Shaw Blvd. station’s Building A entry at exit points, sarado ng Marso 21-22 — MRT3

ni Lolet Abania | March 20, 2022

Inianunsiyo ng pamunuan ng Metro Rail Transit Line 3 (MRT3) ngayong Linggo na pansamantalang isasara ang Building A entry at exit points ng Shaw Boulevard Station mula Marso 21 hanggang Marso 22 (Lunes at Martes) para sa mga gagawing aktibidad ng pagsasaayos nito.

Batay sa advisory mula sa opisina ni MRT3 director for operations Engineer Michael Capati, ang entry at exit points na partikular na apektado ng improvement activities ay ang bahagi ng EDSA Shangri-La at ang mga gilid ng Starmall.

Ayon kay Engr. Capati, layon ng naturang aktibidad ay upang pagandahin ang mga pasilidad para sa mas maayos na serbisyo at maginhawa rin sa mga commuters.

Payo naman ng MRT3 management sa mga commuters na gamitin muna ang entry at exit points sa Building B ng Greenfield Pavilion at ng Parklea Center sides.

Habang nasa Alert Level 1… MMDA paiigtingin ang no contact apprehension

ni Jasmin Joy Evangelista | March 3, 2022

Paiigtingin ng Metropolitan Manila Development Authority ang no-contact apprehension dahil tila ‘back to normal’ na ang daloy ng trapiko sa EDSA.

Ito ay para hindi maharang ang daloy ng trapiko at maiwasan ang heavy traffic ngayong nasa Alert Level 1 na ang NCR, ayon kay EDSA traffic "czar" Bong Nebrija.

"Ina-anticipate na natin na dadami na 'yung volume ng sasakyan sa EDSA and with that we will be intensifying 'yung no-contact apprehension. Traffic management will take priority over enforcement," ani Nebrija. 

Mananatili rin umano ang mga concrete barriers kahit pa mayroong mga aksidenteng kaugnay nito.

“Matagal na tayong nagkaroon ng steel bollards diyan sa pababa ng tunnel at saka pababa ng flyover. However, naubos na yan dahil binangga na ng mga sasakyan so we will see if we will come up with another scheme or another form of barricade na makakaprotekta sa mga commuters," ani Nebrija.

EDSA Caloocan at Pasay sections, sarado dahil sa road repair – DPWH

ni Lolet Abania | February 25, 2022

Isasailalim ang ilang section ng EDSA sa kahabaan ng Caloocan at Pasay City sa reblocking at repairs ngayong weekend, ayon sa Department of Public Works and Highways (DPWH) ngayong Biyernes.

Sa isang advisory, sinabi ng DPWH na ang gagawing road repairs ay magsisimula ng alas-11:00 ng gabi ng Biyernes, Pebrero 25 hanggang alas-5:00 ng madaling-araw ng Lunes, Pebrero 28.

Ang mga apektadong road sections ay ang mga sumusunod:

• EDSA northbound direction malapit sa Quirino Highway Exit;

• EDSA Caloocan southbound sa harap ng Biglang Awa Street, 4th lane mula sa sidewalk;

• Innermost lane o bus way mula sa E. Rodriguez Street patungong C. Jose Street, northbound sa Pasay City.

Pinapayuhan naman ng DPWH ang mga motorista na humanap muna ng mga alternatibong ruta habang isinasagawa ang road repairs sa nasabing mga lugar.