Kanino maaaring tumanggap ng donasyon ang isang kandidato?

ni Jasmin Joy Evangelista | October 16, 2021

Kabi-kabila na ang diskarte ng kampo at tagasuporta ng mga kandidato para sa 2022 elections.

Kaugnay nito, patuloy na nagpaalala ang Comelec hinggil sa mga ipinagbabawal para sa mga aspirants.

Ayon sa Batas Pambansa 881 o Omnibus Election Code, bawal magbigay ng kontribusyon ang mga sumusunod:

* Public at private financial institutions

* Namamahala ng public utilities o may proyekto kaugnay sa likas na yaman

* May kontrata o nakatanggap ng insentibo mula sa gobyerno

* May higit 100,000 loan mula sa gobyerno

* Educational institutions na may P100,000 o higit pa na public loan

* Public officials, empleyado sa civil service, sandatahang lakas

* Foreigner, at foreign government at corporations

*

Sa loob naman ng election period mula Enero 9 hanggang Hunyo 8, 2022, bawal ding mangalap ng pondo para sa mga kandidato sa pamamagitan ng pasayaw, lottery, sabong, palaro, boksing, bingo, beauty contest, at iba pang entertainment performances.

Maaari raw madiskuwalipika ang sino mang kandidato na tatanggap ng bawal na kontribusyon sa araw ng halalan at araw bago ang botohan gaya ng transportasyon, pagkain, inumin, at ano mang may halagang bagay.

Maaari ring ma-disqualify ang sinumang kandidato, asawa, kamag-anak sa ikalawang civil degree, campaign manager, o kinatawan na magbibigay ng donasyon para sa mga proyekto tulad ng road construction at repair, tulay, school bus, clinic at ospital, at simbahan sa loob ng campaign period, isang araw bago ang botohan, at sa araw ng halalan - liban na lang kung tradisyon sa relihiyon at pagbabayad sa naka-schedule na bayarin ng mga scholar.

Ayon naman sa Commission on Elections (Comelec) at election watchdog Lente, lahat ng patakaran kaugnay sa mga kandidato ay may bisa lang kapag opisyal nang nagsimula ang campaign period na Pebrero 8 hanggang Mayo 7 para sa national candidates at Marso 25 hanggang Mayo 7 para sa local bets.

Samantala, dapat ihayag ang mga kontribusyon sa Statement of Election Contributions and Expenditures o SOCE ng mga magwawagi at talunang kandidato.

11 senatorial candidates para sa Robredo-Pangilinan tandem

ni Lolet Abania | October 15, 2021

Inilabas na ni Vice President Leni Robredo, standard bearer ng oposisyon ngayong Biyernes, ang mga pangalan na bubuo sa kanilang 11-man Senate slate para sa 2022 national at local elections.

Sa press briefing kasama ang kanyang running-mate na si Senador Francis “Kiko” Pangilinan, binanggit ni Robredo ang kanilang mga napiling kandidato sa pagka-senador:

1. Senador Richard Gordon

2. Senador Joel Villanueva

3. Senador Miguel Zubiri

4. Senador Risa Hontiveros

5. Senador Leila de Lima

6. Dating Vice President Jejomar Binay

7. Dating Rep. Teddy Baguilat

8. Sorsogon Gov. Chiz Escudero

9. Dating Senador Antonio Trillanes IV

10. Human rights lawyer Chel Diokno

11. Alex Lacson ng Kapatiran

“They are the ones who heeded our call for unity,” ani Robredo.

“We are together in expanding our ranks based on principles.”

"Mga kinatawan sila ng mas malawakang puwersang handang tumindig para isulong ang bago, matino, at makataong pamamahala, mula sa tuktok ng pamahalaan hanggang sa bawat sulok ng burukrasya,” sabi pa ni Robredo.

Gayunman, sinabi ni Robredo idadagdag na lamang nila ang nasa 12th slot sa susunod na araw.

“We want to get someone who will best represent the marginalized sector,” diin ng bise presidente.

15-man senatorial slate nina Lacson-Sotto tandem

ni Lolet Abania | October 15, 2021

Labinlimang senatorial candidates ang pinangalanan na nina Senator Panfilo Lacson at Senate President Vicente Sotto III na kanilang makakasama para sa 2022 elections.

Narito ang listahan ng mga tatakbong senador na eendorso ng Lacson-Sotto tandem:

• Antique Rep. Loren Legarda

• Former Senator Joseph Victor “JV” Ejercito

• Sorsogon Governor Francis “Chiz” Escudero

• Former Quezon City Mayor Herbert Bautista

• Senator Sherwin Gatchalian

• Senator Joel Villanueva

• Senator Juan Miguel “Migz” Zubiri

• Former Vice President Jejomar “Jojo” Binay

• Former Agriculture Secretary Manny Piñol

• Dr. Minguita Padilla

• Former Makati Rep. Monsour del Rosario

• Powee Capino

• Senator Richard “Dick” Gordon

• Information and Communications Secretary Greg Honasan

Ang 14 na pangalan ang mariing iniendorso ni Sotto dahil aniya, sila ang mga nararapat sa Senado, “The ones who deserve to be in the Senate.”

Bukod sa 14 na senatoriables, ayon kay ay Sotto mayroon din silang isa pa na nakatakdang iendorso na isang “surprise candidate.”

Nitong Huwebes, sinabi ni Lacson na nakahanda silang suportahan ang 14 na kandidato sa kanilang pagtakbo sa senatorial slate sa darating na eleksyon.

Gayunman, sinabi ni Lacson na ipapaubaya na nila sa electorate ang pamimili ng kanilang pinal na 12 senatorial bets sa araw ng eleksyon.

Sina Lacson at Sotto ay tatakbo sa pagka-pangulo at pagka-bise presidente para sa 2022 national at local elections.