Bilanggo, bumoto ngayong BSKE

ni Angela Fernando - Trainee @News | October 30, 2023

Bumoto ang ilang mga bilanggo para sa Barangay at Sangguniang Kabataan Elections ngayong Lunes.

Inihayag ng kalihim ng Interior and Local Government na si Benhur Abalos na may umaabot sa 31, 125 na bilanggo ang boboto ngayong araw, Oktubre 30.

Dagdag niya, karapatan ng kahit na sino ang makaboto sa ilalim ng konstitusyon ng bansa at nakabantay naman ang DILG katulong ng Comelec upang masiguro ang kapayapaan hanggang matapos ang eleksyon.

Nagbaba naman ng utos si Abalos sa direktor ng Bureau of Jail Management and Penology na si Ruel Rivera upang siguraduhing maayos at malinis ang magiging botohan sa mga nakatakdang presinto ng mga bilanggo.

May mahigit sa 29,100 ang boboto sa loob ng mga presinto sa mga kulungan ngayong halalan at may 1,992 namang bilanggo ang sasamahan ng mga opisyal sa kanilang mga nakatalagang presinto.

Sobrang daming poll watchers, isumbong —DILG

ni Eli San Miguel - Trainee @News | October 29, 2023

Hinikayat ng Department of the Interior and Local Government ang publiko na mag-ulat ng malalaking bilang ng mga poll watcher sa Barangay and Sangguniang Kabataan Elections, dahil maaaring nagpapahiwatig ito ng potensyal na vote-buying.

Sa isang pahayag na inilabas bago ang halalan sa barangay, sinabi ni Interior Secretary Benhur Abalos na dapat mag-atas lamang ang mga kandidato ng dalawang watcher na magsisilbi nang salitan sa bawat polling center upang maiwasan ang mga alegasyon ng vote-buying.

"Hinihiling ko sa publiko na maging mapagmatyag at mag-ulat sa Comelec o DILG kung may mapansin silang presinto na umaapaw sa mga poll watchers. Iimbestigahan natin 'yan nang maigi at gagawan ng kaukulang aksyon," sabi ni Abalos sa isang pahayag.

Ayon sa Resolution 10946 ng Commission on Elections, maaaring may hinihinalang vote-buying kung nag-atas ang isang kandidato ng higit sa dalawang watcher bawat presinto.

Kapag napatunayang nagkasala ng vote-buying ang isang kandidato, maaaring makaharap ng pagkabilanggo na aabot sa anim na taon at habambuhay na pagdiskwalipika mula sa pagtakbo sa anumang pampublikong posisyon.

National federation para sa SK

ni Eli San Miguel - Trainee @News | October 29, 2023

Isang araw bago ang Barangay and Sangguniang Kabataan Elections, nanawagan si Sen. Sherwin Gatchalian para sa paglulunsad ng national federation para sa SK.

Sa isang pahayag ngayong Linggo, iginiit ni Gatchalian ang kahalagahan ng isang pambansang organisasyon na nakatuon sa pagpapalakas ng gampanin ng mga lider ng SK sa pag-unlad ng bansa.

Noong 2022, isinumite ni Gatchalian ang isang panukalang batas na naglalayong baguhin ang Section 21 ng SK Reform Act of 2015. Sa ilalim ng mungkahing hakbang, itatatag ang Nasyonal na Pederasyon ng Sangguniang Kabataan at bubuuin ito ng mga halal na presidente ng Panlalawigang Pederasyon ng Sangguniang Kabataan.

Sinabi ng senador na mapalalakas ang networking at consensus-building sa pamamagitan ng paglikha ng pambansang organisasyon ng SK, na makasisiguro ng mas mataas na kahusayan sa pagtugon sa mga isyu sa pamamahala at pagpapatupad ng mga proyekto.

Nagbibigay din ng probisyon ang mungkahing hakbang na maglilingkod bilang ex officio na miyembro ng Union of Local Authorities of the Philippines ang mga nahalal na miyembro ng Nasyonal na Pederasyon ng Sangguniang Kabataan.