Comm. Ferolino, Task Force Kontra Bigay chief — Comelec

ni Lolet Abania | March 30, 2022

Itinalaga si Commission on Elections (Comelec) Commissioner Aimee Ferolino bilang head ng inter-agency task force na mag-iimbestiga sa mga reports ng vote-buying. Ito ang inanunsiyo ni Comelec Commissioner George Garcia ngayong Miyerkules, kung saan si Ferolino ang mamumuno ng Task Force Kontra Bigay, at naatasan din siya na mag-draft ng karagdagang guidelines hinggil sa mga ulat ng vote-buying.

“Si Commissioner Aimee Ferolino po ang naitalaga na head o [chairperson] ng Task Force Kontra Bigay. Therefore, siya ang magpapatawag agad ng meeting ng task force, magda-draft ng necessary additional guidelines,” pahayag ni Garcia sa mga reporters.

“At the same time, magpapatupad ng mandato nitong Comelec mandate either to moto propio or accept complaints patungkol sa vote buying,” sabi pa ng opisyal. Ayon kay Garcia, ang Comelec en banc ang nagdesisyon para i-designate si Ferolino na siya anila, ang kuwalipikado para sa posisyon dahil sa kanyang karanasan.

“It is actually the en banc ... Una, si Commissioner Ferolino ay napakatapang na commissioner. Pangalawa, siya po ang vice chairman ng ating gunban at security personnel exemption, at Pangatlo, siya rin ay ang [chairperson] ng iba’t ibang committee tulad ng shipping, at lalo na ‘yung kanyang karanasan sa field,” giit ni Garcia.

“Si Commissioner Ferolino ay dating nagsilbi as a field personnel mula field official natin bago siya natalaga dito sa Comelec, ‘yung kanyang karanasan pagkatapos nu’ng kanyang tapang ‘pag pinagsama-sama mo ‘yan ay napakagandang ingredient para sa pagiging chairman ng Task Force para sa Kontra Bigay,” paliwanag pa ni Garcia.

Una nang sinabi ni Garcia na ang Task Force Kontra Bigay ay bubuuin ng maraming mga ahensiya, kabilang dito ang National Bureau of Investigation (NBI), Philippine National Police (PNP), Armed Forces of the Philippines (AFP), at ang Philippine Information Agency (PIA). Ang task force ay inaasahan para kumilos na motu proprio, gayundin sa mga pormal na mga reklamo kaugnay ng vote-buying.

Nangako naman si Department of Justice (DOJ) Secretary Menardo Guevarra na lilikha siya ng isang team na binubuo ng National Prosecution Service (NPS), NBI, Public Attorney’s Office (PAO), at ang DOJ Action Center para asistihan ang task force.

Sa ilalim ng Omnibus Election Code, sinumang indibidwal na napatunayang nagkasala ng election offense ay dapat parusahan ng pagkakakulong ng hindi bababa ng isang taon subalit hindi hihigit sa anim na taon.

Gayundin, ang mapapatunayang guilty ay pagkakaitan ng karapatang bumoto at ipagbabawal na humawak sa public office, at anumang political party na mapapatunayang nagkasala ng vote-buying ay pagmumultahin.

Mga kandidato, mag-espiya sa kalaban, isumbong ang paglabag — Comelec

ni Lolet Abania | March 28, 2022

Hinimok ng Commission on Elections (Comelec) ang mga kandidato na mag-espiya sa kanilang mga kalabang kandidato at i-report ang posible nitong election violations habang umiinit ang kampanyahan na mahigit isang buwan na lamang bago ang May 9 elections.

“Doon po sa magkakalaban, maganda po mag-monitoran kayo, maganda kayo mismo ang titingin, papansin sa mga kalaban n’yo sa posisyon at isumbong n’yo sa amin at ‘yan po ay aaksyunin namin,” sabi ni Comelec Commissioner George Garcia sa isang public briefing ngayong Lunes.

Ginawa ni Garcia ang pahayag matapos ang mga reports ng umano’y vote-buying na nagaganap sa mga campaign sorties, kung saan agad na bumuo ang Comelec ng isang inter-agency task force. Ayon kay Garcia, ang task force ay maaari na sariling mag-imbestiga kahit na walang mga complainants.

“Huwag po kayong mag-alala. Hindi po kami bingi at bulag sa mga ganyang realidad,” saad ng opisyal. Sinabi pa ni Garcia na ang poll body ay nagmo-monitor ng mga aktibidad ng mga kandidato sa social media.

“Akala siguro ng ibang kandidato hindi namin kayo namo-monitor kahit prior to the campaign period... Hahabulin namin kayo. ‘Yung mga may social media accounts kitang-kita may pa-raffle, may papremyo na ganito. Kami po sa Comelec ay naka-monitor,” diin ni Garcia.

Ini-report din ng opisyal na ilang insidente ng umano vote buying ay naisangguni na sa kanilang field personnel para sa malalimang imbestigasyon.

“Nagsimula na kaming mag-endorse sa aming mga field personnel upang sila mismo ay mag-submit ng mga reports sa amin. ‘Yung mga kababayan natin na may mabigat at credible na ebidensya sa vote buying, puwede n’yo pong isulat ‘yan sa amin sa Comelec law department,” paliwanag pa ni Garcia.

Nakasaad sa ilalim ng Omnibus Election Code, “giving, offering, or promising money or anything of value... in order to induce anyone or the public in general to vote for or against any candidate or withhold his vote in the election is prohibited.”

87.2 % ng mga balota para sa May 9 elections, naimprenta na — Comelec

ni Lolet Abania | March 24, 2022

Nasa 87.2 porsiyento na ng mga balota na gagamitin para sa 2022 elections ang nai-print na, ayon sa Commission on Elections (Comelec).

“As of today, we are able to print already 58,838,453 of the 67,442,616 ballots that we will be using in the 2022 national and local elections,” sabi ni Comelec Commissioner George Garcia sa isang press conference ngayong Huwebes.

“The 58 million something represents 87.2% of the total number of ballots that we are supposed to print,” dagdag ng opisyal. Sinabi ni Garcia na sa mahigit 58 milyong balota, nasa 39,433,714 ang nakapasa sa pinakamataas na quality control at beripikasyon na isinagawa.

Ang bilang naman ng mga depektibong balota ay nasa 105,853 na nagre-represent ng 0.18% ng kabuuang balota, kung saan mas mababa ito kumpara sa 0.19% na nai-record noong Marso 21.

Ayon kay Garcia, ang vote counting machines naman ay nasa 61.7% na handa na para i-dispatch, ang external batteries na nasa 91.09%, transmission devices na nasa 100%, at ang consolidation and canvassing systems ay nasa 55.54% na.

Binuksan naman ng Comelec ang mga pintuan ng National Printing Office (NPO) para maipakita ang proseso ng ballot printing sa iba’t ibang kasapi sa eleksyon.