2020 Yearender, Chess, Golf at Billiards, kuminang sa pandemic

ni Eddie M. Paez Jr. - @Sports | December 30, 2020

Ganitong panahon noong 2019 ay nasa alapaap pa rin ang Team Pilipinas dahil sa makasaysayang dominasyon sa Southeast Asian Games na idinaos sa bansa. Kuminang ang mga atleta ng bansa pero meron ding mga nangulimlim.

Dalawang larangan sa golf at billiards nagwagayway ang bandila nitong 2020 sa gitna ng pandemya. Ahedres ang isang arena kung saan hindi tayo nagmarka.

Sa golf, isang sweep sa women’s bracket ang naiposte ng Pilipinas dahil sa nakuhang individual gold at team gold nina Bianca Pagdanganan, Lotis Kaye Go at Abigail Arevalo. Apat na ginto ang naiuwi ng cue artists natin matapos manguna ang mga ito sa 9-ball women (singles at doubles), 10-ball women (singles), 10-ball men (singles). Nagtulong-tulong para rito sina Rubilen Amit, Chezka Centeno at Dennis Orcullo.

Sa Japan Ladies Professional Golf Association (JLPGA), dalawang torneo ang napagwagian ng Fil-Japanese na si Yuka Saso kahit na rookie pa siya sa professional tour. Dalawang top ten finish naman ang naiposte ni Pagdanganan sa mas malupit na Ladies Professional Golf Association (LPGA) tour sa U.S. Nahablot niya ang 9th place sa isang major event ng tour habang 3rd ang 23-anyos na parbuster sa isang torneo. Walang mga nakapanood halos sa kinang na ito nina Saso at Pagdanganan dahil sa COVID-19 protocols.

Nanguna rin si Dottie Ardina sa Australian Golf Club Series noong hindi pa uso ang lockdown.

Sa larangan ng billiards, 13 titulo ang napasakamay nina Orcullo, Roberto "Superman" Gomez, Francisco "Djanggo" Bustamante, Zorren James "Dodong Diamond" Aranas, Lee Van Corteza, Jeffrey De Luna at Carlo "The Black Tiger" Biado. Lahat ng mga ito ay paligsahang ginanap onsite sa USA samantalang ang kay Biado ay isang kakaibang online 10-ball tourney na nilahukan din ng mga bigatin.

Sa chess, world champion si FIDE Master Sander Severino nang sumabak Ito sa International Physically Disabled Chess Association (IPCA) World Online Chess Rapid Championships. Sa FIDE Online Youth and Cadet Chess, nanguna sina Michael Concio at King Whisley Puso habang sorpresang segundo si April Joy Claros nung Asian qualifiers sa kani-kanyang grupo. Nasabak sa kontrobersya si Puso kaya hindi nakalaro sa finals pero pumanglima si Claros sa world stage.

Binatilyong Bacojo, kampeon sa IM Roca Merry Blitz Masters

ni Eddie M. Paez Jr. - @Sports | December 29, 2020

Sumulong sa tuktok ng kompetisyon ang binatilyong si Mark Jay Bacojo sa pagsasara ng 13-yugtong na sagupaang tinawag na International Master (IM) Petronio Roca Merry Blitz Masters Tournament noong Araw ng Pasko sa Cavite.

Limang tituladong chessers ang kasama sa mga nakatikim ng lupit ni Bacojo, 14-taong-gulang pa lamang at may FIDE rating na 1926, paakyat sa trono. Taob sina Roca (rating: 2381, round 11), IM Angelo Young (rating: 2321, round 12), FIDE Master Roel Abelgas (rating: 2200, round 6) at Woman IM Kylen Joy Mordido (rating: 2014, round 8).

Bukod dito, napuntusan din niya si Candidate Master Genghis Imperial (rating: 1812; round 3) at nahatak niya sa isang hatian ng puntos si IM Chito Garma (rating: 2345, round 2).

Nakatikim din ng bangis ni Bacojo sina Noel Jay Estacio (round 1), John Curt Valencia (round 4), John Lance Valencia (round 5), Justine Diego Mordido (round 7) at Chester Caminong (round 9) kaya umalsa rin ang performance rating ng kampeon sa 2337.

Tinapos ni Bacojo ang paligsahan taglay ang kartadang 10.5 puntos samantalang ang batikang si Garma ay pumangalawa bitbit ang rekord na 10.0 puntos. Malayong pangatlo si Abelgas na nakapagsuko ng 8 puntos.

Matatandaang naghakot si Bacojo ng gold medal sa individual at team events ng 2019 ASEAN Age Group Championships. Siya rin ang nanguna sa Philippine qualifiers para sa FIDE Online Cadet and Youth Online Championships U14 bracket. Sa Asian event, nabigo itong mag-qualify sa world finals matapos hindi makapasok sa podium.

Pag-asa ng ahedres na kay "Puso"

ni Eddie M. Paez Jr. - @Sports | December 28, 2020

Umuwing walang laman ang kaban ng medalya ng Pilipinas mula sa World FIDE World Online Youth and Cadet Rapid Chess Championships dahil hindi nakapasok sa podium sina April Joy Claros at Michael Concio. Ang pangatlo sanang kinatawan ng bansa ay hindi pinayagang maglaro ng mga punong-abala.

Ngunit isang tanong na sumulpot ay kung sakaling hindi naitsapwera ng FIDE si Whisley King Puso, isang prize find mula sa Sta. Rosa, Laguna, posible kayang naka-podium ang batang pambato ng bansa sa pandaigdigang palaruan?

Matatandaang pinagbawalan ng FIDE ang pambato ng Pilipinas sa Open U12 na lumahok sa world finals bilang pangunahing kinatawan ng Asya matapos paratangan ng hindi patas na paglalaro. Hindi naman nagpakita ng katibayan ang world chess body pero ayon sa tuntunin ay bawal ang apela at hindi na puwedeng baguhin ang desisyon ng FIDE. Marami ang umalma pero walang nabago sa mga pangyayari.

Sa ngayon, dahil tapos na ang lahat, hindi na masasagot ang tanong. Ngunit umaasa ang karamihan ng mga tagasunod ng ahedres sa bansa na sa hinaharap ay mapapatunayang walang panlalamang na naganap. Ito ay mangyayari lang sa pamamagitan ng patuloy na pagkinang ni Puso sa iba’t-ibang paligsahan.

Hindi naman ito imposible dahil sa potensyal ng bata. Noong Oktubre, hinirang na kampeon si Puso sa U11 na pangkat ng National Youth Online Chess Championships. Buwan naman ng Nobyembre nang maselyuhan niya ang karapatang maging kinatawan ng Pilipinas sa FIDE Online Youth and Cadet Asian Qualifying Tournament. Samantala, sa FIDE website, si Puso ay may titulong Arena FIDE Master.

Umaasa ang komunidad na sa patuloy niyang pagpapaunlad ng kanyang buhay sa ahedres ay hindi ito masiraan ng loob kung may mga pansamantalang balakid sa loob at labas ng kompetisyon.