Alvarez, umentra sa semis ng Virtual Ghost Tour

ni Eddie M. Paez Jr. - @Sports | May 02, 2021

Tinumbok ni Elijah Alvarez ang pinakamalaking tira niya sa pandaigdigang entablado sa larangan ng bilyar nang makapasok ang binatilyong Pinoy sa semifinals ng Arcadia Virtual Ghost (VG) Battle of the Sexes Billiards Tournament na ginaganap online.

Kilala sa taguring “Wonderboy” sa pool circle, nakalusot sa matinding hamon mula sa pangatlong grupo ng qualifying stage si Alvarez kaya ito humakbang sa knockout rounds. Sa grupong nabanggit, nakasama niyang nag-ambisyon sina Yuli Hiraguchi ng Japan, Polish ace Konrad Juszczyszyn at ang pambato ng Czech Republic na si Yvonne Ullman Hybler. Pero hindi tinakasan ng tikas si Alvarez at nakuha pang daigin si Poison VG 10-Ball 2.0 Virtual Tournament champion Juszczyszyn kaya nakausap ito sa susunod na yugto. Naging kinatawan sa knockout rounds ng grupo sina Alvarez at Hiraguchi.

Sa knockout rounds, nakakuha ng bye si Alvarez bilang insentibo sa pagiging 2nd placer ng qualifiers kaya naghintay lang siya ng makakatunggaling manggagaling sa Round-of-16.

Sa quarterfinals, itinakda ang paghaharap nina Alvarez at Margaret Fefilova. Ang huli ay napasok sa final 8 ng kompetisyon matapos daigin si Hiraguchi. Pumabor ang pagkakataon para sa Pinoy nang ideklarang winner by forfeiture si Alvarez laban kay Fefilova.

Haharapin ni “Wonderboy” ang Amerikanong si Tyler Styler sa semifinals. Si Pia Filler ng Germany ang ginawang tuntungan ni Styler patungo sa huling apat na bilyarista.

Isa pang Pinoy, si Poison VG 10-Ball 2.0 Virtual Tournament runner-up Aivhan Maluto, nakabase sa United Arab Emirates, ang sumabak din sa kompetisyon at nakaabot sa “isang talo, uwi na” na bahagi ng paligsahan pero hindi na nakaahon sa gitgitang nangyari sa Round-of-16.

Dahil sa pagiging semifinalist, sigurado nang magbubulsa si Alvarez ng pabuyang $1,200 ngunit tiyak na sasargo pa ito nang husto para makapasok sa championship round at tuluyang makagawa ng marka sa world stage.

Pinay golfers, may tsansa sa Olympics

ni Eddie M. Paez Jr. - @Sports | April 29, 2021

Tila hinihintay na ng Tokyo Olympics ang pagdating ng mga pamosong Pinay golfers na sina Yuka Saso at Bianca Pagdanganan matapos na mapanatili nila ang kani-kanyang puwesto sa listahan ng mga parbusters na kwalipikadong maglaro sa prestihiyosong pagtitipon dalawang buwan mahigit na lang ang natitira.

Base sa listahang ipinalabas ng International Golf Federation o IGF nitong Lunes, pasok ang dalawang Pinay parbusters sa talaan ng mga manlalarong puwedeng lumahok sa sports spectacle na karaniwan nang ginaganap tuwing apat na taon ngunit hindi natuloy noong 2020 dahil sa pandemya.

Sa Olympic Golf Ranking na nakabase sa Official World Golf Ranking, ang 19-anyos na si Saso ay matibay na nakakapit sa pang-22 na baytang samantalang ang 23-anyos na si Pagdanganan ay nakaupo sa pang-43 na posisyon.

Solido ang kanilang mga kinalalagyan base sa regulasyon ng organizers kung saan ang unang 60 lady golfers pagkatapos ng Hunyo 2021 ay kwalipikadong pumalo sa Olympiada. Kasama rin sa panuntunan na limitado sa apat na manlalaro ang puwedeng kumatawan sa isang bansa kung ang mga ito ay pulos nasa top 15. Kung nasa pang-16 hanggang 60, limitado lang sa dalawa kada bansa ang pinapayagang maglaro.

Kung mapapanatili o mahihigitan pa nina Saso at Pagdanganan ang kanilang posisyon, may karagdagang mga Olympians ang bansa na may seryosong tsansa sa pinakaaasam na medalya.

Si Saso ay sariwa sa isang top 10 wind-up sa isang torneo ng prestihiyosong Ladies Professional Golf Association (LPGA) Tour. Sa Lotte Championship na ginanap sa Kapolei Golf Course ng Hawaii, pumang-anim ang double gold medalist sa huling Asian Games. Si Pagdanganan ay may 2 ginto noong 2019 Manila SEA Games, ang siyang itinuturing na longest hitter ng LPGA.

All-stars sa PCAP, uusad, Reinforced Cup sa Mayo

ni Eddie M. Paez Jr. - @Sports | April 21, 2021

Magiging abala na naman ang Professional Chess Association of the Philippines o PCAP ngayong Mayo dahil sa pag-usad ng All-Stars Games at ng Reinforced Conference na binansagan ding Wesley So Cup ng mga tagapangasiwa.

Sa All-Stars event ng pinakaunang professional chess league sa bahaging ito ng daigdig, magsasalpukan sa Mayo 2 ang koponan ng North at ng South. Ang komposisyon ay nakabase sa resulta ng botohan ng mga tagasubaybay, coach at manlalaro.

Tatampukan ng dayuhang chessers ang kada koponan sa PCAP Second Conference na itinataguyod ni dating Philippine chess king at ngayong ay Super GM Wesley So. And tubong Cavite na World Random Fischer Chess champion ay naglaan ng mga gantimpala para sa mga magpo-podium.

Samantala, sinorpresa ni Kim Kenneth Santos ang mga karibal tungo sa paghablot ng titulo sa pangunahing kategorya ng kalalakihan samantalang dinomina ni Ruelle Canino tulad ng inaasahan ang katulad na pangkat para sa mga dalagita upang pangunahan ang mga nagmarka sa National Age Group Chess Championship - Visayas Leg.

Kulelat sa pre-tournament ranking bukod pa sa pagiging unrated pero pinangunahan ni Santos ang mga performers sa Under - 20 Boys dala ang 5.5 puntos mula sa 7 rounds. Kasama sa mga sinilat niya sina 4th seed Wayne Ruiz sa panlimang yugto at si 10th ranked Jerico Santiaguel na hinatak nito sa isang hatian ng puntos.

Pumangalawa kay Santos si no. 5 Jave Mareck Peteros (5.0 puntos; tiebreak: 27.0) habang pumangatlo si no.1 Clyde Saraos (5.0 puntos; tiebreak: 25.5) sa bakbakang online chess. Hindi pinalad na makapasok sa podium kahit na may limang puntos din sina 18th seed Gene Kenneth Estrallado at no. 2 bet Jasper Faeldonia kaya 4th at 5th lang sila ayon sa pagkakasunod-sunod.

Sa kabilang dako, kumamada si Canino ng 4.5 puntos pagkatapos ng 5 rounds para itala ang runaway na tagumpay sa Under-20 Girls Division. Dalawang buong puntos ang agwat ng dalagita mula sa pinakamalapit na karibal.

Kasama rin sa listahan ng mga nagwagi sa kani-kanyang grupo sina Carl Daluz (Under 18 Boys); Christine Faith Tabungar (Under 18 Girls); Fletch Archer Arado (Under 16 Boys); Ruth Jamelin Lim ( Under 16 Girls) at iba pa.