Pinag-empake ni maluto sa Poison VG 10-Ball ang Austria

ni Eddie M. Paez Jr. - @Sports | February 4, 2021

Inilaglag ni Aivhan Maluto ng Pilipinas ang isang élite cue artist sa katauhan ni Austrian Albin Ouschan sa isang pangangaldag na sumira sa script ng ginaganapna playoff rounds sa Poison VG 10-Ball 2.0 Virtual Tournament.

Susunod na sasagupain ni Maluto sa lalo pang umiigting na bakbakan sa knockout phase ng torneo ang pambato ng Poland na si Mieszko Fortunski. Maliban sa underdog na Pinoy, may tsansa pa rin para sa korona sina Jim Telfer (USA), Mika Immonen (Finland) at Wojtek Szewczyk (Poland).

Hindi binigyan ng tsansang magwagi ng mga eksperto at ng mga miron si Maluto sa duwelo nila ng Austrian dahil bukod sa wala siyang marka sa pandaigdigang entablado ng pagtumbok, malupit na kalaban talaga si Ouschan.

Kumikislap ang kartada ng Austrian kung ikukumpara sa rekord ni Maluto kahit saang anggulo tumingin. Bukod sa pagiging hari ng 2016 World 9-Ball Championships, si Ouschan rin ay bahagi ng tambalang nagbigay sa Austria ng korona ng World Cup of Pool noong 2017 at 2019. China ang biktima ng Austria sa finals noong 2017 habang Pilipinas naman (kinatawan noon nina Carlo Biado at Jeffrey De Luna) ang tumiklop kina Ouschan at Mario He noong 2019.

Si Maluto, konektado sa Powerbreak Billiards Hall ng Abu Dhabi, United Arab Emirates ay pangalawa lang sa Group 4 qualifiers na kinabibilangan nina Czech Republic gem Roman Hybler, Great Britain pride Kelly Fischer at kapwa Pinoy na si Elijah Alvarez. Nakapasok lang siya sa playoff round dahil sa mataas nitong Rack Runs (19) at Ball Runs (218). Si Fisher, isa sa pinakamalupit na babaeng cue artist sa buong mundo, ang nanguna sa grupo (3-0), pumangatlo ang 16-taong-gulang na si Alvarez (1-2) at kulelat si Hybler (0-3).

Nakagawa rin kamakailan ng kaunting ingay sa Predator One Pool 10x4 10-Ball Championships si Maluto matapos magkampeon sa isang qualifying tournament.

Halagang $5,500 ang papremyong salapi na naghihintay sa magiging kampeon habang $3,500 naman ang ibubulsa ng sesegunda sa paligsahang masusubaybayan sa you tube at facebook sa tulong na rin ng "Cue It Up and Billiards Podcast".

Caloocan, walang kurap sa 1st pandemic chess league sa Asya

ni Eddie M. Paez Jr. - @Sports | January 27, 2021

Inaasahang mananatiling walang mantsa ang magiging kartada ng rumaratsadang Caloocan Loadmanna Knights pagkatapos nilang humarap sa mga gumagapang na koponan sa pang-apat na araw ng kompetisyon sa Professional Chess Association of the Philippines (PCAP) First Conference.

Isasangkalang ng taga-Caloocan ang marka nitong 5-0 laban sa Pasig City King Pirates na kasalukuyang nangungulelat sa Northern Conference dahil sa nag-iisang panalong naitakbo kontra sa apat na talo sa pinakaunang professional chess league sa Southeast Asia. Plano namang pangunahan ni International Master Eric Labog Jr. ang kanyang tropa upang makaahon sa pagiging cellar-dweller.

Pagkatapos ng Pasig, haharapin naman ng Loadmanna Knights, na pinagungunahan nina IM Jan Emmanuel Garcia at IM Paulo Bersamina, ang Olongapo Rainbow Team 7 na mayroon pa lang dalawang panalo mula sa limang matches.

Ang huling dalawang panalo ng Caloocan ay naiposte noong Sabado nang matakasan nito ang San Juan Predators, 11.5-9.5; at ang Cavite Spartans, 12.0-9.0 kaya sa ngayon ay ito na lang ang tanging koponan na walang dungis ang rekord.

Sa Southern Conference, maghihiwalay ng landas ang Iloilo Kisela Knights at Negros Kingsmen kapag nagharap ang dalawang wala pa ring talong tropa pagkatapos ng limang laro.

Mas maganda ang tsansa ng Camarines Soaring Eagles na magpatuloy ang paglipad bitbit ang trangko at ang malinis na kartada dahil sa pagharap nila sa Toledo City Trojans (3-2) at Cebu City Machers (0-5). Kung magtatagumpay sa dalawang laban, magkakaroon ng malinis na marka ang Camarines (7-0) na pinangungunahan ni Grandmaster Mark Paragua,

Matatandaang nakatikim ng kahihiyan mula sa Soaring Eagles ng Camarines ang Mindoro Tamaraws (2.5-18.5), Palawan Queen’s Gambit (7.0-14.0), Cordova Dutchess Dagami Warriors (5.0-16.0) at Iriga City Oragons (0.5-20.5).

Orcullo, kampeon sa Origin Cup

ni Eddie M. Paez Jr. - @Sports | January 24, 2021

Umangkla ang batikang si Dennis “Robocop” Orcullo sa kanyang malupit na karanasan sa pagtumbok upang mahablot ang korona at makaiwas sa upset axe na magiting na hinawakan ni Baseth Mocaibat hanggang sa pagsasara ng bakbakang The Origin Cup sa Quezon City kamakailan.

Diskartehan ng safety shots ang naging tema ng race-to-9 na championship face-off at sa isang punto ay nangunguna pa si Mocaibat, isang hindi kilalang manlalaro pagdating sa global stage, sa iskor na 5-2. Nang nakabuwelo naman si Orcullo, sumibad ang dating World 8-Ball champion (2011) sa isang 8-6 na kalamangan. Pero hindi natinag si Mocaibat at nagawa pang itabla ang duwelo niya kontra sa "Money King" ng bilyaran mula sa Pilipinas (8-8). Sa huli, naipanalo ni Orcullo ang sumunod na dalawang laban kaya naitakas ang korona sa 10-ball sa paligsahang nilapatan ng "single elimination" na tuntunin.

Ang kislap ng eksperyensya ni Orcullo, itinuring na 2020 Derby City Classic Master of the Table, 47th Annual Texas Open 9-Ball kingpin at 2020 AZBilliards Moneyboard topnotcher ay naramdaman ng mga tumiklop na katunggali tulad nina Edgie Geronimo (round-of-16). 2006 World 8-Ball king at 2007 World 9-Ball titlist Ronnie "The Volcano" Alcano (quarterfinals) at Jundel Mazon.(semifinals). Sa kabilang dako, nasagasaan ni Mocaibat, sina Jonas Magpantay (round-of-16), Antonio Lining (final 8), at Jerico Banares sa final four.

Ang pag-akyat ni Mocaibat, pambato ng Cavite, sa finals ay nagpapakita sa lalim ng reserba ng mga magagaling na cue artists ng Pilipinas. Sa torneo, nasaksihan ang maraming upsets tulad nang masingitan ni Jerico Banares sina Roberto "Superman" Gomez at dating World Straightpool winner Lee Van Corteza; at nang makaisa sina Anton Raga at Mazon kontra sa mga dating hari ng 9-ball sa buong mundo na sina Francisco "Django" Bustamante at Carlo "The Black Tiger" Biado.