Dagdag-pasensya sa biyahe

by Info @Editorial | December 21, 2025

Ang holiday season ay nagdadala rin ng matinding hamon sa sistema ng transportasyon. 

Mahahabang pila sa terminal, hindi inaasahang pagkaantala ng biyahe, at matinding trapik ang nagiging normal sa panahong ito. 

Gayunpaman, ang mas nakababahala ay ang pagtaas ng iritasyon at alitan sa pagitan ng mga motorista at pasahero. Ang kawalan ng pasensiya ay nagbubunga ng padalus-dalos na desisyon at paglabag sa batas-trapiko.

Hindi sapat ang sisihin ang dami ng sasakyan o pasahero. May malinaw na tungkulin ang pamahalaan na tiyakin ang maayos na pamamahala sa daloy ng trapiko, sapat na bilang ng biyahe, at agarang pagbibigay ng impormasyon sa publiko. 

Gayundin, may pananagutan ang mga transport operator na igalang ang karapatan ng pasahero at panatilihin ang kaligtasan bilang pangunahing prayoridad.

Ang disiplina, paggalang sa batas, at kakayahang magtimpi sa gitna ng anumang sitwasyon ay  masasabing pananagutang panlipunan. 

Sa panahong ang bawat minuto ay mahalaga at ang pagod ay sukdulan, ang panawagan para sa dagdag-pasensiya ay hindi simpleng paalala kundi isang paninindigan. 

Ang ligtas at maayos na paglalakbay ay hindi lamang responsibilidad ng iilan—ito ay tungkulin ng lahat.

Paulit-ulit na problema sa balikbayan box, tapusin na

by Info @Editorial | December 20, 2025

Kada taon, paulit-ulit na lamang ang kwento: may Pasko, may OFW na umaasa, at may balikbayan box na hindi dumarating sa oras. 

Sa halip na saya, pangamba at pagkadismaya ang bumabalot sa mga nagpadala at pamilyang naghihintay. 

Ang balikbayan box ay hindi ordinaryong kahon. Ito ay pinag-ipunan, pinagtiyagaan at kadalasang pinuno ng mga regalong hindi para sa sarili kundi para sa pamilya. 

Kapalit nito ang Paskong malayo sa mahal sa buhay, ang pagod sa ibang bayan, at ang lungkot ng mag-isang pagdiriwang. 

Kaya’t kapag ito’y natetengga sa pantalan o bodega dahil sa kapabayaan, malinaw na insulto ito sa dignidad ng mga OFW.

Kung may kakayahang maningil ng buwis at magpataw ng bayarin, dapat ding may kakayahang maghatid ng serbisyo nang maayos.

Hindi sapat ang pangakong “aayusin”. Ang kailangan ay konkretong pananagutan. May dapat managot at may sistemang dapat baguhin. 

Wala na sanang natetenggang balikbayan box dahil hindi natetengga ang sakripisyo ng mga OFW. 

Hindi rin dapat natetengga ang malasakit ng pamahalaan. Kung tunay na pinahahalagahan ang mga bagong bayani, patunayan ito—hindi sa salita, kundi sa maayos, mabilis, at tapat na serbisyo.

PNP, 'di puwedeng kampante lalo ngayong holiday

by Info @Editorial | December 19, 2025

Hindi puwedeng maging kampante ang Philippine National Police (PNP) ngayong papasok ang holiday season. 

Taun-taon, kasabay ng kasiyahan ang pagtaas ng krimen—nakawan, holdapan, at iba pang banta sa kaligtasan ng publiko. 

Kung mabibigo ang PNP na paigtingin ang seguridad, mamamayan ang direktang magdurusa.

Trabaho ng PNP na siguraduhing ligtas ang bawat Pilipino. Hindi sapat ang press release at pangakong “heightened alert”. Ang kailangan ay konkretong aksyon—mas maraming pulis sa kalsada, mas mahigpit na pagbabantay sa terminals, pamilihan, at simbahan, at agarang pagtugon sa anumang insidente. 

Ang kakulangan sa presensya ng pulis ay malinaw na imbitasyon sa mga kriminal.

Dapat ding managot ang mga pulis na pabaya o abusado. 

Ang seguridad ay hindi lamang tungkol sa armas at checkpoint, kundi disiplina at propesyonalismo. Walang puwang sa kapaskuhan ang mga pulis na hindi gumagalang sa mamamayan o nagbubulag-bulagan sa krimen.

Hindi rin dapat iasa ng PNP sa mamamayan ang kanilang pagkukulang. Oo, mahalaga ang kooperasyon ng publiko, pero malinaw na ang pangunahing responsibilidad ay nasa kapulisan. Ang taumbayan ay nagbabayad ng buwis para sa proteksyon, hindi para sa mga palusot kapag may nangyaring masama.

Ngayong holiday season, walang dahilan ang PNP para pumalya. Ang ligtas na Pasko at Bagong Taon ay hindi pabor na ibinibigay ng estado—ito ay karapatan ng bawat Pilipino.