P31M pekeng data storage devices, nasamsam sa Maynila

ni Gina Pleñago @News | March 20, 2026

Photo: National Bureau of Investigation (NBI)

Nakumpiska ng National Bureau of Investigation-National Capital Region (NBI-NCR) ang nasa P31,459,990 halaga ng mga peke at substandard data storage devices sa serye ng pagsalakay sa Quiapo, Maynila, noong Lunes.

Ang operasyon ay bunsod ng mga ulat na naglipana sa merkado ang high-capacity storage electronics na ilegal ang pagtataglay ng trademarks ng mga nangungunang global brands.

Sinalakay ang establisimyento sa Quiapo at San Miguel gamit ang search warrants kung saan natagpuan ang kahun-kahon ng hindi awtorisadong devices na may kabuuang halaga na P31,459,990.

Nakumpiska sa tindahan sa may Quiapo, ang 5,474 units ng assorted SD, microSD, SDHC, at SDXC memory cards, pati ang USB flash drives at hard drives, na pawang may nakatatak na “SANDISK,” “SANDISK ULTRA,” at “EXTREME PRO” na nagkakahalaga ng P23,367,750 habang sa pagsalakay sa San Miguel, ay 1,124 units ng 2TB at 4TB external portable hard drives na may tatak na “SEAGATE” na nagkakahalaga ng P8,092,240.

Nahaharap sa reklamong Trademark Infringement sa ilalim ng Section 15, kaugnay sa Section 170 ng Republic Act 8293 (Intellectual Property Code of the Philippines) ang may-ari ng establisimyento.

P2 B pekeng produkto, sinira ng BOC

ni Ronalyn Seminiano Reonico | July 4, 2021

Sinira ng Bureau of Customs (BOC) Port of Manila ang aabot sa P2 bilyong halaga ng mga nakumpiskang pekeng produkto noong Sabado sa Meycauayan, Bulacan.

Ayon sa Intellectual Property Rights Division (IPRD) ng Intelligence Group ng BOC, kabilang sa mga pekeng produkto ay gumagamit ng brand name ng Nike, Vans, Adidas, Jordan, Hello Kitty, New Balance, Victoria’s Secret, Lacoste, NBA, Gucci, Tribal, Jag, Fila, Supreme, Puma, Mickey Mouse, Wrangler, Cetaphil, Nivea, Louis Vuitton, Bulgari, Tommy, Champion, Cool Water, Jo Malone, Clinique, Glutamax, JBL, Dove, Jergens, at Dior.

Samantala, ayon sa BOC ay lalo pang paiigtingin ng ahensiya ang pagbabantay laban sa mga pekeng produkto.

Pahayag pa ng BOC, “The District Collector further warned the public to be wary of using counterfeit products as they may have adverse side effects; lotions, perfumes even electronic products that are substandard.

P66.2 M puslit na pekeng yosi, nakumpiska

ni Lolet Abania | June 2, 2021

Nasa P66.2 milyong puslit na pekeng sigarilyo ang nakumpiska sa dalawang shipments ng Bureau of Customs (BOC) sa Port of Subic.

Sa isang statement, ayon sa BOC nitong May 19, isang 40-footer container na idineklarang mga sapatos na consigned sa RNRS Trading, habang isa pang shipment ng cartons film na consigned naman sa Heybronze Non-Specialized Wholesale Trading ang dumating sa nasabing daungan.

Ayon sa BOC, sumailalim ang dalawang shipments sa physical examination kung saan nadiskubre ang iba’t-ibang pekeng sigarilyo na may mga brand na Marvels Menthol, Marvels Filter, Two Moon Filter, Two Moon Menthol, Fort Menthol 100’s, Mighty Menthol, Champion at Jackpot.

Nag-isyu na ng warrants of seizure at detention nitong May 28 laban sa mga shipments dahil sa umano'y paglabag sa National Tobacco Administration Memorandum Circular No. 03, NTA Board Resolution No. 079-2005, Republic Act 8293 o ang Intellectual Property Code of the Philippines, at RA No. 10863 o ang Customs Modernization and Tariff Act.