4Ps, tuturuan ng tamang pagboto — COMELEC

ni Madel Moratillo | June 13, 2023

Plano ng Commission on Elections (Comelec) na magsagawa ng voter education sa mahigit 1 milyong benepisyaryo ng Pantawid Pamilyang Pilipino Program (4Ps).

Ayon sa Comelec, makakatuwang nila rito ang Department of Social Welfare and Development (DSWD).

Layon umano ng programa na maipaunawa sa mga ito ang kahalagahan ng demokrasya at maturuan sila na maging responsable at edukadong botante.

Magkakaroon din ng orientation patungkol sa step-by-step process ng voter registration, mga kwalipikasyon at tungkulin ng inihalal na mga opisyal sa Barangay at Sangguniang Kabataan.

Layon din nito na malabanan ang mga maling impormasyon tuwing halalan.

Ang naturang voter’s education campaign para sa 4Ps ay matagal na ring isinusulong ng poll body. Ito ay para malabanan din ang vote buying tuwing halalan.

Mandatory drug test sa kandidato, ilegal — COMELEC

ni Madel Moratillo | May 27, 2023

Aminado ang Commission on Elections na labag sa batas ang mandatory drug test para sa mga kandidato sa Barangay at Sangguniang Kabataan Elections.

Pero ayon kay Comelec spokesperson Atty. John Rex Laudiangco, wala namang makakapigil sa kanila kung boluntaryo silang magpapa-drug test.

Una rito, hinamon ni Interior and Local Government Secretary Benhur Abalos ang mga kandidato na magpa-drug test.

Ayon kay Laudiangco, makakatulong sa mga kandidato kung boluntaryo nila itong gagawin.

Kaugnay nito, muling tiniyak ni Comelec Chairman George Garcia ang kahandaan sa BSKE.

Naimprenta na aniya nila ang 92 milyong balota kasama ang lahat ng gagamiting election returns, statement of votes, at iba pa.

Ang kulang na lang aniya ay ang training ng mga guro na magsisilbi sa electoral boards.

Kung walang 'K' ang kandidato.. COC, 'di na tatanggapin ng COMELEC

ni Madel Moratillo | April 23, 2023

Puwede nang tanggihan ng mga tanggapan ng Commission on Elections (Comelec) ang nais kumandidato sa Barangay at Sangguniang Kabataan Elections.

Nabatid na maglalabas ang Comelec ng patakaran hinggil sa paghahain ng certificate of candidacy (COC).

Ang paghahain ng kandidatura ay una nang itinakda sa Agosto 28 hanggang Setyembre 2.

Ayon kay Comelec Chairman George Erwin Garcia, ang mga hindi lang naman tatanggapin ay mga hindi kwalipikadong aspirante.

Paliwanag ni Garcia, sa mga nakaraang halalan ay tinatanggap nila lahat ng mga COC nang hindi na tinitingnan kung kwalipikado ang mga nais kumandidato o hindi.

Ilan sa mga titingnan ay ang edad ng mga kandidato, nationality, residency, at iba pa.

Inihalimbawa ni Garcia noong 2018 BSKE kung saan umabot sa 6 na libo ang mga kaso para sa kanselasyon ng hindi kwalipikadong kandidato.

Napakahaba rin aniya ang proseso dahil sa kinakailangan itong pagdesisyunan pa ng Division office ng Comelec.