Mental health ng mga kabataan, ‘wag balewalain

by Info @Editorial | October 26, 2025

Sa panahon ngayon, hindi na maitatanggi ang lumalalang problema sa kalusugang pangkaisipan ng kabataan. 

Sa bawat paaralan, tahanan, at komunidad, may mga kabataang tahimik na nakikipaglaban sa depresyon, pagkabalisa, at iba pang suliraning emosyonal — ngunit madalas ay hindi sila nauunawaan o napapakinggan. Sa halip na pagkalinga, madalas ay panghuhusga ang kanilang natatanggap lalo na sa social media.

Dapat nang kilalanin ng lipunan na ang mental health ay kasinghalaga ng pisikal na kalusugan. Hindi ito kahinaan, kundi isang bahagi ng pagiging tao na nangangailangan ng malasakit at suporta. 

Nakababahala na marami pa rin ang kulang sa kaalaman tungkol sa mga senyales ng mental health issues. Dahil dito, maraming kabataan ang hindi nakakakuha ng agarang tulong.

Kailangang magkaisa ang pamahalaan, paaralan, at pamilya sa pagtugon sa krisis na ito. 

Dapat palawakin ang mga mental health program — mga counseling service, awareness campaign, at pagsasanay para sa mga guro upang matukoy ang mga batang nangangailangan ng tulong. 

Dapat ding tiyakin ng gobyerno na may sapat na mental health professionals sa mga pampublikong institusyon upang madaling ma-access ng kabataan ang serbisyong ito.

Higit sa lahat, isaisip sana natin na ang simpleng pakikinig, pang-unawa, at pakikipag-usap ay malaking hakbang na patungo sa kanilang paghilom.

Mas mabigat na parusa sa karumal-dumal na krimen

by Info @Editorial | October 25, 2025

Halos araw-araw, may bagong biktima ng karumal-dumal na krimen — ginahasa, tinortyur, pinatay. 

Ang mas masakit, tila karaniwan na lang ito sa mata ng ilan. Para bang wala nang halaga ang buhay ng tao.Hindi dapat ito maging normal. Ang bawat pagpatay ay kabiguan ng sistemang dapat nagpoprotekta sa mamamayan. 

Panahon na para wakasan ang ganitong klaseng kawalang-puso. Kailangang paigtingin ang parusa sa mga gumagawa ng kasamaan. Kailangang siguruhing may takot ang mga kriminal sa batas.Huwag tayong manahimik. Ang pananahimik ay tanda ng pagsang-ayon. 

Kung hindi kikilos ngayon ang gobyerno at bawat mamamayan, mas lalo lang lalakas ang loob ng mga halang ang kaluluwa.Hindi tayo dapat mawalan ng pag-asa, pero hindi rin dapat manatiling bulag. 

Hustisya ang sigaw ng mga biktima. Dinig na ba sila ng lipunan? Kung hindi pa, panahon na para marinig sila — sa gawa, hindi lang sa salita.

Pinoy, umaaray na sa taas-presyo ng bilihin

by Info @Editorial | October 24, 2025

Sa panahong patuloy ang pagtaas ng presyo ng mga pangunahing bilihin, hindi nakapagtataka na nais ng mayorya ng mga Pinoy na unahin ng Pangulo ang pagpapababa ng mga ito. 

Araw-araw, ramdam ng mga manggagawa ang bigat ng bawat sentimong kakulangan. Kapag tumaas ang presyo ng petrolyo, domino na ang epekto — tataas ang bilihin at serbisyo.

Kung nais ng gobyerno na maramdaman ng tao ang tunay na pagbabago, dapat tutukan nito ang mga konkretong hakbang upang mapababa ang presyo ng pagkain at

iba pang pangunahing pangangailangan. 

Dapat bigyang-prayoridad ang pagsasaayos ng agrikultura, tulungan ang mga lokal na magsasaka, at ayusin ang daloy ng suplay upang hindi laging importasyon ang sagot. Kasabay nito, dapat ding tugunan ang mataas na singil sa kuryente na nagpapalaki sa gastos ng bawat pamilya.

Hindi sapat ang mga pangako o press release. Ang mamamayan ay naghihintay ng mga patunay.

Sa huli, simple lang ang hinihingi ng mga Pilipino, isang gobyernong marunong makinig at kumilos sa tunay na problema ng bayan.

Kapag napagaan ang bigat sa bulsa, doon lamang mararamdaman ng taumbayan na may saysay ang bawat pangakong “pag-asenso para sa lahat”.