Kampana, patunugin din... 3-araw na taimtim na panalangin para sa Eleksyon 2022 — CBCP

ni Lolet Abania | May 8, 2022

Nanawagan ang Catholic Bishops’ Conference of the Philippines (CBCP) sa publiko na isagawa ang tatlong araw na taimtim na panalangin o “intense prayer” para sa gaganaping 2022 elections sa Lunes, Mayo 9.

Inaasahan ang bawat Katoliko, simula ngayong Linggo, Mayo 8 hanggang sa Martes, Mayo 10, na magbibigay ng oras para manalangin at upang magkaroon ng malinaw na kaisipan sa mga kandidatong karapat-dapat na kanilang iboboto.

Ayon kay CBCP president at Caloocan Bishop Pablo Virgilio David, ang pananalangin o pagdarasal ang isa sa pinakamainam na paraan para makatulong sa mga Pilipino sa pagpili ng kanilang bagong iluluklok na mga lider ng bansa.

“We can only fight this battle in the best way we can – through prayer and well-discerned action,” saad ni Bishop David.

Hinikayat din ng CBCP, ang mga obispo at arsobispo na kanilang patunugin ang mga kampana ng mga simbahan nang umaga, sa pagsisimula pa lang ng eleksyon sa Mayo 9, na tatagal ng 10 minuto.

Ani Bishop David, simbolo umano ito para mataboy ang mga posibleng ilegal na gagawin ng mga kandidato tulad ng vote-buying, pananakot at iba pang uri ng karahasan sa panahon ng eleksyon.

Kaugnay umano sa eleksyon — PNP: 24 katao, arestado sa shooting incident sa Nueva Ecija

ni Lolet Abania | May 8, 2022

Dalawampu’t apat na indibidwal ang inaresto, lima rito ang nasugatan sa naganap na shooting incident na hinihinalang may kaugnayan sa eleksyon sa Nueva Ecija, kung saan sangkot ang security personnel ng incumbent mayor na si Isidro Pajarillaga at mayoral candidate na si Virgilio Bote, ayon sa Philippine National Police (PNP) ngayong Linggo.

Sa isang press conference, ini-report ni PNP spokesperson Police Colonel Jean Fajardo na ang insidente ay naganap sa Purok Gulod, Barangay Concepcion, General Tinio, Nueva Ecija, bandang alas-11:45 ng gabi nitong Sabado.

“We are considering the incident in General Tinio, Nueva Ecija as a suspected election-related incident considering that the involved parties there are the supporters and bodyguards of both candidates running for particular elective position,” saad ni Fajardo.

Ayon kay Fajardo, ang limang nasugatan ay agad na nabigyan ng medikal na atensyon subalit nasa kostudiya sila ng pulisya para sa imbestigasyon.

Inihahanda naman ng Nueva Ecija Police ang isasampang criminal charges para sa frustrated murder, dahil sa paglabag sa Republic Act 10591 at violation ng Omnibus Election Code (gun ban) laban sa mga naarestong mga suspek, sabi rin ni Fajardo.

Nagsagawa naman ang mga imbestigador ng Scene of the Crime Operatives (SOCO) ng pagsisiyasat sa crime scene, kung saan limang basyo ng bala na tumama sa sports utility vehicles ang kanilang narekober.

Nakakumpiska rin mula sa mga inarestong indibidwal ng limang M-16 rifles, isang 12-gauge shotgun, 15 handguns, at mahigit sa 200 rounds ng assorted live ammunition. Gayundin, 20 cell phones, tatlong handheld radio, at campaign leaflets ni Pajarillaga ang narekober ng mga awtoridad, ayon kay Police Regional Office 3 Police Major Aileen Rose Stanger.

“Ang ating pulisya po ay nag-e-exert ng lahat ng effort para ma-mitigate ang occurrence ng violence dito sa four corners ng Region especially ngayong election period,” sabi pa ni Stanger.

Comelec, security forces: 'Pinas, handa na para sa Halalan 2022

ni Lolet Abania | May 8, 2022

Handang-handa at full alert na ang buong puwersa ng seguridad ng Pilipinas at Commission on Elections (Comelec) para sa Halalan 2022 bukas, Mayo 9, 2022.

Ngayong Linggo, maraming dumalo na mga Comelec commissioners at mga opisyal ng security forces ng bansa sa ginawang walkthrough inspection ng Philippine International Convention Center (PICC), kung saan ang National Board of Canvassers (NBOC) ay nakatakdang mag-convene sa Lunes.

Kabilang sina Comelec Chairman Saidamen Pangarungan, Commissioner George Garcia, Spokesperson Director John Rex Laudiangco, Philippine National Police (PNP) officer-in-charge Vicente Danao Jr., Armed Forces of the Philippines (AFP) Chief Andres Centino, at Philippine Coast Guard (PCG) Commandant Artemio Abu na nakiisa sa naturang inspeksyon.

Sa ginanap na press briefing, tiniyak ni Danao na mayroong 225,000 PNP personnel ang nakakalat at handang magsilbi para siguruhin at i-secure na tama at patas ang magaganap na eleksyon.

Gayundin, inanunsiyo ni Danao ang pagpapatupad ng nationwide total liquor ban, na epektibo ito noon pang Sabado nang gabi, Mayo 7 hanggang Lunes, Mayo 9.

Nagbabala naman ang PNP OIC sa mga susubok na magsagawa pa ng campaign activities ngayon dahil aniya, kanila itong huhulihin.

Binanggit naman ni Centino na ang AFP personnel ay full alert na rin, kabilang ang kanilang naval at air assets na handa na para sa May 9 elections.

“I have reminded our troops deployed all over the country to always remain non-partisan and neutral. And we assure the public that all our troops are on full alert as we have declared this full alert status yesterday. We will be ready with all our resources. Air and naval assets have been made available, and we are at this point- implementing the plans we prepared way before the election campaign,” ani Centino.

Sinabi naman ni Abu na ang Coast Guard ay handa na rin para tiyakin ang pagkakaroon ng ligtas na eleksyon.

“The guiding principle of the Comelec will be to protect the sanctity of the vote by all means and in whatever circumstances. Together with our partner agencies, the PNP, AFP, PCG, DepED, and other government agencies, we are going to pursue this to the end,” pahayag ni Pangarungan.