Mayor Sara at Buhay Party-list Rep. Atienza, absent sa VP debate — Comelec

ni Lolet Abania | March 20, 2022

Pito lamang mula sa siyam na kandidato sa pagka-bise presidente ang maghaharap sa unang vice presidential debate na sponsored ng Commission on Elections (Comelec) ngayong Linggo.

Ayon kay Comelec spokesman James Jimenez, kabilang sina Walden Bello, Rizalito David, Manny Lopez, Willie Ong, Francis Pangilinan, Carlos Serapio, at Vicente Sotto III ang nag-commit na dadalo sa una na dalawang vice presidential debates ng Comelec.

Hindi naman inaasahang lalahok sina Davao City Mayor Sara Duterte-Carpio at Buhay Party-list Rep. Lito Atienza sa VP debate.

Si Atienza, na running-mate ni presidential candidate Senador Manny Pacquiao, ay pormal na tumanggi dahil aniya sa medical reasons habang si Duterte-Carpio, na runningmate naman ni presidential aspirant Ferdinand “Bongbong” Marcos Jr. ay nagpasyang hindi dumalo sa anumang debate kaugnay sa May 9 elections.

Sa kabila ng pagiging absent ng dalawa, nagtakda pa rin ang Comelec ng 9 lecterns onstage, na katumbas sa bilang ng mga kandidato para sa ikalawang pinakamataas na posisyon sa bansa. Bawat VP candidate ay maaaring magdala ng 5 staff members lamang sa venue na magsisilbi bilang miyembro ng audience.

Ayon sa Comelec, mahigit 300 pulis at traffic personnel ang idineploy sa venue sa Pasay City para sa seguridad at pagmo-monitor ng traffic.

Nakatakda naman ang ikalawang vice presidential debate sa Abril 23, kung saan isasagawa ito bilang town hall format. Una nang sinabi ng Comelec na ang mga kandidato na hindi dadalo sa kanilang mga debate ay hindi papayagan na gamitin ang kanilang e-rally platform.

Unang presidential debate para sa elections 2022, handa na — Comelec

ni Lolet Abania | March 19, 2022

Handang-handa na ang PiliPinas Debates 2022 para sa mga presidential candidates ngayong Sabado, Marso 19, sa Pasay City, ayon sa Commission on Elections (Comelec).

Asahang mahigit sa 30 pulis at mga traffic personnel ang naka-deploy para i-secure ang venue na gaganapin sa Sofitel Hotel Tent at i-monitor ang lagay ng trapiko sa lugar.

Limitado naman ang bilang ng mga indibidwal na maaaring makapasok sa venue, at 5 staff members lamang bawat presidential aspirant ang papayagan sa loob at magsisilbi silang audience.

Mayroong 10 lecterns onstage na katumbas sa bilang ng mga kandidatong tumatakbo sa pinakamataas na elective post sa bansa.

Ang mga kandidato ay magdo-draw ng lots upang madetermina ang unang speaker, habang ang susunod na mga speakers ay ia-arranged alphabetically. Hindi papayagan ang mga notes onstage o sa entablado.

Alas-2:00 ng hapon, kanina ay nagsagawa ang Comelec ng isang media walkthrough sa venue. Lahat ng presidential bets ay nagkumpirma ng kanilang attendance, maliban kay dating Senador Ferdinand “Bongbong” Marcos Jr.

Kabilang sa nagkumpirmang magpa-participate ay sina Ernesto Abella, Leody de Guzman, Isko Moreno Domagoso, Norberto Gonzales, Panfilo Lacson, Manny Pacquiao, Faisal Mangondato, Jose Montemayor Jr., at Leni Robredo.

Ang PiliPinas Debates 2022 ay ipapalabas sa lahat ng local channels at magiging streamed simultaneously sa social media platforms ng Comelec na Facebook, Twitter, at YouTube.

Habang nangangampanya sa Sorsogon.. Mayor Isko, nakaramdam ng chest pain

ni Lolet Abania | March 14, 2022

Nakaranas si presidential candidate at Manila Mayor Francisco “Isko” Moreno ng tinatawag na costochondritis habang nangangampanya sa Sorsogon, ayon sa kanyang running mate Dr. Willie Ong ngayong Lunes.

Sa isang Facebook post, sinabi ni Ong na nilapitan siya ni Moreno dahil nakaramdam ito ng chest pain.

“Tinanong ko siya, ilang minuto o oras na ‘yan sumasakit? Sabi niya ay buong umaga na, more than 1 hour na,” pahayag ni Ong.

Sinabi ng vice presidential bet ng Aksyon Demokratiko, ang sakit ay nag-ugat mula sa naranasang fatigue ni Moreno.

“Ayos naman ang pakinig ko sa puso niya. Ang sabi ko ay balewala ‘yan, sa buto lang ang sakit dahil sa sobrang pagod. Ang diagnosis ko ay costochondritis. Hindi ‘yan sakit sa puso,” giit ni Ong.

Nabatid na inasistihan at minonitor din ng misis ni Ong na si Dr. Liza Ramoso-Ong sa pagtsi-check kay Moreno. Ayon sa team ni Moreno na base sa paliwanag ng Mayo Clinic, “costochondritis is an inflammation of the cartilage that connects a rib to the breastbone, while the pain it causes may mimic a heart attack or other heart conditions.”

Tiniyak naman ni Ong, isang internist at cardiologist, na si Moreno ay malusog ang kondisyon. Sa isang ambush interview matapos ang town hall meeting sa Sorsogon, sinabi ni Moreno na ang kanyang lagay ay hindi ganoon kaseryoso.

“Nagkakaroon ako ng ano, eh, muscle pain lang pala. Kaya maswerte nga ako, sabi ko.

Kaya ‘wag niyo na kami paghiwalayin. Biruin mo saan ka nakakita, may vice president na ako, may doktor pa ko,” ani Moreno.

“Pero nothing serious… ‘Yung change nu’ng weather condition, plus ‘yung tedious schedule lang,” dagdag nito. “Okay naman, so far. Nothing to worry at all, as in literally zero,” giit pa ni Moreno.