Kabog ang mundo ng bilyaran kina new teenage lodi 'Benok' at Trinidad

ni Eddie M. Paez Jr. - @Sports | February 22, 2021

Nakakaramdam ng kaba o di kaya ay pag-aalinlangan ang mga bigating manunumbok saan mang bahagi ng daigdig kapag nalaman nilang lahing kayumanggi ang makakaharap nila sa mesa.

Ito ay dahil sa bagsik ng kamandag na nagmarka mula sa husay ng mga pangalang Efren “Bata” Reyes, Francisco “Django” Bustamante, Dennis “Robocop” Orcullo, Ronnie “The Volcano” Alcano, Carlo “The Black Tiger” Biado, Lee Van Corteza, Johann “Bad Koi” Chua, Jose “Amang” Parica at Zorren James “Dodong Diamond” Aranas.

Sa hinaharap, ang listahang ito ng mga lodi ay puwedeng singitan ng pangalan ng binatilyong si Earl Vincent Trinidad. Ang 16-taong-gulang na tagahanga ni “Bad Koi” Chua ay unti-unti nang kinakikitaan ng potensiyal bilang mukha ng billiards sa Pilipinas.

Taong 2012 nang hirangin itong kampeon ng MAPPA Christmas Bonanza 9-Ball Tournament, Yoyo Billiards Club at ng East Pool Tutor 10-Ball Tourstop. Nasikwat din niya ang huling upuan sa podium ng MAPPA 10-Ball Tour sa kaparehong taon.

Ang ipinagmamalaking manunumbok ng Las Pinas ay nangibabaw rin sa 2018 Bilyarista.com Team Battles at naging semifinalist, 2018 South Golden Break Association 10-Ball Tournament at 2018 Bilyarista.com 10-Ball Tournament.

At noong 2019, nag-init nang husto ang kanyang pulso sa panahon ng tag-araw at hinirang siyang numero uno sa Bilyaristang.com 8-Ball Tournament (Marso), Bilyaristang.com 9-Ball Tournament (Abril) at J&P 9-Ball Cup (Mayo).

Isa lang ang cue artist na si Vickoy sa maaring sandalan ng bansa sa kinabukasan. Kamakailan ay nagpakilala si Aivhan Maluto matapos itong pumangalawa sa malupit na Poison VG10 2.0 Virtual 10-Ball Tournament. Nariyan na rin ang pangalan ni Bernie “Benok” Regalario - isa pang 16-anyos na manunumbok mula sa Paranaque na inaasahang magiging mahalagang bahagi ng Philippine billiards.

Taong 2020 nang sumargo siya kontra sa mga dating world champions mula sa Pilipinas. Sa duwelo kontra kay Biado, naging hari sa 9-ball sa buong mundo ganundin sa World Games noong 2017, nanalo si Regalario sa isang handicap match. Nang makabanggaan niya ang alamat na si “Bata”, isang double world champion (8-Ball at 9-Ball) mula sa Pampanga, umabot sa isang hill-hill ang salpukan bago nangibabaw ang binatilyo.

At kamakailan, sa isang open tournament na binansagang 2021 GAB 10-Ball Open Tournament, umabot siya sa semifinals matapos silatin ang ilan sa mga bituin ng bansa tulad nina Corteza at Chua. Sa final 4, pinag-empake na siya ni Biado.

FEU, nandurog ng ibang nasyon sa Kasparov online

ni Eddie M. Paez Jr. - @Sports | February 18, 2021

Pinakinang ng Far Eastern University ang bandila ng Pilipinas matapos itong makapasok sa unang sampung koponan nang magsara kamakailan ang Kasparov Chess Foundation University Cup na ginanap online at nilahukan ng mahigit 100 koponan mula sa Asya, Americas, Europe at Africa.

Nagtulong-tulong sina Jeth Romy Morado, Kyle Sevillano, John Jacutina, Darry Bernardo at Kristian Abuton upang maisumite ng FEU ang anim na panalo at isang tabla kontra sa dalawang talo para sa kabuuang iskor na 6.5 puntos. Tinalo ng FEU Manila ang University of Health and Allied Sciences (Ghana), Istituto Federal De Sau Paolo (Brazil), Bucharest University of Economic Studies (Romania), University of Zagreb (Croatia), Texas Tech University (USA) at Perm State Research National University (Russia).

Nakatabla ng koponan mula sa Pilipinas sa pang-anim na baytang ang anim na iba pang mga eskwelahan bagamat dumulas ito sa pang-10 puwesto nang pairalin ang mga panuntunan sa tiebreak ng kompetisyong kinontrol sa pamamagitan ng lichess at ng zoom.

Dinomina ng U.S. ang kompetisyon matapos na kunin ng University of Texas - Rio Grande (9.0 puntos), University of Missourri (7.5) at Texas Tech University (7.0) ang lahat ng puwesto sa podium pagkatapos ng 9 rounds ng bakbakan.

Umeksena rin bukod sa FEU Manila ang mga kinatawan ng mga sumusunod: 4th - University of Texas at Dallas / USA (7.0 puntos); 5th - Gunadarma University / Indonesia (7.0); 6th - University of Cambridge / England (7.0); 7th - National Technical University of Athens / Greece (6.5); 8th - Saint Louis University / USA (6.5); 9th - Moscow Institue of Physics and Technology / Russia (6.5); 11th - Ivan Boverskyj Lviv State University of Physical Culture / Ukraine (6.5); 12th - Georgia Institute of Technology / USA (6.5) at Universiade Federal de Minas Gerais / Brazil (6.5.).

Nagbabaga na ang banggaan ng North vs. South sa PCAP

ni Eddie M. Paez Jr. - @Sports | February 13, 2021

Tiyak ang pagtutok ng chess aficionados ngayong Sabado sa inaasahang mainit na banggaan ng mga nangunguna sa North Division kontra sa mga tumatrangko sa South Division sa isa sa mga eksplosibong gabi ng virtual Professional Chess Association of the Philippines (PCAP) All Filipino Conference.

Ang umaalagwang Caloocan Loadmanna Knights sa Norte, may rekord na 14 na panalo at isang talo ay makikipagtagisan ng husay sa Negros Kingsmen na armado ng pinakamakinang na kartadang 13-2 sa dakong timog ng paligsahang umuusad na sa North vs South na format.

Nakasandal sa liderato nina International Master Paulo Bersamina at IM Jan Emmanuel Garcia ang Caloocan habang nakatingala sa tikas ni FIDE Master Nelson Mariano III ang Kingsmen.

Kailan lang ay maluwag na nakaungos ang Caloocan mula sa hamon ng Lapu-lapu City Naki Warriors, 14.0-7.0 bago nakalusot mula sa bangis ng Mindoro Tamaraws, 12.5-8.5 upang mapanatili ang puwesto sa lead pack ng North Division.

Sa kabilang dako, nakangisi pa rin ang mga Negrenses dahil kagagaling lang nila sa dobladong panghihiya sa Cavite Spartans (14.0-7.0) at Isabela Knight Raiders (17.0-4.0).

Ganito rin ang takbo ng kuwento sa pagsasagupa ng San Juan Predators (14-1) at Iloilo Kisela Knights (13-2) sa tanging professional chess league ng Timog Silangang Asya. Mangunguna para sa San Juan sina GM Oliver Barbosa at FM Narquinden Reyes sa pakikipagbuno kontra sa tropang Ilonggo ni GM Rogelio Antonio.