EUA application ng Janssen ng J&J, 3 linggo bago maaprubahan – FDA

ni Ronalyn Seminiano Reonico | April 5, 2021

Nagsumite na ng aplikasyon para sa emergency use authorization (EUA) sa Pilipinas ang Janssen Pharmaceuticals ng Johnson & Johnson para sa single-dose COVID-19 vaccine, ayon sa Food and Drug Administration (FDA).

Pahayag ni FDA Chief Eric Domingo, “They submitted the application last Wednesday. Evaluation now ongoing.”

Ayon din kay Domingo, aabutin ng 2 o 3 linggo bago maaprubahan ng FDA ang EUA application ng J&J dahil daraan ito sa proseso ng evaluation.

Samantala, sa ngayon ay inaprubahan na ng FDA ang emergency use ng bakunang gawa ng Pfizer-BioNTech, AstraZeneca, Sinovac, at Gamaleya o Sputnik V.

Lip at cheek tint na dahilan ng organ failure, pinangalanan ng FDA

ni Lolet Abania | March 17, 2021

Nagbabala ang Food and Drug Administration (FDA) sa publiko tungkol sa pagbili at paggamit ng Ever Bilena's EB Lip & Cheek Stain Night Berry dahil sa naglalaman umano ito ng sobrang microbial contaminants na mapanganib sa kalusugan.

Sa advisory na inilabas ng FDA, base sa isinagawa nilang test, ang dami ng microbial contaminants na mayroon ang nasabing produkto ay higit sa 1000 cfu/g na itinatakdang limit ng ahensiya.

"And as published in the ASEAN Cosmetic Directive (ACD)," nakasaad pa sa advisory, "the aforementioned adulterated product is found to be non-compliant with the existing standards, and, thus, pose potential hazards to the consuming public," ayon sa FDA.

"The use of adulterated cosmetic products may result to adverse reactions, including but not limited to, skin irritation, itchiness, anaplylactic shock and organ failure," sabi ng FDA.

Sa isang statement naman na nai-post sa Twitter ng Ever Bilena, ayon sa kumpanya, nagsasagawa na rin sila ng kanilang internal testing upang i-validate ang lumabas na pagsusuri ng FDA habang anila, "results should be out in 7 days."

"Simultaneously, we are also engaging with a 3rd party lab for their findings," ayon pa sa kumpanya. Gayundin, sinabi ng Ever Bilena company na ang apektado lamang na produkto sa FDA advisory ay ang batch #19A03QW ng Lip & Cheek Stain Night Berry variant.

"We would like to inform everyone that all of our products go through quality control before they are go signaled for distribution to the market," sabi pa ng kumpanya.

Ayon pa sa Ever Bilena, ang kanilang mga produkto ay napasailalim sa microbial testing bago ito inilabas sa mga pamilihan habang sinisiguro rin nila sa publiko, "[e]verything released from warehouse are FDA compliant."

Nabuking na may mga gumagamit, FDA nagbabala… Gamot sa hayop, 'di puwedeng panggamot sa COVID-19

ni Mary Gutierrez Almirañez | March 16, 2021

Nagbigay-babala ang Food and Drug Administration (FDA) sa publiko na huwag gamitin ang Ivermectin bilang gamot sa COVID-19 dahil ito ay para sa hayop at ang paggamit nito sa tao ay maaaring magdulot ng mas malubhang sakit.

Kaugnay ito ng impormasyong nakarating sa DOH na may ilang gumagamit ng mga off-label drugs para ipanggamot sa COVID-19 at kabilang nga rito ang Ivermectin.

Ayon kay Director General Rolando Enrique D. Domingo nitong Lunes, Marso 15, batay sa Advisory No. 2021-0526, ang Ivermectin ay isang veterinary product laban sa mga parasites, lisa, kuto, bulate at galis ng hayop.

Hindi ito puwedeng gawing alternatibong gamot para sa mga pasyenteng may COVID-19 o kahit na anong sakit sapagkat puro, matapang at mataas ang doses nito na maaaring makalason kapag ininom ng tao.

Bagama't may isinagawang pag-aaral ang ibang bansa kaugnay ng paggamit ng naturang gamot ay iginiit pa rin na hindi ito aprubado bilang gamot sa tao, partikular na sa COVID-19.

Sa ngayon ay patuloy na pinaaalalahanan ang publiko na huwag inumin ang gamot na nakalaan para sa mga hayop.