Moderna COVID-19 vaccine para sa edad 6-11, aprub na sa FDA

ni Lolet Abania | May 31, 2022

Inaprubahan na ng Food and Drug Administration (FDA) ng Pilipinas ang emergency use authorization (EUA) ng COVID-19 vaccine ng Moderna para sa mga batang edad 6 hanggang 11, ito ang kinumpirma ng Department of Health (DOH) ngayong Martes.

Sa kanilang regular briefing, sinabi ni Health Promotion and Communication Service Director Dr. Beverly Ho na nai-grant na ng Philippine FDA ang amendment ng EUA ng Moderna noong Mayo 20, 2022, sa paggamit nito bilang primary vaccine series kontra COVID-19 para sa nasabing age group.

Gayunman, naghihintay pa ang DOH sa rekomendasyon ng World Health Organization (WHO) para sa paggamit ng Moderna sa mga edad 6 hanggang 11.

Ito ang magiging batayan o guide ng Health Technology Assessment Council (HTAC) para sa kanilang independent evaluation. Batay sa na-published at peer-reviewed clinical data, ayon sa ZP Therapeutics ng Zuellig Pharma Corporation sa isang statement, ang dalawang 50-μg doses ng Spikevax vaccine ng Moderna ay mayroon anilang, “an acceptable safety profile and elicits a strong immune response for children aged 6 to 11.”

Ipinunto pa nila, na ang efficacy ng Spikevax para sa mga naturang age group ay katulad ng nakukuha ng mga adults. “This is a welcome development in expanding COVID-19 vaccine access within our pediatric population,” sabi ni Zuellig Pharma Corporation medical doctor Dr. Philip Nakpil.

“The Spikevax COVID-19 Vaccine Moderna boosts opportunities in ensuring more children are protected against the virus,” aniya pa.

Matatandaan noong Disyembre 2021, inaprubahan ng FDA ng bansa ang EUA ng Pfizer COVID-19 vaccine para sa edad 5 hanggang 11.

Base sa national COVID-19 vaccination dashboard ng DOH, tinatayang nasa 151 milyon doses na ang na-administered sa bansa hanggang Mayo 29, 2022.

Monkeypox vaccine, wala pang FDA-approved — DOH

ni Lolet Abania | May 28, 2022

Ipinahayag ni Department of Health (DOH) Secretary Francisco Duque III na wala pang vaccine laban sa monkeypox ang inaprubahan o inawtorisa ng Food and Drug Administration (FDA) ng Pilipinas.

Gayunman, sinabi ni Duque na sa ngayon nagkikipag-usap na ang DOH sa World Health Organization (WHO) kung saang bansa maaaring mag-procure ng monkeypox antivirals sakaling magkaroon ng outbreak nito sa bansa.

“Wala pang approval ng FDA natin, wala pang emergency use authorization. ‘Yan ang mga legal ng batayan para makapagpasok ng antivirals against monkeypox,” ani Duque sa isang radio interview ngayong Sabado.

Nitong Biyernes, sinabi ng DOH base sa WEHO, ang monkeypox vaccine ay hindi pa malawakang available na makukuha.

“The DOH is exploring all possible available sources and expedient legal methods for the procurement of Monkeypox vaccines,” pahayag ng DOH. “At present, the DOH is preparing supply chains and logistics services. There are ongoing internal discussions, based on scientific evidence, for the possible acquisition of antivirals in the event of an outbreak or severe cases,” dagdag ng ahensiya.

Sa nasabi ring interview, ayon kay Duque, inatasan na niya ang Pharmaceutical Division ng DOH na makipag-ugnayan sa Research Institute for Tropical Medicine at FDA upang maghanap ng posibleng available sources ng monkeypox vaccines.

Binanggit naman ni Duque ang posibilidad na gamitin ang Imvamune o Imvanex vaccine, kung saan may licensed na ito sa United States para mapigilan ang monkeypox o smallpox.

Ayon din sa DOH chief ang smallpox vaccines ay maaaring magbigay proteksiyon laban sa monkeypox dahil sa tinatawag na “cross-protection.”

“Maraming paraan para maiwasan ‘yan: strict border control, strict symptoms screening, minimum public health standards,” saad pa ni Duque.

18 home antigen COVID-19 test kits, aprub sa FDA

ni Lolet Abania | May 20, 2022

Nasa tinatayang 18 home antigen test kits para sa COVID-19 ang inaprubahan ng Food and Drug Administration (FDA), base ito sa data mula sa regulatory body.

Ayon sa FDA data nitong Mayo 10, ang mga self-administered test kits ay mayroong 83 percent hanggang 97.5 percent sensitivity at 99.5 percent hanggang 100 percent specificity.

“Marami pa po tayong hinihintay sa RITM (Research Institute for Tropical Medicine),” pahayag ni FDA officer-in-charge Oscar Gutierrez sa isang televised briefing ngayong Biyernes.

Kaugnay nito, sinabi ni Gutierrez na walang COVID-19 vaccine manufacturer na nag-aplay sa ngayon para sa booster shots sa mga kabataan.

“Kung sakali mang may mag-a-apply, sa loob po ng 3 linggo susubukan po nating ma-evaluate ito agad,” saad ni Gutierrez. “Kakayanin po ‘yan kasi nagtutulungan po kami dito lahat kasama ang ating vaccine experts,” sabi pa ng opisyal.