CCTV, X-ray machines, K9, ipakalat para sa seguridad sa train stations

by Info @Editorial | Apr. 29, 2025

Araw-araw, napakaraming pasahero ang umaasa sa tren — LRT, MRT, at PNR — bilang pangunahing uri ng transportasyon. 

Dahil dito, ang seguridad sa mga train station ay hindi simpleng usapin lamang, kundi isang isyu ng pambansang interes. 

Kamakailan, sinabi ng pamunuan ng Department of Transportation (DOTr) na papalitan na ng mga K9 units ang X-ray machines sa mga istasyon at magkakaroon din umano ng karagdagang bantay na mga pulis. 

Ang train station ay bukas para sa lahat — bata, estudyante, manggagawa, matatanda. Dahil dito, ito rin ay posibleng puntirya ng mga kriminal o terorista. 

Noong mga nakaraang taon, may ilang ulat ng pandurukot, pambabastos, at kahina-hinalang bag na iniwan sa istasyon. Kaya naman mahalaga na may maayos at modernong sistema ng seguridad.

Ang X-ray machines ay may kakayahang makita ang mga kahina-hinalang bagay sa loob ng bag — mga armas, kutsilyo, o pampasabog. Sa pag-alis ng mga ito at paglalagay ng K9 units, inaasahang mapapabilis ang pila at mababawasan ang sira-sirang gamit. 

Gayunman, kung ang layunin ay mas episyenteng daloy ng tao, dapat hindi ikompromiso ang antas ng seguridad. 

Ang teknolohiya at trained personnel ay dapat nagtutulungan, hindi pinipiling pagpalitin. 

Sa modernong mundo, hindi na sapat ang isa lang — kailangan ng CCTV, X-ray, K9, intelligence, at mabilis na response team. Lahat ng ito ay bahagi ng isang malawak na sistema.

Sa huli, ang kaligtasan sa train station ay hindi lang tungkol sa presensya ng aso o makina — ito ay tungkol sa tiwala ng publiko. Tiwala na may proteksyon silang kasama. 

Sangkot na opisyal sa bentahan ng ilegal na baril, papanagutin

by Info @Editorial | Apr. 28, 2025

Isa sa mga nagiging mabigat na pasanin ng ating mga sundalo at kapulisan ang umabot sa puntong maharap sila sa mga kaso na may kinalaman sa pagtugon nila sa tungkulin, na sa kalaunan ay mahatulan at maparusahan.

Kaya marahil, labis ang pasasalamat ng Philippine National Police (PNP) sa paglagda ni Pangulong Ferdinand Marcos, Jr. sa Republic Act no. 12177 na nagbibigay ng libreng legal assistance sa lahat ng military and uniformed personnel (MUP) na mahaharap o nahaharap sa mga kaso dahil sa pagtupad ng kanilang mga tungkulin. 

Sa ilalim ng naturang batas, sakop nito ang libreng legal aid ng mga isinampang kasong civil, criminal at administrative sa mga MUP. Sasagutin ng gobyerno ang lahat ng gagastusin sa pagkuha ng mga legal assistance na kakailanganin ng mga kapulisang nasasangkot sa mga kasong may kaugnayan sa pagsunod lamang sa kanilang mandato.

Bilang bahagi ng Common Legislative Agenda, ang batas na ito ay itinuturing ng PNP na malaking tulong para sa araw-araw na sakripisyo ng kanilang hanay sa pagpapanatili ng kaayusan sa mga komunidad at kaligtasan ng mga mamamayan.

Kabilang naman sa mga makikinabang dito ang mga opisyal at enlisted personnel mula sa Armed Forces of the Philippines (AFP), Bureau of Fire Protection (BF), Bureau of Jail Management and Penology (BJMP), PNP, Philippine Coast Guard (PCG), Bureau of Corrections (BuCor), at Hydrography Branch ng National Mapping and Resource Information Authority (NAMRIA).

Ayon kay PNP Chief PGen. Rommel Francisco Marbil, hindi lamang ito basta isang batas kundi isang moral na nagpapakita ng paninindigan ng gobyerno para proteksyunan ang mga katulad nilang public servant.

Malaking tulong sa hanay ng lahat ng tagapagpatupad ng batas ang mabigyan ng ganitong maituturing na insentibo lalo na iyong mga naglilingkod ng tapat sa taumbayan at sa bayan.

Marami rin naman kasi sa ating mga kapulisan, sundalo at iba pa ang matitino, maayos magtrabaho at totoong tumutupad sa kanilang mga tungkulin, kaya nga lamang kung minsan ay nasusuong sila sa mga kasong hindi nila inaasahan.

Pero, kung mayroong libreng legal officer, na agad kikilos at aalalay sa mga qualified MUP, masampahan man sila ng kaso ay mabilis din itong mareresolba at posible ring maabsuwelto. 

Paalala lang natin sa mga law enforcer at iba pang opisyal na huwag sanang sumagi sa isipan na abusuhin ang libreng legal assistance, dahil ito ay isang pribilehiyo na ibinibigay upang mapabuti ang kalagayan at hindi para gamitin sa anumang masamang gawain.

Gobyerno, tugunan naman ang bigat ng taas-presyo ng petrolyo

by Info @Editorial | Apr. 27, 2025

Sa gitna ng matinding init ng panahon, isa na namang pasanin ang sunud-sunod na pagtaas ng presyo ng petrolyo. 

Hindi biro ang epekto nito sa araw-araw na pamumuhay. Ang bawat pagtaas ng presyo ng diesel, gasoline at kerosene ay may domino effect — kasabay nitong tumataas ang pamasahe, presyo ng bilihin, at gastos sa produksyon. 

Mula sa mga tsuper na kailangang magdoble-kayod para kumita, hanggang sa ordinaryong mamimili sa palengke, lahat ay tinatamaan.Kasabay ng pag-init ng ulo ng mga Pilipino ay ang literal na init ng panahon. Sa mga panahong kailangang mag-aircon o kahit electric fan lang, dagdag na naman ang konsumo sa kuryente. 

At kung petrolyo ang gamit sa power generation, tiyak na aakyat din ang singil sa kuryente. Napag-iinitan na nga ng araw, iniinitan pa ng taas-presyo.Hindi sapat ang paliwanag ng pandaigdigang merkado o tensyon sa ibang bansa. Ang tanong ng marami, nasaan ang maagap na tugon ng pamahalaan? 

Nasa panahon tayo kung kailan dapat may malinaw at konkretong mga hakbangin. Puwedeng tutukan ang oil price stabilization fund, mas agresibong pagpapaunlad ng renewable energy, o kahit pansamantalang subsidiya sa sektor ng transportasyon.Hindi dapat ipasa sa taumbayan ang bigat ng krisis na ito. Sa bawat pisong idinadagdag sa presyo ng langis, nadadagdagan naman ang pasanin ng bawat pamilyang Pilipino.