Proklamasyon ng nanalong partylists sa Mayo 26 o 27 — Comelec

ni Lolet Abania | May 24, 2022

Target ng Commission on Elections (Comelec) na maiproklama ang mga nanalong partylist groups sa 2022 elections sa Mayo 26 o Mayo 27, 2022.

Ayon kay acting Comelec Spokesperson Rex Laudiangco, kinokonsidera ng Comelec dito ang “time frame” para sa transmission at canvassing of results kapag ang special elections sa Tubaran, Lanao del Sur ay nagsara na ngayong Martes ng gabi.

Aniya, kapag natapos na ang special elections sa Tubaran, ita-transmit ng municipal board of canvassers at ika-canvass ang resulta, kung saan ipo-forward naman ito sa provincial board of canvassers ng Lanao del Sur.

Inaasahang matatanggap ng Comelec ang certificate of canvass mula sa provincial board of canvassers sa Miyerkules, Mayo 25. Kasunod nito, ang National Board of Canvassers (NBOC), gayundin ang mga concerned committees at iba pang grupo ang magpoproseso ng mga ito.

Ia-apply nila rito ang formula ng Supreme Court (SC) upang matukoy ang mga nanalong partylist groups habang lalagda sila ng isang resolusyon hinggil sa usapin.

Ayon kay Laudiangco, plano nilang maiproklama ang lahat ng 63 nanalong partylists, kung ang 1,900 natitirang mga boto mula sa Shanghai, China ay hindi makakaapekto sa resulta nito.

Kaugnay nito, sinabi ni Laudiangco na maraming partylists ang naghain na ng petisyon para palitan ang kanilang mga nominees. Kabilang sa mga petisyon ang withdrawal, substitution, at kamatayan ng mga nominees.

P2K dagdag-honoraria sa poll workers na nag-OT — Comelec

ni Lolet Abania | May 23, 2022

Nasa P2,000 ang ibibigay ng Commission on Election (Comelec) na karagdagang honoraria sa bawat poll worker na nakaranas ng mga delays at issues o nag-overtime sa panahon ng 2022 elections.

Sa press briefing ngayong Lunes, sinabi ni Commissioner George Garcia na ang additional pay ay ibibigay sa mga poll workers sa 2,308 precincts na naka-experience ng malfunctions sa mga vote counting machines at SD cards.

“Ginawan na po namin ng paraan na kahit paano lahat po ng miyembro ng mga electoral board, DESO staff, support staff ay pantay-pantay makakakuha ng tig-P2,000,” pahayag ni Garcia.

Humingi naman ng paumanhin si Garcia sa mga concerned teachers dahil sa hindi maibibigay ng Comelec ang halaga na hinihiling ng Department of Education (DepEd) para sa kanilang additional pay.

Ayon kay Comelec acting spokesperson Rex Laudiangco, ang mga poll workers na nakaranas ng anumang uri ng isyu, hindi lamang kaugnay sa VCMs at SD cards, ay makatatanggap ng extra compensation.

“’Yan po ‘yung lahat ng naka-experience ng issues, hindi lamang ito ‘yung pinull out ‘yung VCM. So all issues -- VCM, SD cards, procedural -- na naka-experience ng delay sinama na po namin sila lahat sila ay iko-compensate na,” paliwanag ni Laudiangco.

Sinabi naman ni Election Task Force head Atty. Marcelo Bragado Jr. na tinatayang nasa 647,812 personnel ng DepEd ang nagsilbi bilang poll workers sa katatapos na eleksyon.

Para sa president at VP canvassing.. Congress, nagpasa ng panuntunan — Comelec

ni Lolet Abania | May 22, 2022

Asahan na ang Senate at ang House of Representatives na magpapasa ng guidelines para sa kanilang sariling canvassing ng mga certificates of canvass (COC) sa katatapos na 2022 elections kapag nagpatuloy na ang kanilang mga sessions, ayon sa Commission on Elections (Comelec).

Sa isang radio interview ngayong Linggo, sinabi ni Comelec Commissioner George Garcia na ang 172 mula sa 173 COCs na na-canvass na ng Comelec, tumatayo bilang National Board of Canvassers (NBOC), ay maaaring naipasa na sa Congress sa oras ng pagsisimula ng official count ng mga votes para sa pagka-pangulo at pagka-pangalawang pangulo.

“Sa aking palagay, ang una nilang gagawin, ang first agenda nila, siguradong sigurado ‘yung pagpasa ng rules, ‘yung guidelines ng canvassing nila. Hindi po nila siyempre ia-adopt ‘yung rules namin ng canvass at sa pagkakaalam natin, nag-draft na sila ng kanilang rules at for approval bukas ng Senado at saka Mababang Kapulungan,” saad ni Garcia.

Sa ilalim ng 1987 Constitution, ang mga election returns (ER) ng bawat halalan para sa pangulo at bise presidente, na duly certified ng board of canvassers ng kada probinsiya o lungsod, ay kailangang i-transmit ang mga ito sa Congress, direkta sa Senate President.

Nakasaad pa rito, “Upon receipt of the certificates of canvass, the Senate president shall, not later than 30 days after the day of the election, open all the certificates in the presence of the Senate and the House of Representatives in joint public session, and the Congress, upon determination of the authenticity and due execution thereof in the manner provided by law, will canvass the votes.”

Sa Mayo 23, nakatakda naman ang Senate at ang House of Representatives na mag-resume ng kanilang mga sessions.

Matapos nito, ang Congress ay magko-convene na NBOC para simulan ang opisyal na bilangan ng mga boto sa pagka-pangulo at pagka-pangalawang pangulo.

Gayunman, ayon kay Garcia, teknikal na magsisimula ang Congress ng kanilang canvassing sa Martes, mula alas-10:00 ng umaga hanggang alas-10:00 ng gabi.

Samantala, nakatakda ang Comelec na magsagawa ng special elections sa Tubaran, Lanao del Sur – ang nag-iisang lugar na nakatakda namang magsumite ng kanilang COC sa Mayo 24, matapos na mai-report ng failure of elections na unang sinabi ni acting poll spokesperson John Rex Laudiangco.

Kaugnay nito, naghahanda na ang Senado para sa paglilipat sa Batasang Pambansa ng mga COC at ER sa pag-canvass nito at sa napipintong proklamasyon ng mga nagwagi sa presidential at vice presidential race. Bukas nakatakdang dalhin sa Batasang Pambansa ang mga naturang COC at ER, habang ihahanda muna ng mga tauhan ng Office of the Senate Sergeant-at-Arms ang mga ballot boxes na naglalaman ng mga ito.

Ayon kay Senate Sergeant-at-Arms Gen. Rene Samonte, alas-4:00 ng madaling-araw ng Lunes, ililipat sa Kamara ang mga ballot box.

Tutulong naman ang Philippine National Police (PNP) sa kanila para matiyak ang seguridad ng paglilipat ng mga ballot boxes habang isinasakay ang mga ito sa mga trak ng militar.