Maluto, ibinabandila ang 'Pinas sa VG 10-Ball Virtual Tourney

ni Eddie M. Paez Jr. - @Sports | January 19, 2021

Mula sa disyerto ay napanatili ng manunumbok na si Aivhan Maluto na nakataas ang bandila ng Pilipinas sa maigting na bakbakang 2020 Poison VG 10-Ball 2.0 Virtual Tournament matapos itong makasingit papasok sa play-off stage.

Napa-grupo si Maluto sa preliminary round kina Czech Republic gem Roman Hybler, Great Britain pride Kelly Fischer at kapwa Pinoy na si Elijah Alvarez kung saan tumapos ito taglay ang rekord na dalawang panalo at isang talo. Base sa tuntunin, ang topnotcher sa pangkat ay awtomatikong swak sa susunod na yugto ng bakbakan kasama ang mga top 5 na sumegunda mula sa pitong brackets.

Bagamat pumangalawa lang sa Group 4 si Maluto, isang manunumbok na nakabase sa Abu Dhabi, United Arab Emirates, ang mataas nitong Rack Runs (19) at Ball Runs (206) ay sapat na upang itulak ang Pinoy sa susunod na yugto.

Si Fisher, isa sa pinakamalupit na babaeng cue artist sa buong mundo, ang nanguna sa grupo (3-0), pumangatlo ang 16-anyos na si Alvarez (1-2) at kulelat si Hybler (0-3).

Si Maluto, konektado sa Powerbreak Billiards Hall na nasa Abu Dhabi, United Arab Emirates, ay nagmarka rin kamakailan sa Predator One Pool 10x4 10-Ball Championships matapos magkampeon sa isang qualifying tournament.

Star-studded ang Online na paligsahan dahil sa pagtumbok nina defending champion Albin Ouschan ng Austria, World Pool Billiards Association (WPA) no. 4 Fedor Gorst ng Russia, Roman Hybler (Czech Republic), Chad Sholders (USA), Hideaki Arita (Japan), Mason Koch (USA), WPA no. 9 Alexander Kazakis (Greece), Demetrius Jelatis (Greece), Nick Malaj (Greece), Naoyuki Oi (Japan), Chris Alexander (United Kingdom), Jim Telfer (Netherlands), Frenk Candela (Italy), women's topnotch cue artist Kelly Fisher (Great Britain), Dennis Grabe (Estonia) at ang mga Polish aces na sina Mieszko Fortunski, Konrad Juszczyszyn at Wojtek Szewczyk.

Halagang $20,000 ang kabuuang papremyong salapi sa kompetisyon. Nasusubaybayan ang mga bakbakan sa you tube at facebook sa tulong na rin ng "Cue It Up and Billiards Podcast".

Samantala, kumpirmadong “buhay at kumikikig” ang alamat ng bilyar na si Efren “Bata” Reyes matapos kumalat ang ugong sa social media ng kanyang pagpanaw. “There is a bad rumor going around now about our GOAT (Greatest of All Time) not being with us anymore. Please, please. I just talked to him and he is having a wonderful breakfast,” sabi ng isang netizen.

Isang masaya at masiglang Reyes ang nasaksihan sa mga internet posts at sa mga video sa telebisyon ng lumalabas ay isa na namang halimbawa ng “fake news” o tsismis.

Atras sa games: Players ng Soccer, at WBF, positive sa COVID-19

ni Eddie M. Paez Jr. - @Sports | January 9, 2021

Tuloy ang pananalasa ng COVID-19 sa sports matapos na magpositibo sa virus ang isang Indonesian badminton player gayundin ang pamilya ng isang soccer star sa US.

Hindi na makapaglalaro sina Marcus Fernaldi Gideon at Kevin Sanjaya Sukamuljo ng Indonesia sa tatlong paligsahang sanctioned ng Badminton World Federation (WBF) sa Thailand matapos na magpositibo sa mapaminsalang coronavirus si Sakamuljo. Tatlong tests ang ginawa sa kanya at lahat yun ay nagpakitang direkta siyang nasapul ng pandemya. “This is a lesson for me to always be vigilant in future,” pahayag ng isa sa kasapi ng pinakamabangis na tambalan sa badminton sa buong daigdig.

“His health is of utmost importance,” sabi ng coach nila Gideon at Sukamuljo na si Herry Iman Piergadi. Ipinaliwanag nito na kahit na naging negatibo ang resulta ng pangatlong test, hindi niya rin pasasalihin si Sukamuljo dahil wala ito sa tamang kondisyon para sa tatlong mabibigat na mga torneo ngayon. Kabilang na rito ang WBF Tour Finals. Nauna rito, hindi na rin tumuloy sa kompetisyon ang pangkat ng China upang makaiwas sa banta ng COVID-19.

Ang striker na si Alexandra Morgan Carrasco, dalawang beses na naging bahagi ng FIFA Women’s World Cup champion USA ay nasama na rin sa listahan ng mga atletang napuruhan ng COVID-19. Kasama rin siya ng US Team na nagkampeon sa London Olympics noong 2012. Pati ang ibang miyembro ng pamilya ni Morgan ay nagpositibo rin sa virus. Dahil dito, hindi na rin siya makalalahok sa isang training camp ng team gayundin sa dalawang friendly matches kontra sa Columbia.

Habla, nakahablot ng titulo sa Bangkok

ni Eddie M. Paez Jr. - @Sports | January 8, 2021

Kinolekta ni Pinoy FIDE Master Jony Habla ang isang titulo sa labas ng bansa matapos itong mamayagpag sa Red Knights Chess FIDE Rated Tournament sa Bangkok, Thailand.

Nahablot ni untitled Jimson Bitoon ang huling upuan sa podium upang maging instrumento sa isang 1-3 na pagtatapos ng mga kinatawan ng Pilipinas sa paligsahang nilahukan din ng mga chessers mula sa Switzerland, USA Japan at Thailand.

Pitong beses sumalang si Habla sa board at mula rito ay nakatangay siya ng halos perpektong 6.5 puntos dahil sa anim na panalo at isang tabla. Nasa listahan ng mga naging biktima ng kampeon si topseed at FM Riste Menkinoski at si 4th ranked Poompoong Wiwatanadate ng Thailand.

Naturuan din ng leksyon ni Habla sina Swiss Nicolas Vogelsanger, kapwa Pinoy na si Henry Calacday at ang mga pambato ng punong-abala na sina Shin Jingjang at Farsi Rashid Alriyami. Tanging kay Bitoon lang siya nakutento sa isang hatian ng puntos.

Si Habla, naging hari rin ng 4th Thailand Rapid Chess Championships, ay may FIDE rating lang na 2129 pero nairehistro niya ang performance rating na 2300 sa paligsahan.

Samantala, isasagawa ngayong Sabado ang preseason matches ng Professional Chess Association of the Philippines o PCAP. Isang dosenang duwelo ang nakalatag para mga koponan mula sa North at South. Dalawang titled masters, isang senior, isang babae at tatlong homegrown chessers ang maglalaro ng rapid chess game at isang blitz kada koponan.

Nakatakdang magsimula ang PCAP First Conference sa Enero 16. Lalahok dito ang Antipolo, Cabuyao, Cagayan, Caloocan, Camarines, Cebu, Córdova, Cavite, Iriga, Iloilo, Isabela, Lapu-lapu, Manila, Mindoro, Negros, Olongapo, Palawan, Pasig, Quezon City, Rizal, San Juan, Surigao, Toledo at Zamboanga.