Pasaway sa ECQ, aarestuhin

ni Ronalyn Seminiano Reonico | August 3, 2021

Papairalin ang mas mahigpit na enhanced community quarantine (ECQ) sa Metro Manila simula sa Agosto 6 kumpara sa dating ipinatupad na ECQ restriction, ayon kay Interior and Local Government Secretary Eduardo Año.

Aniya sa isang panayam, huhulihin na rin ang sinumang lalabag sa ipinatutupad na minimum public health standards at magpapakalat din ng mga pulis sa mga mataong lugar. Aniya, “Mas mahigpit tayo ngayong ECQ na 'to.

Ang tawag nga natin hard lockdown… Kung may makikita riyan [na violator], talagang aarestuhin ng ating mga pulis.”

Nilinaw naman ni Año na babalaan muna ang mga violators ngunit kapag hindi pa rin sila sumunod sa awtoridad ay saka sila aarestuhin. Depende rin umano ang magiging penalty base sa ipinatutupad na ordinansa ng nakasasakop na local government unit sa mga violators.

Samantala, inatasan na rin ni Philippine National Police Chief General Guillermo Eleazar ang National Capital Region Police Office (NCRPO) na maging istrikto sa pagpapatupad ng mas mahabang curfew hours sa rehiyon na magsisimula nang alas-8:00 ng gabi hanggang alas-4:00 ng umaga.

Aniya pa, “The strict border control and the longer curfew hours are but some of the necessary interventions to prevent the spread of the Delta variant of COVID-19.”

Pagpasok sa Pampanga at Bulacan, sinimulan nang higpitan

ni Ronalyn Seminiano Reonico | August 2, 2021

Nagsimula nang magpatupad ng mahigpit na border control sa ilang probinsiya sa Luzon katulad ng Pampanga at Bulacan. Isinailalim sa general community quarantine (GCQ) "with heightened restrictions" ang NCR hanggang sa Agosto 5.

Ipatutupad naman ang enhanced community quarantine (ECQ) sa rehiyon sa Agosto 6 hanggang 20. Sa Malolos, Bulacan, mahigpit na sinusuri ng mga awtoridad ang mga dokumento ng mga motorista sa mga checkpoints.

Sa Pampanga naman, simula ngayong araw, Agosto 2 hanggang sa 15, kailangang magpakita ng negative RT-PCR o antigen test result upang makapasok sa naturang lugar ang mga non-residents.

Mahigpit ding binabantayan ang mga borders at mga barangay sa Pampanga dahil sa banta ng COVID-19 Delta variant. Samantala, umabot na sa 1,597,689 ang kabuuang bilang ng kaso ng COVID-19 sa bansa matapos maitala ang karagdagang 8,735 bagong kaso noong Linggo.

Sa naturang bilang, 63,646 ang aktibong kaso habang 1,506,027 naman ang mga gumaling na at 28,016 ang mga pumanaw.

Senate sessions, suspendido mula Aug. 9-11 — Zubiri

ni Lolet Abania | August 2, 2021

Sinuspinde ni Senate Majority Leader Juan Miguel Zubiri ang plenary sessions mula Agosto 9 hanggang 11 kasabay ng pagsasailalim sa Metro Manila sa enhanced community quarantine (ECQ).

Subalit ayon sa mensahe ni Zubiri sa mga reporters, pag-uusapan pa nila kung isususpinde rin ang mga committee hearings.

“I’m checking lang about committee hearing kung puwede pa. Ang mahirap kasi sa hearings, we still need stenographers and of course they can’t come to the Senate, so paano na ‘yan? Wala naman silang equipment sa bahay. So, baka ‘yan, wala rin,” ani Zubiri.

Ang Metro Manila ay isasailalim sa ECQ mula Agosto 6 hanggang 20 upang hindi na kumalat pa ang mas nakahahawang Delta COVID-19 variant. Gayunman, mula Hulyo 31 hanggang Agosto 5, ang naturang rehiyon ay nasa ilalim ng general community quarantine (GCQ) “subject to heightened and additional restrictions.”