P272 M campaign spending ng May 9 elections, idineklara ng partido ni Marcos

ni Lolet Abania | June 6, 2022

Umabot sa P272 milyon ang naging gastos ng Partido Federal ng Pilipinas (PFP), ang political party ni President-elect Ferdinand “Bongbong” Marcos Jr. para sa May 2022 elections, base sa kanilang Statement of Contributions and Expenditures (SOCE).

Ayon kay Atty. George Briones, PFP general counsel, ang P272 milyong halaga ng kanilang mga nagastos sa nakalipas na presidential campaign aniya, “well below the maximum expenditure of P337 million allowed by law for a national political party.”

Ang 400-page SOCE, na inihain sa Commission on Elections (Comelec) ngayong Lunes, ay nilagdaan ni PFP national treasurer Anton Lagdameo na siyang napili ni Marcos na maging Special Assistant to the President (SAP) sa ilalim ng kanyang administrasyon.

Nilinaw naman ni Atty. Rico Alday ng PFP na ang halagang ito ay mga gastusin lamang ng political party. Aniya, ang malaking bahagi nito ay alokasyon para sa mga advertisements sa telebisyon.

Ayon kay Alday, nakapaglaan din ang partido ng malaking bahagi ng P272 milyon para sa mga expenses sa rally. “I think kayo na rin ang makakapagsabi niyan, it’s TV ads. TV ads ‘yung malaking bulk,” pahayag ni Alday sa mga reporters.

“Well of course, voluminous ‘yung document, ngayon lang namin natapos,” dagdag ni Alday nang tanungin siya kung bakit naisumite ang SOCE ngayon lamang Hunyo 6.

Batay sa Section 14 ng Republic Act 7166 ay nakasaad, “every candidate and treasurer of the political party shall, within 30 days after the day of the election, file in duplicate with the offices of the Commission the full, true and itemized statement of all contributions and expenditures in connection with the election.”

Dagdag pa rito: “No person elected to any public offices shall enter upon the duties of his office until he has filed the statement of contributions and expenditures herein required.”

55 partylist groups, ipoproklama na — Comelec

ni Lolet Abania | May 26, 2022

Nakatakdang iproklama ng Commission on Elections (Comelec) ang mga nanalong 55 partylist groups ng May 9 national at local elections, na gaganapin ngayong Huwebes, Mayo 26, 2022, alas-4:00 ng hapon sa Philippine International Convention Center (PICC) sa Pasay City, kung saan isinagawa ang canvassing of votes.

Ang mga partylist groups na nagwagi sa eleksyon ay ang mga sumusunod:

1. ACT-CIS

2. 1-Rider PL

3. Tingog

4. 4PS

5. Ako Bicol

6. Sagip

7. Ang Probinsyano

8. Uswag Ilonggo

9. Tutok to Win

10. CIBAC

11. Senior Citizens PL

12. Duterte Youth

13. Agimat

14. Kabataan

15. Angat

16. Marino

17. Ako Bisaya

18. Probinsyano Ako

19. LPGMA

20. API

21. Gabriela

22. CWS

23. Agri

24. P3PWD

25. Ako Ilocano Ako

26. Kusug Tausug

27. An Waray

28. Kalinga

29. Agap

30. Coop-NATCO

31. Malasakit@Bayanihan

32. BHW

33. GP Party

34. BH

35. ACT Teachers

36. TGP

37. Bicol Saro

38. Dumper PTDA

39. Pinuno

40. Abang Lingkod

41. PBA

42. OFW

43. Abono

44. Anakalusugan

45. Kabayan

46. Magsasaka

47. 1-PACMAN

48. APEC

49. Pusong Pinoy

50. TUCP

51. Patrol

52. Manila Teachers

53. Aambis-OWWA

54. Philreca

55. Alona

Nakasaad sa batas na ang isang partylist group na makakuha ng tinatayang 2% ng kabuuang bilang ng naging mga boto sa party-list race ay entitled sa tinatayang isang seat sa House of Representatives.

Para sa mga lumampas ng 2% threshold, sila ay entitled naman sa karagdagang seats na proporsyunal sa bilang ng naging mga boto, subalit ang kabuuang bilang ng seat para sa bawat nanalong partylist group ay hindi maaaring mag-exceed sa tatlo.

Para sa mga hindi nakakuha ng 2% requirement, maaari pa ring maka-secure ng isang seat sa House of Representatives dahil ayon sa batas, kailangan na 20% ng House members ay magmumula sa partylist ranks.

Canvass ng 2022 election votes para sa pangulo at VP, tapos na.. Marcos at Sara, iprinoklama — NBOC

ni Lolet Abania | May 25, 2022

Tinapos na ng Congress, tumatayong National Board of Canvassers (NBOC), ang opisyal na tallying of votes para sa pangulo at pangalawang pangulo sa 2022 national and local elections.

Idineklara ng Joint Canvassing Committee (JCC), na co-chaired nina Senate Majority Leader Juan Miguel Zubiri at House Majority Leader Martin Romualdez, ang completion ng proseso ng certificates of canvass (COCs) ng alas-3:33 ng hapon ngayong Miyerkules.

Ang canvassing ay tinapos na nila kahit wala pa ang canvassing ng overseas absentee voting (OAV) ng mga boto mula sa Argentina at Syria, kung saan ang mga ballot boxes sa naturang mga bansa ay hindi pa dumating.

Isang report ng canvass ang ihahanda ng JCC at isusumite ito sa Joint Public Session ng House of Representatives at ng Senate of the Philippines. Batay sa rules, “the JCC report shall be approved by a majority of votes of all its members, each panel voting separately. The report shall be signed by the majority of the members of each panel.”

Matapos nito, ang mga chairpersons ng JCC ay ipiprisinta at i-sponsor ang report, habang sinasamahan ito ng Resolution of Both Houses na magpoproklama sa duly-elected president at vice president.

Sa adoption ng Resolution of Both Houses, sina Senate President Vicente Sotto III at Speaker Lord Allan Velasco ay ipoproklama na ang mga nahalal at iluluklok na pangulo at pangalawang pangulo.

Base sa partial at unofficial tally, si dating Senator Ferdinand “Bongbong” Marcos Jr. ang nanguna sa 2022 elections sa presidential race na may 31,104,175 votes, kasunod ni Vice President Leni Robredo na may 14,822,051 votes.

Para sa vice-presidential race nanguna si Davao City Mayor Sara Duterte, ang anak ni outgoing President Rodrigo Duterte, na may 31,561,948 votes, kasunod si Senator Francis Pangilinan na may 9,232,883 votes.

Ayon sa GMA News Research, ang napipintong proklamasyon ni Marcos, ang pinakamabilis na presidential proclamation matapos ang 1986 EDSA Revolution.

Noong 1992, ang proklamasyon ni dating Pangulong Fidel V. Ramos ay inabot ng 42 araw matapos ang eleksyon; 18 araw para sa proklamasyon kay dating Pangulong Joseph Estrada noong 1998; 45 araw para sa proclamation ni dating Pangulo Gloria Macapagal-Arroyo; 30 araw para sa proklamasyon ng yumaong dating Pangulong Benigno Aquino III; at 21 araw para sa proklamasyon ni outgoing President Rodrigo Duterte. Umabot lamang ng 16 araw ang proklamasyon ni Marcos matapos ang May 9 national at local elections.