Awat na sa pulitika, trabaho naman

by Info @Editorial | August 8, 2025

Matapos ang mainit na usapin ng impeachment complaint laban kay Vice President Sara Duterte, na tuluyang in-archive sa Senado, panahon na upang mas ibaling ng mga mambabatas ang kanilang atensyon sa mas mahahalagang isyu na tunay na may direktang epekto sa mamamayang Pilipino.

Ang impeachment ay isang lehitimong bahagi ng sistemang demokratiko na kailangang pagtuunan ng pansin at kasabay nito dapat ay hindi maisantabi ang iba pang mahahalagang usapin. Tulad ng mga problema sa ekonomiya, mataas na presyo ng bilihin, kawalan ng trabaho, at patuloy na suliranin sa edukasyon at kalusugan. 

Hindi maikakaila na tila nauubos ang oras at atensyon ng ilang mambabatas sa pulitika at awayan sa kapangyarihan. Ang tanong: para kanino nga ba talaga ang kanilang serbisyo?

Habang tuloy ang pagtatalo sa mga pulitikal na isyu, nananatiling hirap ang karaniwang Pilipino sa araw-araw. 

Mabagal pa rin ang pagpapatupad ng mga reporma sa edukasyon, at marami pa ring Pilipino ang walang access sa maayos na serbisyong pangkalusugan.

Ang desisyong i-archive ang impeachment complaint ay tila pagsasara ng isang kabanata. Ngayon, inaasahan ng publiko na ang mga mambabatas ay magpokus na sa paggawa ng batas para sa reporma sa buwis, suporta sa agrikultura, dagdag na sahod, at serbisyong panlipunan.

Badyet sa flood control projects, bantayan maigi

by Info @Editorial | August 7, 2025

Kinumpirma ng Department of Budget and Management (DBM) na tinapyasan ng halos P72 bilyon ang panukalang pondo para sa mga flood control projects sa 2026. 

Mula sa kasalukuyang P346.6 bilyon, aabot lamang sa P274.9 bilyon ang panukalang pondo para sa susunod na taon.

Bagama’t ayon sa DBM, nirerepaso pa ang panukalang pondo para sa mga naturang proyekto at posibleng maglaan pa ng karagdagang budget kung kinakailangan. 

Kaugnay nito, sa harap ng tumitinding pagbaha at epekto ng climate change, may pangamba kung sapat pa ba ang pondo upang maprotektahan ang mga komunidad. 

Ang tamang paglalaan ng pondo ay tungkulin ng gobyerno — at karapatan ng publiko na maunawaan ito.

Sa huli, kahit gaano pa kalaki ang pondo kung ito’y hindi nagagamit nang maayos at tapat, wala ring mangyayari, lubog pa rin ang bansa at malalagay sa alanganin ang buhay ng mamamayan.

Pagbasura sa 4Ps, solusyon o dagdag-pahirap?

by Info @Editorial | August 6, 2025

Patuloy ang paglobo ng populasyon sa Metro Manila. 

Ayon sa 2024 Census ng Philippine Statistics Authority (PSA), pumalo na sa kabuuang 14,001,751 ang bilang ng tao sa Metro Manila, na kumakatawan sa 12.4% ng kabuuang populasyon ng Pilipinas na mayroong 112 million noong nakaraang taon.

Mula 2020, tumaas ang populasyon ng Metro Manila ng 517,289 katao, mula sa 13.48 milyong kabuuang bilang nito.

Masasabing dahil sa kakulangan ng oportunidad sa mga probinsya, dagsa ang mga tao sa lungsod sa pag-asang makahanap ng trabaho at mas magandang buhay.

Ngunit kapalit nito ay matinding trapiko, kakulangan sa pabahay, polusyon, at hirap sa serbisyong medikal at edukasyon. 

Kailangan ng konkretong aksyon: maayos na urban planning, decentralization ng serbisyo at oportunidad, at mas aktibong family planning. 

Ang pagtugon sa isyung ito ay hindi lang tungkulin ng gobyerno, bahagi rin ng mas malawak na plano para sa mas maayos na kinabukasan ay ang bawat isa.