4K paaralan, nagbalik na sa F2F classes — DepEd

ni Lolet Abania | March 2, 2022

Umabot sa kabuuang 4,315 paaralan sa buong bansa ang nakiisa sa tinatawag na “progressive expansion” phase ng face-to-face classes sa gitna ng COVID-19 pandemic, ayon sa Department of Education (DepEd).

Sa Laging Handa briefing ngayong Miyerkules, ini-report ni DepEd Secretary Leonor Briones na may 6,213 eskuwelahan sa buong bansa ang handa nang sumali sa limitadong in-person classes, kung saan napapailalim ang mga ito sa pamantayang itinakda ng DepEd.

Sa 4,315 paaralan na umabot sa kanilang pamantayan, mayroong 4,239 public and 76 private schools ang nakiisa sa pilot in-person classes hanggang nitong Marso 1, matapos na ang National Capital Region (NCR) at 38 pang mga lugar ay isinailalim na sa Alert Level 1.

Gayunman, kahit na nagbukas na uli ang mga paaralan sa F2F classes, sinabi ni Briones na mananatiling ipatutupad ang blended learning para magawang maka-adapt ng mga bata sa mga teknolohiyang umiiral.

“Hindi na kagaya nu’ng unang panahon na mostly face-to-face. Ito ngayon, ‘di natin bibitiwan ang digital technology, ang science, ang mathematics, and so on, but meron talagang face-to-face component dahil mahalaga ‘yan sa pag-socialize at pagturo ng bata. Pareho silang importante para tayo makahabol and will be on par with the other countries,” paliwanag ni Briones.

“If you mean full face-to-face na anim, walong oras na ang teacher at mga bata nagkakaharap, hindi ‘yan posibleng mangyayari. Lahat na bansa na binabantayan namin, lalo na na ‘yung mga bansa na bilib na bilib talaga tayo, wala na ‘yung nation na full face-to-face. May blended component talaga,” sabi pa ng opisyal.

Binigyan-diin naman ng kalihim, na umaasa sila ng pagkakaroon ng 100% attendance ng mga estudyante anumang uri ng pagtuturo mapa-blended, online o physical classes.

Para sa face-to-face classes, ayon kay Briones, iminumungkahi nila na gawin na lamang itong half day o kalahating araw para maiwasan ng mga bata ang pagkain-kain at magdagdag ng panganib ng COVID-19 infections.

Matatandaan nitong Pebrero, inawtorisa ng DepEd ang lahat ng regional directors na simulan ang “progressive expansion” phase ng F2F classes para sa public at private schools, kasunod ng pag-apruba ni Pangulong Rodrigo Duterte sa rekomendasyon ng DepEd na palawigin ang in-person classes sa mga lugar na nasa ilalim ng Alert Level 2 at pababa.

F2F classes, tuloy na uli sa NCR

ni Lolet Abania | February 9, 2022

Nagbalik na sa kanilang mga classrooms ang ilang mga estudyante sa elementary at high school sa Metro Manila ngayong Miyerkules, habang ang mga paaralan ay nagpatuloy na rin sa kanilang in-person classes sa ilalim ng Alert Level 2.

Kasabay ng pagre-resume ng klase ay ang pagsisimula naman ng “expansion phase” ng in-person classes sa National Capital Region (NCR) sa ilalim ng mga paaralan na pinayagang magsagawa na rin ng face-to-face sessions.

Una nang ipinahayag ng Department of Education (DepEd) na ang 28 eskuwelahan na nakiisa sa “pilot phase” ay maaari nang ipagpatuloy ang kanilang in-person classes. Hindi naman agad masabi ng ahensiya kung ilang paaralan ang muling magbubukas sa ilalim ng expansion phase.

Sa ulat, sinalubong ng Disiplina Village Bignay Elementary School (DVBES) sa Valenzuela City ang kanilang mga estudyanteng papasok ulit, kung saan nasimulan na ng paaralan ang pilot face-to-face classes. Ipinagpatuloy na ng paaralan ang kanilang F2F classes matapos na ang National Capital Region (NCR) ay isailalim sa Alert Level 2 mula Pebrero 1 hanggang 15.

Naghanda ang DVBES ng maraming classrooms para sa mga estudyante ng Kinder at Grades 1 hanggang 3. Nasa tinatayang 16 na estudyante kada year level, ang pinapayagang mag-participate sa pilot face-to-face classes.

Ayon sa mga guro ng naturang paaralan, plano na rin nilang i-resume ang F2F classes para sa mga estudyante ng Grades 4 hanggang 6. Samantala, isa sa mga eskuwelahan na nagsimula na ulit ng kanilang in-person classes sa ilalim ng expansion phase ay ang Pio del Pilar Elementary School sa Manila, kung saan ang mga estudyante at mga guro ay makikitang labis ang excitement sa kanilang pagbabalik, matapos ang halos 2 taon ng tinatawag na remote learning dahil sa pandemya.

Tiniyak naman ni Principal Susan Ramos ng Pio del Pilar Elementary School, na handa ang paaralan para i-isolate ang sinuman na magkakasakit o makararanas ng COVID-19 symptoms.

“’Pag may symptoms ang bata, ipapa-test namin siya. I-isolate kaagad siya. Mayroon kaming clinic,” sabi ni Ramos. Ayon sa DepEd, ang expansion phase ay ikalawa mula sa three-part plan ng ahensiya para sa gradwal na pagbubukas muli ng basic education schools sa gitna ng pandemya ng COVID-19.

304 public schools, sasabak sa expansion phase ng F2F classes — DepEd

ni Lolet Abania | February 4, 2022

Ipinahayag ng Department of Education (DepEd) ngayong Biyernes na nasa tinatayang 304 pampublikong paaralan sa mga lugar na nasa ilalim ng Alert Level 2, ang handa nang sumabak sa papapalawig ng face-to-face classes.

Sa isang virtual press conference, ayon kay DepEd Assistant Secretary Malcolm Garma, tinatayang nasa 6,347 public schools na nakabilang sa expansion phase ng limitadong F2F classes ang aniya, “underwent assessment and are deemed ready”.

Gayunman, nilinaw ni Garma na nasa tinatayang 304 pampublikong paaralan lamang ang handa nang simulan ang implementasyon ng limitadong face-to-face classes dahil ang lokasyon ng mga lugar nito ay nasa ilalim ng Alert Level 2.

Sa nasabing bilang ng eskuwelahan, mayroong 12 public schools sa Region 2; 106 public schools sa Region 3; 54 public schools sa Region IV-A; 9 public schools sa Region VIII; at 123 public schools sa National Capital Region (NCR).

Batay sa nakasaad sa expansion phase aniya, “schools must be validated as compliant with the standards of the School Safety Assessment Tool (SSAT) and located in areas under Alert Levels 1 and 2 based on the periodic risk assessment by the DOH.”

Gayundin, ang mga napabilang na paaralan para sa expansion phase ay maaari ring magdagdag ng ibang grade levels, base sa kapasidad ng eskuwelahan.

Una nang sinabi ni DepEd Secretary Leonor Briones na ang mga estudyante na makikiisa sa face-to-face classes ay dapat mayroong written consent ng kanilang mga magulang.

“Only vaccinated teachers may participate in the face-to-face classes, and vaccinated learners shall be preferred,” sabi pa ni Briones.