Para sa edad 5-11... Pfizer, nagsumite na ng EUA sa FDA

ni Lolet Abania | December 12, 2021

Nagsumite na ang Pfizer noong nakaraang linggo ng aplikasyon para sa emergency use authorization (EUA) ng kanilang COVID-19 vaccine para sa mga batang edad 5 hanggang 11.

“Sa ngayon meron tayong application galing sa Pfizer for 5-11 years old. Sinubmit nila ito last week,” ani Food and Drug Administration Director General Eric Domingo sa isang radio interview ngayong Linggo.

“Ito ang ine-evaluate ngayon ng ating vaccine experts,” saad ng opisyal.

“So may possibility na baka mabigyan ng EUA before the end of the year,” sabi pa ni Domingo.

Plano ng gobyerno na palawakin ang pediatric vaccination kontra-COVID-19 sa mga batang edad 5 hanggang 11sa Enero 2022.

Sinabi naman ng FDA chief na ang Moderna ay hindi pa nakapag-apply ng kanilang EUA ng COVID-19 vaccine na magagamit para sa mga batang edad 5 hanggang 11.

"Sa ngayon wala pa tayong natatanggap na application from Moderna. Hindi pa sila nagbibigay ng clinical trial data nila on children below 12,” wika ni Domingo.

“Hanggang 12 years old pa lang ang sinubmit nila sa atin. Hindi pa natin mabibigyan ng permit ‘yan for use in children below 11 years old,” ani opisyal.

Ang Pfizer COVID-19 vaccine ay inaprubahan nang gamitin para sa edad 5 hanggang 11 sa mga bansang gaya ng US, Canada, Europe, and Australia.

“’Yun ang maganda, na nagagamit sa ibang bansa, at makakakita tayo ng real world data outside clinical trial at nakita natin ang safety at efficacy niya,” paliwanag ni Domingo.

Sa ngayon ayon kay Domingo, ang safety at monitoring data sa abroad na ipinapakita ng Pfizer COVID-19 vaccine ay wala namang serious adverse side effects sa mga nasabing kabataan.

“Maganda naman. In fact lower dose ang ginagamit sa mga bata dahil siyempre mas maliit 5-11 [years old]... Good, walang nakikita na anything unusual o signal na nakakangamba o nakakatakot. I’m quite confident na once ma-submit nila ang data, masa-satisfy ang mga experts,” sabi pa ni Domingo.

EUA aprub ng FDA... Booster shot sa edad 18 pataas, sisimulan na — DOH

ni Lolet Abania | December 1, 2021

Ipinahayag ng isang opisyal ng Department of Health (DOH) na inaprubahan na ng Food and Drug Administration (FDA) ang emergency use authorization (EUA) para sa paggamit ng COVID-19 booster shots sa mga edad 18 at pataas.

“The EUA has been approved, we will just finalize the guidelines, in the next couple of days, we will have the boosters for all 18 years old and above,” ani DOH Undersecretary Myrna Cabotaje sa isang Laging Handa interview.

Kinumpirma ni FDA Director-General Eric Domingo ang EUA approval na kanilang ibinigay nitong Lunes. Ani Domingo, ang DOH naman ang bubuo ng guidelines, gayundin ang planong implementasyon nito na ilalabas sa mga susunod na araw.

Sinabi ni Domingo na ang mga indibidwal na edad 18 at pataas na anim na buwan nang nakakumpleto ng kanilang ikalawang dose ng COVID-19 vaccine ay maaari na ring makatanggap ng booster shot sa second leg ng national vaccination drive na tinawag na “Bayanihan, Bakunahan” sa Disyembre 15 hanggang 17.

Ayon pa kay Domingo, ang mga booster brands na nakatakdang i-administer para sa nasabing grupo ay parehong booster brands para sa mga health care workers, senior citizens, at immunocompromised.

Ang mga volume ng booster shot para sa iba’t ibang brands na gagamitin ay Pfizer-BioNTech - 0.3 ml/dose; Moderna - 0.25 ml/dose (kalahati ng regular dose); Sinovac - 0.5 ml/dose; AstraZeneca - 0.5 ml/dose.

Sinabi naman ni Cabotaje na tinatayang nasa 600,000 booster shots na ang kanilang na-administer simula noong Lunes, kasabay ng 3-day national vaccination drive ng gobyerno.

Sa Enero 2022... Edad 5-11, target bakunahan kontra-COVID-19

ni Lolet Abania | November 29, 2021

Plano ng gobyerno na simulan na ang pagbabakuna kontra-COVID-19 ng mga batang edad 5 hanggang 11 sa Enero ng susunod na taon.

Ayon kay vaccine czar Secretary Carlito Galvez Jr., agad nilang isasagawa ito kapag binigyan na ng Food and Drug Administration (FDA) ng emergency use authorization (EUA), ang mga vaccines para gamitin ng mga bata, sa katapusan ng Disyembre.

“Ang plano namin once na lumabas ito, immediately, we will execute it. Ang plano namin is first quarter ng 2022 so January mag-start tayo. We want to finish that immediately sa first quarter,” sabi ni Galvez sa isang interview.

Sinabi rin ni Galvez na target naman ng pamahalaan na matapos ang pediatric vaccination sa unang quarter ng 2022 na sakto lang sa planong muling pagbubukas ng klase.

“So that ‘yung ating opening ng classes ay magsimula na at maprotektahan natin ‘yung ating children because of the Omicron. We don’t know yet the possibilities, ‘yung vulnerabilities ng mga children with this variant,” ani pa ni Galvez.

Sa ngayon, inumpisahan na ng gobyerno ang pagbabakuna ng mga minors na nasa edad 12 hanggang 17.

Una nang sinabi ng FDA na pinag-iisipan nila ang ibang formulation at ibaba ang dosage ng Pfizer vaccine para sa pagbabakuna ng mga batang edad 5 hanggang 11 laban sa COVID-19.

Ayon naman kay FDA director general Dr. Eric Domingo, inaasahan ng ahensiya ang Pfizer na mag-a-apply ng isang emergency use authorization para sa pagbabakuna ng mga batang edad 5 hanggang 11 sa Disyembre.