Gomez, segunda sa U.S. Ohio Pro Billiards Series

ni Eddie M. Paez Jr. - @Sports | October 25, 2022

Nagmarka na naman si Roberto Gomez sa tumbukan sa labas ng bansa nang pumangalawa ang "Pinoy Superman" sa US Pro Billiards Series: Ohio Open sa Roberts Centre ng Wilmington, Ohio. Umangkla si Gomez sa anim na magkakasunod na tagumpay sa malupit na sarguhan kaya nakasampa sa finals bago ito kinapos sa hamon ng nagkampeon si Fedor Gorst ng Russia, 2-0. Sinagasaan niya sa paligsahan sina Dmitri Jungo ng Switzerland (2-0), Amerikanong si Tony Robles (2-0), Riku Romppanen mula sa Finland (2-1, Winners' Classification), Konrad Juszczyszyn ng Poland (2-0, round-of-16), Dutch Jan Van Lie Rop (2-0, quarterfinals) at Eklent Kaci ng Albania noong semifinals sa iskor na 2-1.

Sa isang produktibong 2022, ilang beses nang nakasampa sa podium ng iba't-ibang mga paligsahan si 44-taong-gulang na pambato ng Zamboanga City. Nakaakyat na siya sa trono ng High Stakes One Pocket Championships sa Dayton, Ohio; nagkampeon na rin siya sa Texas Open One Pocket na ginanap sa Skinny Bob's Billiards (Round Clock, Texas).

Sariwa rin si 2007 World 9-Ball Billiards Championships runner-up Gomez sa isang panalo laban kay Corey Deuel ng USA sa Champions One Pocket Challenge.

Samantala, sasargo rin si Gomez kasama nina Carlo Biado, Johann Chua, Lee Van Corteza, Jeffrey De Luna at Roland Garcia sa US International Open 9-Ball sa Sheraton Norfolk Waterside Hotel sa Virginia simula Oktubre 28.

Mayroong 122 iba pang manunumbok bukod sa anim na Pinoy ang umaasinta rin ng titulo sa malaking event na nabanggit. Nakatakda ring makipagtagisan ng husay sina Biado, Corteza, Garcia at Gomez sa One Pocket event kung saan si Gomez ang nagtatanggol na kampeon.

Naghati sa 3rd place sina Biado at Chung Ko sa U.S. Open

ni Eddie M. Paez Jr. - @Sports | October 17, 2022

Napunta kay Francisco Sanchez Ruiz ng Spain ang prestihiyosong tropeo at simbolikong "green jacket" bilang kampeon matapos isalya si Austrian Max Lechner sa finals, 13-10, noong huling araw ng 2022 US Open Pool Championships sa Harrah's Resort ng Atlantic City, New Jersey.

Naghati naman sina 2021 US Pool king Carlo Biado at 2019 World 10-Ball Championships winner Ping Chung Ko ng Taiwan sa pangatlong puwesto dahil hindi sila nakaahon mula sa final 4 matches ng kompetisyong sinalihan ng 256 sa pinakamalulupit na cue artists mula sa iba't-ibang parte ng globo.

Wagi ang mga Europeans sa "Asia vs. Europe" sa semifinals na torneo. Nangibabaw si Lechner kay Ko sa dikdikang engkwentro, 11-10. Isang "Scratched ball" ng Taiwanese sa game 21 ang naging susi ng "ball-in-hand" na bentahe at pag-usad ni Lechmer sa championship round.

Sa kabilang dako, nakakusot din si "World Cup of Pool" titlist Sanchez kay Biado sa gitgitang salpukan sa kabilang hati ng semis, 11-10. Maagang nadehado si "Black Tiger" (2-5, 6-10) pero nakasibad ito sa isang 10-10 na tabla bago kinapos.

Nauna rito, napagtagumpayan ni 2017 World Games gold medalist Biado ang hamon ni Konrad Juszczyszyn ng Poland sa iskor na 10-7. Pagkatapos nito ay humarang sa daraanan niya si Taiwanese Hsieh Chia Chen kung saan hindi pinaporma ni "Black Tiger" Biado anģ karibal, 10-0. Bukod dito, pinabagsak din ni Biado si Petri Makonnen ng Greece, 9-4, sa unang pagsubok sa knockout stage bago nagpakita ng angas kontra kay Japanese Naoyuki Oi, 9-6, sa round of 32.

Biado, Garcia at Corteza, pumalaot na sa last 16

ni Eddie M. Paez Jr. - @Sports | October 15, 2022

Kabilang na sina Carlo Biado, Roland Garcia at Lee Van Corteza sa huling 16 na bilyaristang may malinaw na daan pa sa korona ng prestihiyosong US Open Pool Championships na nasasaksihan sa sarguhan ng Harrah's Resort sa Atlantic City, New Jersey.

Itinumba ni 2017 World Games gold medalist at defending champion "Black Tiger" Biado si Petri Makonnen ng Greece, 9-4, sa unang pagsubok sa knockout stage bago nagpakita ng tatag kontra kay Japanese Naoyuki Oi, 9-6, sa round of 32. Susunod naman na sasagupa sa Pinoy si Konrad Juszczysyn ng Poland.

Ginamit namang pasaporte ni 2017 World 9-Ball Championships 2nd placer Garcia ang mga panalo kontra kina Jesus Atencio (Venezuela, 9-4) at Wojciech Szewczyk (Poland, 9-6) para manatili sa paligsahan at makaharap si Polish Max Lechner.

Tagumpay naman sa laban kina Pin Yi Ko (9-4), isang double world titlist mula sa Taiwan, at Scottish Jayson Shaw (9-2), dating World 8-Ball king, ang nagtulak kay "The Slayer" Corteza papunta sa final 16 ng paligsahang dalawang beses pa lang na napapanalunan ng bilyarista mula sa Pilipinas. Kay Chris Melling ng Great Britain susunod na mapupunta ang atensiyon ni Corteza.

Sa kasaysayan ng event, 12 beses nang naging runner-up ang isang Pinoy. At bukod sa koronang nakuha ni Biado noong 2021, nagkampeon din sa event si Efren Reyes noong 1994.

Sina Roberto Gomez at Johann Chua ay nag-empake na dahil sa natikmang kabiguan laban kina Wu Kun Lin (Taiwan, 3-9) at Eclent Kasi (Albania, 7-9) ayon sa pagkakasunod-sunod sa simula ng "do-or-die" stage. Wala na rin sa eksena ang mga bigating sina Albin Ouschsan (Austria) at Shane Van Boening (USA).