Pamimigay ng ayuda, simula na sa Agosto 11 — DILG

ni Ronalyn Seminiano Reonico | August 9, 2021

Sisimulan na ang pamamahagi ng cash assistance sa mga low-income households sa National Capital Region (NCR) na lubos na naapektuhan ng ipinatutupad na enhanced community quarantine (ECQ) sa Agosto 11, ayon sa Department of the Interior and Local Government (DILG).

Ani DILG Spokesperson Undersecretary Jonathan Malaya sa isang panayam, napagkasunduan umano ng mga Metro Manila mayors ang distribusyon ng financial aid sa nasabing petsa.

Aniya, “Nag-meeting po kami ng mga mayors the other night para nga paplantsahin 'yung ating proseso ng pamimigay ng ayuda at nagkasundo po sila na sabay-sabay silang magsisimula sa Miyerkules.”

Samantala, ayon kay Malaya, tinatayang aabot sa 11 million residente ng NCR ang makatatanggap ng cash assistance at P1,000 kada tao o aabot sa maximum na P4,000 kada bahay ang ipamimigay.

Bataan, ECQ hanggang Aug. 22

ni Lolet Abania | August 7, 2021

Isasailalim ang Bataan sa pinakamahigpit na enhanced community quarantine (ECQ) classification simula sa Linggo, Agosto 8.

Sa isang pahayag ngayong Sabado ni Presidential Spokesperson Harry Roque, Jr., inaprubahan ni Pangulong Rodrigo Duterte ang rekomendasyon ng Inter-Agency Task Force (IATF) na isailalim na ang Bataan sa ECQ mula bukas hanggang sa Linggo, Agosto 22.

Inilagay ang naturang probinsiya sa modified enhanced community quarantine (MECQ) hanggang Agosto 15 subalit pinalitan ito at isasailalim sa ECQ.

Una nang inianunsiyo ni Governor Abet Garcia na ang Bataan ay isasailalim sa ECQ dahil sa pagtaas ng COVID-19 cases.

Nitong Agosto 6, nakapagtala ang Bataan ng 14,643 kumpirmadong kaso at sa bilang na ito, 1,974 ang active, 12,135 ang nakarekober habang 534 ang nasawi dahil sa COVID-19.

COVID cases, tataas pa rin kahit ECQ na — DOH

ni Ronalyn Seminiano Reonico | August 7, 2021

Posibleng patuloy na tumaas ang kaso ng COVID-19 sa bansa sa kabila ng pagpapatupad ng enhanced community quarantine (ECQ) sa National Capital Region (NCR), ayon sa Department of Health (DOH).

Sa panayam ng PTV, ayon kay Health Undersecretary Maria Rosario Vergeire, malaki pa rin ang maitutulong ng ECQ upang mapigilan ang labis na pagsipa ng kaso ng COVID-19 sa bansa. Saad ni USec. Vergeire, “Nakikita na po nating sumisipa na ang mga kaso… tumataas na po ang kaso.

Nararamdaman na po natin ang epekto ng Delta variant dito po sa ating bansa. At amin pong nakikita, based also on projections na tataas pa rin po ang mga kasong ito. “Ito pong ginagawa natin ngayong paghihigpit sa mga quarantine restrictions or classifications ay ang ating adhikain diyan is to delay further increase pero hindi niyan patitigilin. Tutuloy pa rin ang pagtaas pero ang atin pong ginagawa ngayon is to prepare our system for this continuous increase in the number of cases.”

Kabilang umano sa mga preparasyong ginagawa ng pamahalaan ay ang pagdaragdag ng mga ICUs sa mga ospital. Sinisiguro na rin ng DOH ang suplay ng mga oxygen, gamot, testing kits, atbp.. Samantala, umabot na sa 1,649,341 ang kabuuang bilang ng kaso ng COVID-19 sa bansa matapos maitala ang karagdagang 11,021 new cases ngayong Sabado. Nasa 76,063 ang aktibong kaso sa bansa kung saan 93% ang mild cases, 3% ang asymptomatic, 1.8% ang severe, at 1% ang nasa critical condition.

Umabot naman sa 1,544,443 ang kabuuang bilang ng mga gumaling na matapos maitala ang 9,194 recoveries ngunit nadagdagan din ng 162 ang mga pumanaw at sumipa na sa 28,835 ang death toll sa bansa.