400B budget, ilalaan daw 'pag nanalong pangulo... Nag-fill out sa pabahay forms ni Pacquiao, 30-M na

ni Zel Fernandez | May 2, 2022

Umabot na umano sa 30 milyong indibidwal ang nag-fill out sa pabahay forms ni presidential candidate Manny Pacquiao na bukod sa pangakong pabahay ay nag-aalok din umano ng pangkabuhayan at scholarship sa kanyang mga tagasuporta.

Ayon kay Pacquiao, nasimulan na ang pagpapadala ng mga text messages sa kanyang mga tagasuporta bilang kumpirmasyon ng kanilang pag-fill out sa pabahay forms sa kasagsagan ng eleksiyon.

Bagaman, aminado rin umano si Pacman na may kabagalan ang pagsasagawa ng hakbang ng kanyang kampo para sa naturang proyekto, bunsod ng napakaraming tumatangkilik ng kanyang pabahay form, nanawagan ang presidential candidate sa publiko na itago lamang daw ang natanggap nitong mga ID.

Pahayag ng presidential aspirant sa media briefing nito sa Cagayan De Oro City, ine-encode na aniya ng kanyang kampo sa kanilang database ang pangalan ng bawat residente sa mga lugar na kanilang napuntahan.

Kaugnay nito, kung papalarin umanong manalo sa pagka-pangulo ay target ni Pacquiao na maglaan ng 300 hanggang 400 bilyong pisong budget upang bigyang-katuparan ang adhikaing makapagpatayo ng mga pabahay sa buong bansa.

Samantala, binuweltahan naman nito ang mga nagpapasaring na pinaaasa lamang niya ang mga botante at ang mga pabahay forms ay ginagamit lamang nito upang mangalap ng mga boto ngayong darating na 2022 elections.

Giit ni Pacquiao, bago pa man niya pasukin ang pulitika ay nagsasagawa na aniya siya ng mga housing projects, hindi tulad ng kanyang mga kapwa politiko na hindi naman umano naisasakatuparan ang mga pangako tuwing eleksiyon.

40K tropa, ikakalat sa May 9 elections – AFP

ni Lolet Abania | May 1, 2022

Magtatalaga ang Armed Forces of the Philippines (AFP) ng mahigit sa 40,000 sundalo o personnel sa buong bansa para sa May 9 national at local elections.

Sa isang interview ngayong Linggo kay AFP spokesperson Army Colonel Ramon Zagala, sinabi nito na si AFP chief of staff General Andres Centino ay nagbigay na ng direktiba sa kanila na i-adopt nila ang dalawang paraan o mode ng operasyon para sa nalalapit na eleksyon.

“’Yan ay ang election mode which means lahat ng election duties at tasks, at ang combat mode para ma-suppress natin ang lahat ng threat groups at lawless elements,” saad ni Zagala.

Binanggit ng opisyal na ang 40,000 AFP troops na ikakalat sa lahat ng rehiyon sa bansa ay nakatakdang mag-monitor sa 14 lungsod at 105 bayan na itinuturing bilang “election areas of concern” sa ilalim ng tinatawag na highest red category.

“Lahat ng area commands nagdagdag tayo ng tropa. Iba-iba ‘yung numbers depende sa pangangailangan,” ani Zagala.

“Lahat ng available nating kasundaluhan will be made available for them. Kung kinakailangan pa, pwede pang dagdagan,” sabi pa niya.

Sara, Baste at Paolo, bet pa rin sa Davao... Mga anak ni Duterte, nangunguna sa survey!

ni Zel Fernandez | May 1, 2022

Batay sa isinagawang Ateneo de Davao University Blue Vote 2022 Off Campus City-wide survey nitong Abril 2 hanggang 18, lumabas sa resulta na nananatiling pabor umano ang mga residente ng Davao City sa mga anak ni Pangulong Rodrigo Duterte na maging elected officials sa darating na 2022 National and Local Elections.

Sa detalye ng naturang survey, nanguna umano si vice presidential candidate at incumbent Mayor Sara Duterte na nakakuha ng 89.3% mula sa 1,594 respondents sa buong lungsod.

Nanguna rin si Vice Mayor Sebastian Duterte sa pagtakbo nito sa pagka-alkalde sa Davao City na mayroon namang 86% mula sa 1,464 respondents.

Base rin sa datos, pinangunahan naman ni Congressman Paolo Duterte ang unang distrito ng lungsod para sa muli nitong pagtakbo na pinaboran ng 82.93% katao mula sa 498 respondents.

Samantala, nangunguna rin daw sa lungsod ang running mate ni Sara Duterte na si presidential candidate Bongbong Marcos na nakakuha ng 79.8% mula sa 1,594 respondents, habang sinundan naman ito ni Vice President Leni Robredo na pinaboran ng 2.1% respondents sa survey.