Paghahanda sa halalan at post-elections... Mga guro, no on-site reporting mula Mayo 2-13 – DepEd

ni Zel Fernandez | April 30, 2022

Batay sa inilabas na opisyal na pahayag ng Department of Education (DepEd) kahapon nang Biyernes, Abril 29, aprubado na ng Kalihim ng Edukasyon sa isinagawang joint Execom-Mancom meeting ang rekomendasyon ng Regional Directors at Division Superintendents na payagan ang mga guro na hindi mag-report on-site sa Mayo 2 hanggang 13.

Batay ito sa pagsasaalang-alang ng interes ng serbisyo at ng teaching force, na inihain sa pamamagitan ng Governance and Operations Strand.

Kaugnay nito, halos karamihan ng mga guro na tinatayang nasa 640,000 ay inaasahang maglilingkod sa pambansa at lokal na eleksiyon sa Mayo 9.

Kasabay nito, gumagawa ng mga paghahanda ang mga guro at mga paaralan sa bansa para sa mga aktibidad kaugnay ng eleksiyon at ng mga lugar ng pagbobotohan o presinto bago ang araw ng eleksiyon.

Gayundin, magkakaroon ng agarang post-election activities sa mga eskuwelahan at ng mga guro na nakatalaga para sa eleksiyon.

Samantala, ang mga gurong hindi kabilang sa darating na halalan ay inaasahang patuloy na mag-aasikaso ng mga gawain kabilang ang pagtapos ng mga school forms, paghahanda ng mga instruksiyunal na material o learning plans, at ebalwasyon ng mga outputs/portfolios ng mga estudyante.

Ang pagpapatupad ng naturang desisyon ay sang-ayon sa atas ng kalihim sa Governance and Operations at ang Curriculum and Instruction strands na magbigay ng mga naaangkop na patnubay sa mga field units nito.

DILG: 41K police personnel, itinalaga sa mga Comelec checkpoints

ni Lolet Abania | April 29, 2022

Mahigit sa 41,000 police personnel ang nakatakdang italaga sa mga checkpoints sa buong bansa para i-secure ang pagsasagawa ng May 9 elections, ayon sa Department of the Interior and Local Government (DILG) ngayong Biyernes.

Sa Laging Handa public briefing, sinabi ni DILG spokesperson Undersecretary Jonathan Malaya na ito ay karagdagan sa 16,820 pulis na na-designate para sa kanilang tungkulin sa eleksyon.

“Mayroon tayong nakatalagang 16,820 na mga PNP personnel for election duties. May karagdagang 41,965 personnel na nakatalaga sa 5,431 checkpoints sa buong bansa,” ani Malaya.

Ayon pa kay Malaya, na ang dalawang mga mobile forces ay nakatuon sa bawat probinsiya para sa seguridad sa araw ng eleksyon.

Nagmiting sa Mandaluyong... 19 mayors, tiniyak ang ‘landslide win’ ni BBM sa Bulacan

ni Zel Fernandez | April 26, 2022

Sa isang post ng Partido Federal ng Pilipinas Facebook page noong Sabado, Abril 23, idineklara umano ng 19 na incumbent mayors at mayoralty candidates mula sa lalawigan ng Bulacan ang ‘landslide win’ ni presidential candidate Bongbong Marcos, Jr. sa kani-kanilang lugar sa 2022 national elections sa Mayo 9.

Sa pakikipagpulong ng mga Bulacan mayors kay Marcos sa kanyang punong-tanggapan sa Mandaluyong nitong Biyernes, ibinigay umano ng mga alkalde ang garantiya ng pagkapanalo nito sa darating na halalan bilang susunod na pangulo ng bansa.

Kaugnay nito, pormal ding iniabot ng mga lokal na opisyal ng Bulacan ang kanilang pinirmahang manifesto ng pagsuporta kay Marcos at sa running-mate nitong si vice presidential candidate Mayor Inday Sara Duterte.

"Sa amin po iisa lang ang message. Panalo na, kaya lang ‘di tayo puwedeng matulog. At the end of the day bantay pa rin," pahayag ni incumbent Guiguinto Mayor Ambrosio Boy Cruz, Jr., na siyang pangulo ng League of Municipalities of the Philippines-Bulacan Chapter.

Ayon pa sa naturang FB post, kabilang sa grupo ng mga mayor na dumalo sina Christian D. Natividad ng Malolos, Vergel Meneses ng Bulakan, Mayor Amboy Manlapaz ng Hagonoy at mayoral candidate Flordeliza Cruz-Manlapaz, Ferdie Estrella ng Baliuag, Francis Albert Juan ng Bustos, at Henry Villarica ng Meycauayan.

Kasama ring dumalo sina Ricardo Silvestre ng Marilao, Edwin Santos ng Obando at mayoralty candidate Esperanza Santos, Guiguinto mayoralty candidate Agatha Paula Cruz, Crispin Castro ng Pandi, Eladio Gonzales, Jr. ng Balagtas, Jose Santiago, Jr. ng Bocaue, Arthur Robes ng San Jose Del Monte City, Eric Tiongson ng San Miguel, Jocell Casaje ng Plaridel, Mary Ann Marcos ng Paombong, at ang kinatawan ni Norzagaray Mayor Ade Cristobal na si Leo Nicolas.

Dahil dito, malugod na pinasalamatan ni Marcos ang mga alkalde at mga kandidato sa pagka-alkalde sa kanilang pag-endorso, kasabay ng paggigiit ng pangangailangan sa mahigpit na pagbabantay sa darating na eleksiyon.

"Ako naman tuluy-tuloy pa rin ang lakad ko, pero mababawasan na dahil andito na tayo sa tinatawag na endgame," pahayag ni Marcos.

Samantala, kinumpirma naman ng chief-of-staff at tagapagsalita ni Marcos na si Atty. Vic Rodriguez na kanila nang sinimulan ang training program ng PFP para sa mga poll watchers, at nagde-deploy na rin ang partido ng mga fully-trained volunteers sa buong bansa.

Dagdag pa ni Bongbong, "Palabasin at hikayatin natin sila (mga botante sa Bulacan) upang bumoto. Iyan naman talaga ang isa sa pinakaimportante sa darating na eleksiyon.”

Gayundin, bagaman maganda umano ang datos ni Marcos sa probinsiya, ayon sa ulat ng mga Bulacan mayors, mahigpit pa rin nitong paalala na maging mapagmatyag upang masawata ang mga magtatangkang manipulahin ang resulta ng 2022 elections sa lalawigan.

Pahayag naman ni Cong. Rida Robes ng nag-iisang distrito ng Lungsod ng San Jose Del Monte na nakipagpulong kay Marcos, "Alam natin kung ano ang kailangan ng tao. You have a good heart. You can really lead the country. All we have to do is support you, to let the people vote for you. For all of us here in our own districts, we have to make this campaign real."