Para sa 2022 May elections... Comelec, naglabas ng pansamantalang listahan ng mga kandidato

ni Lolet Abania | October 29, 2021

Naglabas na ang Commission on Elections (Comelec) ngayong Biyernes ng tentative na listahan ng mga kandidato para sa 2022 national at local elections.

Batay sa Comelec, mayroong 97 mga pangalan ng tentative o pansamantalang listahan ng mga presidential aspirants/candidates na karamihan sa kanila ay tatakbo bilang independent.

Gayundin, nakapagtala ang poll body ng 28 vice presidential at 174 senatorial aspirants. [Click here for list]

Ang Comelec ay naglabas din ng tentative na listahan ng mga tatakbo naman para sa local positions. [Click here for list]

Sa ilalim ng calendar ng Comelec para sa 2022 national at local elections, ngayong Biyernes, Oktubre 29, ang pagsisimula ng posting ng pansamantalang listahan ng mga kandidato.

Ayon sa poll body, inilabas ang tentative lists para payagan ang mga aspirants na ma-check ang kanilang mga pangalan na lalabas sa official ballot.

Ang huling araw ng paghahain ng request o koreksyon ng pangalan na dapat lumabas sa ballot ay sa Nobyembre 8, 2021.

“Aspirants whose names appear on the tentative list of candidates released by the COMELEC have until November 8 to submit their requests for correction of typographical errors in their listed names,” post ni Comelec Spokesperson James Jimenez sa Twitter.

Una nang sinabi ni Jimenez na ang Comelec ay nakatakdang i-publish ang pinal na listahan ng mga kandidato sa Disyembre.

Sinabi rin ni Jimenez na inaasahan ng poll body na matatanggal na ang mga nuisance candidates mula sa kasalukuyang listahan.

Huling 2 araw ng voter registration, dinagsa

ni Jasmin Joy Evangelista | October 29, 2021

Dagsa pa rin ang mga nais maging botante sa iba’t ibang Commission on Elections (Comelec) offices para magparehistro sa darating na halalan, na magtatapos na bukas.

Karamihan sa mga nagpaparehistro ay mga bagong botante.

Nagpaalala ang Comelec na sa unang step ng registration o verification ay dapat dala na ang mga requirements.

"We don't accept IDs na fake o matagal nang expired... I'm sorry po, pero di tinatanggp ang barangay ID at hindi rin po tinatanggap pati police clearance," ani Vic Fabella, Comelec officer.

Pinaalalahanan din niya ang mga magpapa-register na agahan ang pagpunta at huwag sa oras na malapit nang magsara dahil baka hindi umabot sa biometrics.

Ang extended voter registration period para sa Halalan 2022 ay magsasara na bukas, ika-30 ng Oktubre.

Vote buying gamit ang makabagong teknolohiya, tututukan ng Comelec

ni Jasmin Joy Evangelista | October 24, 2021

Mayroong paalala ang Comelec hinggil sa posibleng vote buying sa darating na eleksiyon.

Babala ng Comelec sa ilalim ng Batas Pambansa 881 o Omnibus Election Code, hindi lang ang pulitiko o kinatawan niya na bumibili ng boto ang makakasuhan at mapaparusahan kundi damay pati ang botante, grupo, korporasyon o komunidad na tumanggap nito.

Posible silang makulong nang hindi bababa sa isang taon o hindi lalampas nang anim na taon.

“It’s the vote-buyer and the vote-seller. That’s an election violation kasi, eh, so the penalty is imprisonment up to 6 years and disqualification from holding office,” ani Comelec director James Jimenez.

Hindi lamang aktuwal na pamimigay ng pera ang saklaw ng vote buying. Batay sa Omnibus election code, kasama ang pangako ng pera, anumang bagay na may halaga, pangakong trabaho, prangkisa, o anumang pabor, pribado man o pampubliko.

Saklaw din ng vote buying kung ang kapalit ay hindi pagboto sa halalan at hindi pagboto sa sinumang kandidato. Vote buying din kung kapalit ito ng boto sa isang political convention sa loob ng sariling partido.

Naisip na rin umano ng Comelec na posibleng magamit ng ibang politiko ang makabagong teknnolohiya at iba’t ibang mobile at digital platforms para makabili ng boto.

Nakikipagtulungan na ang Comelec sa mobile at service providers tungkol dito.

Tutulong din ang election watchdog sa pag-monitor ng mga insidente ng vote buying and selling.

Mensahe nila sa mga botante, ‘wag magpapaloko sa mga magtatangkang bilhin ang inyong boto.

Kahit tapos na ang halalan, maaari pa ring makasuhan ang mahuhuling bumili ng boto at nagbenta ng boto ng hanggang limang taon matapos ang insidente.