Ingat sa mga pekeng balita

by Info @Editorial | May 2, 2025

Palala nang palala ang pagkalat ng mga pekeng balita lalo na sa social media at iba’t ibang online platforms. 

Mabilis at malawak ang paglaganap ng mga maling impormasyon — mga gawa-gawang istorya, pekeng survey results, at mali-maling quotes na iniuugnay sa mga kandidato. 

Sa panahon ng matinding tunggalian sa pulitika, nagiging sandata ang kasinungalingan upang linlangin ang mamamayan at impluwensyahan ang kanilang desisyon.Hindi na bago ang ganitong taktika at gamit ang teknolohiya, mas nagiging makapangyarihan ang mga nasa likod ng fake news ngayon. 

Kaya naman, kinakailangan ang mas matibay na paninindigan at kritikal na pag-iisip mula sa mga botante. 

Hindi sapat ang basta nagbabasa at share na lang — dapat suriin muna kung saan nanggaling ang balita, totoo ba ito, at kung may kredibilidad ba ang pinagmulan nito.Ang mga pekeng balita ay hindi simpleng usapin lamang ng maling impormasyon.

Ito ay banta sa ating demokrasya. Kapag ang mamamayan ay nalilinlang at pinapaniwala sa kasinungalingan, nawawala ang kakayahang pumili ng tama at makatarungan.

Sa huli, tayo rin ang talo — sapagkat ang mananalo ay hindi batay sa katotohanan kundi sa panlilinlang.Kaya ngayong halalan, maging mapanuri. Magtanong, magsaliksik, at huwag basta maniwala sa mga nakikita online. 

Gampanan natin ang ating papel bilang tagapangalaga ng katotohanan.

Manggagawang Pinoy: Haligi ng ekonomiya

by Info @Editorial | May 1, 2025

Tuwing ika-1 ng Mayo, ipinagdiriwang natin ang Araw ng Paggawa — isang mahalagang okasyon na nagbibigay pugay sa mga manggagawang Pilipino, ang tunay na haligi ng ating ekonomiya at lipunan. 

Sa araw na ito, kinikilala natin hindi lamang ang kanilang sipag at tiyaga, kundi pati na rin ang mga sakripisyong araw-araw nilang kinakaharap upang maitaguyod ang pamilya at ang bansa. Gayunman, sa kabila ng taunang selebrasyon, nananatiling buhay ang mga panawagan para sa makatarungang pasahod, ligtas na kondisyon sa trabaho, at seguridad sa hanapbuhay. 

Marami pa ring manggagawa ang sumasahod nang hindi sapat, nagtatrabaho sa hindi makataong kalagayan, at nawawala sa sistema ng benepisyo at proteksyon ng estado.

Ang Araw ng Paggawa ay hindi lamang dapat maging isang araw ng pagdiriwang. Dapat itong maging paalala sa gobyerno, sa pribadong sektor, at sa buong sambayanan na may responsibilidad tayong tiyakin ang dignidad at kapakanan ng manggagawa. Sa gitna ng patuloy na pagbabago sa ekonomiya at teknolohiya, mahalagang mas pagtibayin ang halaga ng manggagawa sa lipunan. 

Sila ang bumubuhay sa industriya, agrikultura, at serbisyo — kaya’t nararapat lamang na itaguyod ang makatarungang pamumuhay para sa kanila.

Ang tunay na pagdiriwang sa Araw ng Paggawa ay nagsisimula sa pagkilos, hindi lamang sa pagbati.

Dagdag-sahod, ‘di sapat sa taas-presyo ng mga bilihin

by Info @Editorial | Apr. 30, 2025

Isa sa mga nagiging mabigat na pasanin ng ating mga sundalo at kapulisan ang umabot sa puntong maharap sila sa mga kaso na may kinalaman sa pagtugon nila sa tungkulin, na sa kalaunan ay mahatulan at maparusahan.

Kaya marahil, labis ang pasasalamat ng Philippine National Police (PNP) sa paglagda ni Pangulong Ferdinand Marcos, Jr. sa Republic Act no. 12177 na nagbibigay ng libreng legal assistance sa lahat ng military and uniformed personnel (MUP) na mahaharap o nahaharap sa mga kaso dahil sa pagtupad ng kanilang mga tungkulin. 

Sa ilalim ng naturang batas, sakop nito ang libreng legal aid ng mga isinampang kasong civil, criminal at administrative sa mga MUP. Sasagutin ng gobyerno ang lahat ng gagastusin sa pagkuha ng mga legal assistance na kakailanganin ng mga kapulisang nasasangkot sa mga kasong may kaugnayan sa pagsunod lamang sa kanilang mandato.

Bilang bahagi ng Common Legislative Agenda, ang batas na ito ay itinuturing ng PNP na malaking tulong para sa araw-araw na sakripisyo ng kanilang hanay sa pagpapanatili ng kaayusan sa mga komunidad at kaligtasan ng mga mamamayan.

Kabilang naman sa mga makikinabang dito ang mga opisyal at enlisted personnel mula sa Armed Forces of the Philippines (AFP), Bureau of Fire Protection (BF), Bureau of Jail Management and Penology (BJMP), PNP, Philippine Coast Guard (PCG), Bureau of Corrections (BuCor), at Hydrography Branch ng National Mapping and Resource Information Authority (NAMRIA).

Ayon kay PNP Chief PGen. Rommel Francisco Marbil, hindi lamang ito basta isang batas kundi isang moral na nagpapakita ng paninindigan ng gobyerno para proteksyunan ang mga katulad nilang public servant.

Malaking tulong sa hanay ng lahat ng tagapagpatupad ng batas ang mabigyan ng ganitong maituturing na insentibo lalo na iyong mga naglilingkod ng tapat sa taumbayan at sa bayan.

Marami rin naman kasi sa ating mga kapulisan, sundalo at iba pa ang matitino, maayos magtrabaho at totoong tumutupad sa kanilang mga tungkulin, kaya nga lamang kung minsan ay nasusuong sila sa mga kasong hindi nila inaasahan.

Pero, kung mayroong libreng legal officer, na agad kikilos at aalalay sa mga qualified MUP, masampahan man sila ng kaso ay mabilis din itong mareresolba at posible ring maabsuwelto. 

Paalala lang natin sa mga law enforcer at iba pang opisyal na huwag sanang sumagi sa isipan na abusuhin ang libreng legal assistance, dahil ito ay isang pribilehiyo na ibinibigay upang mapabuti ang kalagayan at hindi para gamitin sa anumang masamang gawain.