"Benok" at Maluto, mga bagong idolo sa bilyaran

ni Eddie M. Paez Jr. - @Sports | February 11, 2021

Unti-unti nang sumisibol ang mga maaaring humalili sa mga pangalang Efren “Bata” Reyes, Francisco “Django” Bustamante, Dennis “Robocop” Orcullo, Ronnie “The Volcano” Alcano, Carlo “The Black Tiger” Biado, Lee Van Corteza, Johann “Bad Koi” Chua, Jose “Amang” Parica at Zorren James “Dodong Diamond” Aranas.

Kamakailan ay nagpakilala si Aivhan Maluto matapos itong pumangalawa sa malupit na Poison VG10 2.0 Virtual 10-Ball Tournament.

At sa hinaharap, isang nang posibilidad na maaari nang ihanay ang pangalan ni Bernie “Benok” Regalario sa mga nabanggit na personalidad. Humahaba na ang listahan ng mga palatandaang ang 16-taong-gulang na manunumbok mula sa Paranaque ay magiging mahalagang bahagi ng Philippine billiards.

Noong 2018, naging semifinalist siya ng J&P 10-Ball Cup pero rumesbak ito nang sumunod na taon upang maging kampeon. Naging produktibo ang taong 2019 para sa binatilyo dahil maliban sa korona sa sagupaang J&P, nakatangay siya ng pilak na medalya sa Batang Pinoy at nakaakyat rin sa mga trono ng larangang 9-Ball at 10-Ball sa Wilde Blue Junior Challenge. Kasama rin sa kanyang makulay na rekord noong nabanggit na taon ang pagiging hari sa 2019 Battle of Champions.

Taong 2020 nang sumargo siya kontra sa mga dating world champions mula sa Pilipinas. Sa duwelo kontra kay Biado, naging hari sa 9-ball sa buong mundo ganun din sa World Games noong 2017, nanalo si Regalario sa isang handicap match. Nang makabanggaan naman niya ang alamat na si “Bata”, isang double world champion (8-Ball at 9-Ball) mula sa Pampanga, umabot sa isang hill-hill ang salpukan bago nangibabaw ang binatilyo.

At kamakailan, sa isang open tournament na binansagang 2021 GAB 10-Ball Open Tournament, umabot siya sa semifinals matapos silatin ang ilan sa mga bituin ng bansa tulad nina Corteza at Chua. Sa final 4, pinag-empake na siya ni Biado.

North vs. South sa PCAP... Walang dapat kumurap

ni Eddie M. Paez Jr. - @Sports | February 10, 2021

Anim na mga koponan ang kasalukuyang ay halos nagkukumpulan sa paghawak ng trangko at nagpipilit na makalayo sa oposisyon ng ginaganap na Professional Chess Association of the Philippines (PCAP) All Filipino Conference. Matapos na mabulabog ang leaderboard noong Sabado, unti-unti nang nakalalayo ang Caloocan Loadmanna Knights (12-1), San Juan Predators (12-1) at Laguna Heroes (11-2) sa pulutong ng iba pang mga kalahok sa North Division habang ang troika ng Camarines Soaring Eagles (11-2), Negros Kingsmen (11-2) at Iloilo Kisela Knights (11-2) ay nakakaangat na nang husto sa South Division ng pinakaunang professional chess league sa Southeast Asia.

Hindi bababa sa dalawang matches ang layo ng Caloocan, San Juan at Laguna sa pumapang-apat na Manila Indios Bravos na meron lang kartadang 9-4. Apat na matches naman ang agwat ng Camarines, Negros at Iloilo sa pinakamalapit ng rekord na 7-6 ng Mindoro, Lapu-lapu at Toledo.

Sa pagpapatuloy ng North vs. South na yugto ng paligsahan, malalaman kung sino ang kukurap sa pagitan ng Laguna at Iloilo sa next play date ngayong Miyerkules. Susunod na sasagupain ng Laguna ay ang Iriga City Oragons samantalang Antipolo Cobras naman ang planong kakaliskisan ng Iloilo.

Maluto, ang bagong bituin ng PHL Billiards

ni Eddie M. Paez Jr. - @Sports | February 9, 2021

Nasingitan ni Aivhan Maluto ng Pilipinas ang karamihan sa mga de-kalibreng cue artists mula sa iba’t-ibang parte ng daigdig upang maangkin ang pangalawang puwesto sa pagtatapos ng malupit na bakbakang tinawag na Poison VG 10-Ball 2.0 Virtual Tournament.

Nakipagtagisan nang husto ng galing si Maluto sa finals laban kay Konrad Juszczyszyn ng Poland. Sa Polish napunta ang unang laban, 6-5. Nakarebanse ang Pinoy sa pangalawa sa kapareho ring iskor (6-5). Sa winner take all match, kinapos si Maluto, 4-6, kaya napunta sa Poland cue artist ang korona. Halagang $5,500 ang napagwagian ng pambato ng Poland samantalang may pabuyang $3,500 si Maluto.

Nag-ambisyong magkampeon o kahit man lang makapasok sa finals ang mga bigating sina Estonian Dennis Grabe (dating hari ng Austrian Open at Slovenian Open); Dutch Niels “The Terminator” Feijen (2014 World 9-Ball king), batikang Finnish Mika “Iceman” Immonen, Greek Alexander Kazakis (European 10-Ball ruler); Rusong si Fedor “Viking” Gorst (hari ng 2019 World 9-Ball tilt), Czech ace Roman Hybler (siga dati sa German Open); Austrian Albin Ouschan (2016 world 9-ball winner; 2017 at 2019 World Cup of Pool titlist); Polish Mieszko Fortunski (topseed) at Hapones na Naoyuki Oi (4th ranked). Lahat sila ay umuwing nakayuko at ang apat sa huling mga nabanggit ay direktang nakatikim ng angas ng noon ay hindi kilalang Pinoy.

Sabit kay Maluto si Hybler noong qualifiers, si Ouschan ay tumiklop sa round of 16, napauwi si Fortunski noong quarterfinals habang sa semis namaalam si Oi.

Hindi nga naririnig ang pangalan ni Aivhan kaya dehadong-dehado sa kanila ang manunumbok na konektado sa Powerbreak Billiards Hall ng Abu Dhabi, United Arab Emirates. Si Maluto ay pangalawa lang sa Group 4 qualifiers. Bukod dito, ang tangi niyang ingay na nagawa bago ang torneo ay nang magkampeon ito sa isang qualifying tournament ng Predator One Pool 10x4 10-Ball Championship.

Ngunit dahil sa mga higanteng pinabagsak at dahil sa nasikwat na runner-up finish, pormal nang siyang tumawag ng pansin. “... Great tournament for Aivhan Maluto. I suspect we are going to seeing A LOT from this player moving forward!!” pahayag sa social media ng tagapangasiwa ng paligsahan bilang pagkilala sa narating ng Pinoy.