

Itinulak ni Duterte ang pederalismo bilang paraan upang matugunan ang national economic at power imbalances.

Sa ilalim ng proposed shift, mahahati ang bansa sa mga estado na bubuuin mula sa mga rehiyon.

“They are not enamored because there are many forms of parliament. Pagdyan mo inaano ang mga tao hindi talaga nakakaintindi. Hindi kami nagkulang. Honestly as I can be, hindi talaga tanggapin ng tao,” pahayag pa ni Duterte.

“Ayaw talaga, so hindi na lang rin ako, sinabi ko sa kanila, ayaw ng tao. Natakot sila na may more expanded powers,” dagdag niya.

Matatandaang sinabi ng pangulo na nag-eempake na siya ng mga gamit sa Malacañang dahil papalapit na ang pagtatapos ng kanyang termino.

Matatapos ang kanyang termino sa Hunyo 30, 2022.

P-Duterte, nagpatulong kay Misuari para sa pederalismo

ni Lolet Abania | January 6, 2021

Nagkaharap kahapon sina Pangulong Rodrigo Duterte at Moro National Liberation Front (MNLF) Founding Chairman Nur Misuari sa Davao City.

Bukod kina Pangulong Duterte at Misuari, naroon din sa naganap na pag-uusap ang asawa ng MNLF leader na si Tarhata at si Senator Christopher “Bong” Go.

“Meron siyang mga concerns sa Tawi-Tawi and the President promised to take it up sa Cabinet,” sabi ni Go. Ayon naman kay Presidential Spokesperson Harry Roque, hindi siya binigyan ng basbas para idetalye ang naging pagpupulong nina P-Duterte at Misuari.

Gayunman, maglalabas ng statement ang Malacañang tungkol sa nangyaring talakayan. Matatandaang maraming beses na ring nag-usap sina P-Duterte at Misuari tungkol sa mga isyu ng pangkapayapaan sa Mindanao.

Hiningi rin ng pangulo ang tulong ni Misuari para hikayatin ang mga Moro na miyembro ng Kongreso na makiisa sa panukala na isulong ang pederalismo sa bansa.

Noong Disyembre, 2019, itinalaga ni Pangulong Duterte si Misuari bilang Special Economic Envoy on Islamic Affairs sa Organization of Islamic Cooperation (OIC).