Mga kahulugan ng ahas

ni Estrellia de Luna @Panaginip gabay ng buhay | January 12, 2024

Analisahin natin ang panaginip na ipinadala ni Lourdes ng Sampaloc, Manila.

Dear Maestra,

Napanaginipan ko na dalawang beses akong tinuklaw ng ahas, at agad din itong gumapang palayo upang tumakas. Ngunit, nakita ng alaga kong aso ang ginawa sa akin ng ahas, kaya hinabol niya ito habang kakawag-kawag ang buntot at tahol nang tahol. 

Ano ang ibig sabihin ng panaginip ko?

Naghihintay,

Lourdes

Sa iyo, Lourdes,

Ang ahas ay sumisimbolo ng kaaway. Ibig sabihin may kaaway ka na magtatangkang sirain ang reputasyon mo. Ang ahas ay nangangahulugan din ng sexual desire, sabik ka na may makayakap sa gabi lalo na kung malamig ang panahon.

Ang dalawang beses kang tinuklaw ng ahas ay nagpapahiwatig na pabagu-bago ang isip mo. Madali kang magpalit ng desisyon, ito rin ay senyales na karamihan sa iyong mga kaibigan ay hindi tapat at ‘di mapagkakatiwalaan.

Samantala, ang hinabol ng alaga mong aso ang ahas, kakawag-kawag ang buntot nito at tahol nang tahol ay tanda na magiging mapalad ka sa pakikipagtransaksyon.

Tutulungan ka ng kaibigan mo sa pakikipag-deal sa bago mong kasosyo hanggang sa tuluyan kang umunlad at yumaman.

Matapat na sumasaiyo,

Maestra Estrellia de Luna

Kahulugan ng uwak

ni Estrellia de Luna @Panaginip gabay ng buhay | January 11, 2024

Analisahin natin ang panaginip na ipinadala ni Jhun ng Camarines Sur.

Dear Maestra,

Napanaginipan ko na nangongolekta ako ng kung anu-ano. Tulad ng mga prutas at gulay, maski ang damit na ukay-ukay ay kinokolekta ko rin. Samantala noong nakaraang araw, napanaginipan ko na nakakita ako ng uwak. Binaril ko ito, bumagsak sa lupa at kalaunan ay namatay.

Ano ang ibig sabihin ng mga panaginip ko?

Naghihintay,Jhun

Sa iyo, Jhun,

Ang ibig sabihin ng panaginip mo na nangongolekta ka ng mga prutas at gulay ay uunlad na ang buhay mo sa darating na mga araw. Kung mga ukay-ukay na damit naman ang iyong kinokolekta ito ay nagpapahiwatig na dapat kang umiwas sa gulo.

May nagbabantang gulo sa buhay mo. Talasan mo ang iyong pakiramdam. Maging mapagmatyag sa kapaligiran upang ‘di masangkot sa kaguluhan.

Samantala, ang nakakita ka ng uwak ay senyales na may lihim kang kaaway na handa kang pabagsakin anumang oras mula ngayon. Ang binaril mo ang uwak, bumagsak sa lupa at namatay ay tanda na magagapi mo ang iyong kaaway. Hindi sila magtatagumpay sa masama nilang binabalak laban sa iyo.

Matapat na sumasaiyo,

Maestra Estrellia de Luna

Kahulugan ng nagkasipon at pinulikat ang paa

ni Estrellia de Luna @Panaginip gabay ng buhay | January 10, 2024

Analisahin natin ang panaginip na ipinadala ni Norma ng Baguio.

Dear Maestra,

Napanaginipan ko na ginaw na ginaw ako. Nagkasipon na rin ako sa sobrang lamig sa bahay na tinitirhan ko sa Baguio. Maski ang mga paa ko ay pinupulikat na rin. 

Ano ang ibig sabihin ng panaginip ko?

Naghihintay,

Norma

Sa iyo, Norma,

Ang ibig sabihin ng panaginip mo na ginaw na ginaw ka dahil sobrang lamig d’yan sa bahay na tinitirhan mo sa Baguio ay madami kang mga kaibigan na handa kang damayan. Tapat at maaasahan sila sa lahat ng oras. Ang nagkaroon ka ng sipon ay nagpapahiwatig na makakatanggap ka ng magandang balita, at magiging masaya ka dahil sa nasabing balita.

Samantala, ang pinulikat din ang mga paa mo dahil sa sobrang lamig, ito ay senyales na susuwertehin ka. Magbabago na ang buhay mo hanggang sa tuluyan kang umunlad.

Matapat na sumasaiyo,Maestra Estrellia de Luna