Paalala sa rider, kaligtasan muna hindi porma

by Info @Editorial | July 7, 2025

Sa kabila ng paulit-ulit na paalala at batas, marami pa ring motorista ang inuuna ang porma kaysa kaligtasan. 

Mula sa malalakas na tambutso hanggang sa hindi pagsusuot ng maayos na helmet — tila nakakalimutang buhay ang nakataya sa bawat biyahe.

Hindi sapat ang pa-cool na motor kung ang ingay nito ay nakakaabala sa komunidad at nagdudulot ng stress sa kapwa motorista. Ang modified o "open pipe" na tambutso ay hindi lamang istorbo — ito ay malinaw na paglabag sa batas. Dapat higpitan ang pagbabantay at parusa para rito.

Ganundin sa helmet. Hindi ito accessory — ito ay proteksyon. Sa bawat aksidente, ang helmet ang maaaring magligtas ng buhay. Ngunit sa mga kalsada ngayon, makikita pa rin ang mga rider at angkas na walang suot nito, o kung meron man, ay peke at mababa ang kalidad.

Panahon na para gawing malinaw at iisa ang pagpapatupad ng batas ukol sa tambutso at helmet. Hindi sapat ang kampanya — kailangan ng konkretong aksyon mula sa gobyerno.

Ang kaligtasan sa kalsada ay hindi dapat isinusugal para lang sa ingay o porma. 

Nagiging adik sa sugal, mas dumami

by Info @Editorial | July 6, 2025

Sa panahon ngayon, patuloy ang pagdami ng mga nalululong sa sugal — mula sa tradisyunal na pustahan hanggang sa online gambling. 

Marami ang umaasa sa suwerte para guminhawa, ngunit sa halip na umangat, lalo lamang silang nalulubog sa utang at problema.Ang pagiging adik sa sugal ay hindi biro.

Nasisira ang relasyon sa pamilya, nasasayang ang kita, at naapektuhan ang mental na kalusugan. Lalo na sa mga mahihirap, ang sugal ay nagiging desperadong paraan para makatakas sa hirap, pero nauuwi ito sa mas malalim na pagkakalugmok.

Nito lamang, ilang drayber ang nahuli dahil sa ilegal na online sabong. Kaugnay nito, nabuking na kapag natatalo, bumabawi umano sila sa mga pasahero sa pamamagitan ng sobrang paniningil ng pamasahe. Ang ending, arestado ang mga sugarol. Mas lalong walang maiuuwing pantustos sa pamilya.

Kailangang kumilos ang pamahalaan upang mas higpitan ang regulasyon sa sugal, lalo na online. 

Kasabay nito, mahalaga rin ang edukasyon at suporta sa mga nalulong upang makabalik sila sa tamang landas.

Kailangan nating ipaalala sa bawat isa na ang tunay na pag-unlad ay nakukuha sa sipag, tiyaga, at disiplina.

Mga estudyante, buwis-buhay ‘pag late ang abiso na walang pasok

by Info @Editorial | July 5, 2025

Paulit-ulit na lang ang problemang huli ang anunsyo ng class suspension. 

Habang binabaha na ang daan at basang-basa na ang mga estudyante, saka pa lang maglalabas ng abiso. 

Hinihikayat ang mga mga kaukulang ahensya na pag-isipan muli ang proseso. Hindi ito simpleng administrative concern lang — ito ay usapin ng kaligtasan, responsibilidad, at malasakit.

Sa panahong laganap ang teknolohiya, walang dahilan para hindi agad maiparating ang desisyon. 

Ang solusyon ay simple ngunit nangangailangan ng political will at epektibong sistema: maagang desisyon at malinaw na komunikasyon. Sa panahon ng teknolohiya, isang text blast, social media post, o public announcement lang ay makakarating agad sa masa.

Pero dapat itong gawin bago pa man pumasok ang mga estudyante sa paaralan — hindi habang nasa daan na sila.

Sa bawat huling anunsyo, may mga estudyanteng nalalagay sa peligro at may klaseng nasasayang.

Panahon na para ayusin ito. Ang kaligtasan at kapakanan ng mga mag-aaral ay hindi dapat isinasantabi. 

Maagang anunsyo, malinaw na abiso, at maagap na aksyon ang kailangan.