Pagbabakuna kontra-COVID-19 sa mga estudyante sa paaralan, plano ng gobyerno – DOH

ni Lolet Abania | May 3, 2022

Pinag-iisipan na ng pamahalaan na magpatupad ng COVID-19 vaccination program sa mga paaralan para sa mga estudyante na magbabalik sa face-to-face classes habang patuloy ang bansa sa pagbabakuna sa mas marami pang indibidwal.

Ayon kay Department of Health (DOH) Secretary Francisco Duque III, ang COVID-19 vaccination program para sa mga estudyante ay ipapatupad na katulad sa ibang vaccines para sa measles at polio na iniaalok at isinasagawa sa mga estudyante.

“We have already articulated this to [Department of Education] Secretary [Leonor] Briones so that we can ramp up the relatively low vaccine coverage for the students in the basic education sector,” pahayag ni Duque kay Pangulong Rodrigo Duterte sa isang taped meeting na ipinalabas ngayong Martes.

Nagmula ang suhestiyong ito kay Pangulong Duterte na nagpanukala na payagan ang mga estudyante na mag-attend ng in-person classes kung ang mga vaccination programs ay naisagawa na sa kanila ng gobyerno.

Kasama sa planong programa ay mga minors na nasa pagitan ng mga edad 5 at 11, at nakipag-usap na kay vaccine czar Carlito Galvez, Jr. sa mga academic institutions.

Samantala, sa latest data mula sa DOH, lumabas na nakapag-administer na ang bansa ng kabuuang 147.117 milyon doses ng COVID-19 vaccines hanggang nitong Mayo 1. Kabilang dito ang 65.719 milyon first doses, 67.911 milyon second doses, at 13.487 milyon booster doses, kumpara sa estimated population ng bansa na 110 milyon.

Ayon naman kay presidential adviser on COVID-19 response Vince Dizon, available na ang mga suplay ng bakuna na ilalaan sa mga paaralan, kung saan may 15 milyon doses para sa mga kabataan ay nasa bansa na, habang nasa 10 milyon naman ang kasalukuyang stock nito.

“The IATF, I think, in its next meeting, will issue such a strong endorsement or strong encouragement for private schools in particular to go back to face-to-face classes,” ani Dizon sa parehong meeting.

Sinabi ni Dizon na halos nasa 60% ng mga pampublikong paaralan sa buong bansa ang nagbalik na face-to-face classes, at patuloy pang dumarami ang lumalahok dito.

100% capacity sa klasrum sa F2F classes sa kolehiyo, aprub ng IATF

ni Lolet Abania | March 11, 2022

Pinayagan na ng Inter-Agency Task Force (IATF) ang mga higher educational institutions na magsagawa ng kanilang face-to-face classes na nasa 100% ang classroom capacity sa mga lugar na nasa Alert Level 1, ayon sa Malacañang ngayong Biyernes.

Ito ang inanunsiyo ni acting deputy presidential spokesperson Kris Ablan na batay sa ilalim ng IATF Resolution 164 na inisyu ngayong Biyernes, Marso 11.

“On classroom capacity, the allowable seating capacity in classrooms of HEIs in areas under Alert Level 1 is at a maximum of 100% capacity,” nakasaad sa IATF Resolution.

Gayunman, ayon sa IATF, ang mga participants sa in-person classes ay mananatiling limitado para sa mga teaching, non-teaching personnel, at estudyante na fully vaccinated na kontra-COVID-19.

Ang mga unvaccinated o partially vaccinated na mga estudyante na nasa Alert Level 1 areas ay mananatili naman sa ilalim ng flexible learning modalities.

Para sa operasyon ng HEI student dormitories, sinabi ng IATF na wala nang magiging restriksyon sa kanilang operational capacity subalit dapat na mag-secure ang HEI ng clearance mula sa kanilang local government unit (LGU).

Sa ibinigay naman na requirement para sa HEIs bago ang operasyon sa mga lugar na nasa Alert Level 1, ayon sa IATF, kailangan nilang kumuha ng self-assessment checklist na nakasaad sa CHED-DOH Joint Memorandum Circular No. 004-2021, saka magbubukas sa ilalim ng self re-opening.

Final answer: Face-to-face classes, tablado kay P-Du30

ni Ronalyn Seminiano Reonico | June 29, 2021

Humingi ng paumanhin si Pangulong Rodrigo Duterte sa mga magulang ng mga estudyante dahil sa hindi niya pag-apruba na ibalik na ang face-to-face classes sa bansa.

Saad ng pangulo, "Ako naman nanghingi ng patawad sa inyong lahat — sa mga nanay, tatay, kasi delayed ang edukasyon ng mga bata. Patawarin na po ninyo ako kasi hindi ko na po talaga kayang magbigay ng pahintulot na puwede na silang normal sa eskuwelahan.

"Kasi kung magkadisgrasyahan, buhay ito. Ang ano nito… is delayed lang ang education ng bata pero it will normalize one of these days but I cannot gamble with the life of children. Mahirap ‘yan kasi ako mananagot lahat.”

Samantala, una nang sinabi ng pangulo ang dahilan kung bakit hindi niya pa maibabalik ang face-to-face classes.

Aniya, sang-ayon naman siyang magkaroon ulit ng normalidad sa pag-aaral ng mga bata, ngunit dahil sa banta ng bagong variant ng COVID-19 na Delta, kailangang ihinto muna ang face-to-face at magpatupad ng istriktong protocol para na rin sa kaligtasan ng kabataan.

Saad ni P-Duterte, "Kasi kung ang mga bata, nand’yan, baka mahawa. Saka dadating itong D (Delta variant) na sinabing mas aggressive and more fatal than COVID-19.”