Sakaling may ma-heat stroke, himatayin atbp... Private hospitals, to the rescue sa May 9 elections

ni Zel Fernandez | May 4, 2022

Nagpahayag ang mga pribadong ospital ng kahandaan sa pagbibigay ng tulong sa mga botanteng magkakasakit kasunod ng nalalapit na 2022 national at local elections sa Mayo 9.

Ayon kay Private Hospital Association of the Philippines (PHAPI) Pres. Dr. Jose De Grano, nakahanda aniya ang mga pribadong ospital na magpadala ng ambulansiya at medical personnel, bilang pagresponde sa mga botanteng posibleng ma-heat stroke, himatayin at makaranas ng iba pang uri ng emergency sa kasagsagan ng halalan.

Ani Dr. De Grano, inaasahang magiging siksikan at magkakaroon ng pila ng mga botante sa mga polling centers, na maaaring sumabay sa mainit na panahon.

Gayundin, ipinaalala ni Dr. De Grano sa mga botante na magsuot ng facemask at magbaon ng personal na alcohol at sanitizer.

Kaakibat nito, muling iginiit ng mga ospital na patuloy na mag-ingat at proteksiyunan ang kalusugan laban sa COVID-19 at sa iba pang mga nakahahawang sakit na maaaring makuha ngayong eleksiyon.

2 VCMs, pumalya sa final testing... Paliwanag ng Comelec: 'Isolated case lang'

ni Zel Fernandez | May 4, 2022

Isinagawa na ng Quezon City Comelec ang final testing at sealing ng vote counting machines (VCM), kahapon.

Ayon sa ulat, dalawa mula sa 351 VCMs ang pumalya sa isinagawang pag-testing ng ahensiya.

Paliwanag ng Comelec, isolated case lamang umano ito at kanilang tiniyak na kagyat ding papalitan ang mga pumalyang VCMs.

Kaugnay nito, kasunod ng pagbalasa ng Commission on Elections sa kanilang city board of canvassers chairman sa Quezon City, nakatakdang palitan ang kasalukuyang City Board of Canvassers Chairman ng lungsod na si Atty. Zenia Ledesma-Magno.

Gayunman, hindi pa malinaw kung sino ang papalit kay Magno, matapos mapag-alamang bukas na mangyayari ang palitan ng chairmanship.

Batay sa kapangyarihan ng Comelec, maaari itong maglipat o magre-assign ng mga tauhan upang matiyak na magiging maayos, tapat, at mapayapa ang eleksiyon sa bansa.

Samantala, tinatayang aabot umano sa mahigit 1.4 milyon ang rehistradong botante sa Quezon City mula District 1 hanggang District 6.

Iwas-COVID-19... Magpa-booster shots, bago bumoto sa Election Day – P-Du30

ni Lolet Abania | May 3, 2022

Hinimok ni Pangulong Rodrigo Duterte ang publiko na magpabakuna na ng COVID-19 booster shots bago bumoto sa May 9 elections upang maprotektahan ang sarili sa posibleng impeksyon sa mga polling precincts na dadagsain ng mga botante.

“‘Yung booster shots ninyo, it’s still available at anybody can have it because it’s election time. There will be crowding again of people congregating and it would be good to have the booster shots before you go out and mix with the crowd,” sabi ni Pangulong Duterte sa kanyang Talk to the People na ipinalabas ngayong Martes nang umaga.

Paliwanag ng Pangulo, maaaring ang booster shots ay hindi 100% guarantee na wala o hindi tatamaan ng COVID-19 infections lalo na sa mga mahihina ang immune systems, subalit puwede itong makatulong na protektahan ang sinuman laban sa viral disease.

“If normal ka lang, hindi ka masakitin, it can protect you and you can vote there without any… sans the worry about getting the infection again,” ani Pangulo.

Una nang ipinaalala ni Pangulong Duterte sa mga botante na sumunod sa mga minimum public health standards sa mga polling precincts sa Election Day upang maiwasan ang isa pang COVID-19 surge sa bansa lalo na’t kinokonsidera, sa hiwalay na babala ng Department of Health (DOH) at OCTA Research, ang posibleng pagtaas ng COVID-19 infections.

“Still, we’re in the COVID-19. Complacency is really the… it would be the enemy of the matter of preventing again or allowing the COVID-19 to come back. Sabagay, it would not be as serious like before, kasi bakunado tayo,” saad ni Pangulong Duterte.

Nitong Lunes, ipinahayag ng DOH na nasa mahigit 67.9 milyong indibidwal o 75.45% na target population ng gobyerno ang fully vaccinated na kontra COVID-19 sa ngayon, habang nasa 13.2 milyong Pilipino naman ang nakatanggap ng kanilang booster shots.