Raffy Tulfo nanguna sa SWS survey sa pagka-senador

ni Jasmin Joy Evangelista | November 17, 2021

Nanguna ang TV personality na si Raffy Tulfo sa survey sa pagka-senador na isinagawa ng Social Weather Stations (SWS).

Ayon sa SWS survey, nanguna si Tulfo na sinundan ni Sorsogon Governor Chiz Escudero habang pumangatlo si Taguig-Pateros Rep. Alan Peter Cayetano.

Nasa 60% ng 1,200 adult Filipino ang pinili si Tulfo bilang top choice.

Nasa 51% naman ang pumili kay Escudero habang 50% kay Cayetano na mula sa dating panlima ay nasa pangatlong puwesto na.

Nasa pang-apat na puwesto naman sa survey si House Deputy Speaker Loren Legarda na mayroong 45% at panlimang puwesto naman si Senate Majority Leader Miguel Zubiri habang nasa pang-anim na puwesto si dating Department of Public Works and Highways (DPWH) Secretary Mark Villar.

Pasok din sa Magic 12 sa pinakahuling SWS survey sina Senator Risa Hontiveros, dating senator Jinggoy Estrada, actor Robin Padilla at veteran journalist Noli de Castro at Senator Joel Villanueva.

P-Du30, tatakbong senador sa 2022 elections

ni Lolet Abania | November 15, 2021

Naghain na si Pangulong Rodrigo Duterte ng kanyang certificate of candidacy na tatakbo sa pagka-senador sa 2022 elections ngayong Lunes.

Una nang kinumpirma ito ni Senador Bong Go na aniya, ihahain ni Pangulo Duterte ang kanyang COC sa headquarters ng Commission on Elections (Comelec) sa pamamagitan ng isang abogado.

Ayon kay PDP-Laban secretary-general Melvin Matibag, si P-Duterte ay tatakbo sa ilalim ng Pederalismo ng Dugong Dakilang Samahan (PDDS), substituting o papalitan ang isang Mona Liza Visorde.

Paliwanag ni Matibag, tatakbo ang Pangulo sa ilalim ng PDDS upang maiwasan ang tinatawag na “legal complications” dahil aniya sa nagaganap na sigalot sa PDP-Laban, gayundin ang rason kaya si Go ay naghain ng kanyang COC sa pagka-pangulo sa ilalim ng ibang partido.

Sa hiwalay na mensahe, sinabi ni Go na ang pagtakbo ni Pangulong Duterte senatorial race ay para mapigilan ang anumang hidwaan sa mga miyembro ng first family.

“Kung ako lang tatanungin, ayaw ko din na [vice president] ang i-file niya. Ayaw ko magkasakitan pa. Tama na ako na lang ang nasaktan. Mataas respeto ko kay Pangulo at sa kanyang pamilya,” sabi ni Go.

Roque, tatakbo sa pagka-senador sa 2022 elections

ni Lolet Abania | November 15, 2021

Naghain na si dating presidential spokesperson Harry Roque ng kanyang certificate of candidacy sa pagka-senador sa 2022 elections ngayong Lunes.

Si Roque ay tatakbo sa ilalim ng Peoples’ Reform Party (PRP), kung saan naghain ng kanyang kandidatura sa huling araw ng substitution period para sa susunod na eleksyon, subalit hindi pa malinaw kung sino ang kanyang pinalitan.

“Ito na po ang huling araw ko bilang presidential spokesperson. Nais ko maging action man sa Senado,” sabi ni Roque sa press briefing umaga ng Lunes.

Tinapos ni Roque ang kanyang huling press briefing kanina na ipinalabas ang video ni Davao City Mayor Sara Duterte habang iniendorso siya sa Senate bid para sa 2022 elections.

“Harry Roque will be our man of action in the Senate. Ibigay natin ang todo at buong suporta sa kanyang kandidatura,” sabi ni Mayor Sara na anak ni Pangulong Rodrigo Duterte.

Matatandang sinabi ni Roque na tatakbo siya sa eleksyon kung si Mayor Sara ay tatakbo rin. Sasabak naman ang alkalde sa pagka-bise presidente.

Ang Peoples’ Reform Party ay itinatag ni yumaong Senador Miriam Defensor Santiago. Si Roque ay dati nang miyembro rito simula pa noong 2018.